ياناس الفريق عوووك الحريق الحريق المحاصيل حرقت النار اكلت اي شي النار ماخلت شي ياناس يا ابوي العمده يا ابوي العمده النار النار، دا كان صوت المنادي بدو الناس يجرو علي اتجاه المحاصيل اي زول شايل حاجه عشان يطفي النار والصوت كان كل مره بذيد النار كانت عاليه شديد حتي النسوان طلعو بره وبدو يساعدو بس النار كانت اكبر من المتوقع وبدت تاكل اي شي جنبها، انتهت من المحاصيل كلها مافضل ولاشي كانو الناس بحاول يوقفوها عشان ماتصل البيوت، وقدرو انو يطفوها بس بعد خساير كبيره شديد انطفت النار بعد اخدت كل شي كان العمده الماحي محسور شديد عشان كان عندو اكبر كميه حقت محاصيل في القريه ماقال اي كلمه اتحرك طوالي علي بيتو ودخل الاوضه حقتو وقعد كان خاتي يدينو في راسو وكان وشو مابتفسر جات حليمه مرتو التانيه داخله وقعدت جنبو وسكتت مسافه بدت تتكلم يا الماحي ربنا كتب كدا مافي يدنا شي غير انو نرضا بي المكتوبه ونطلب منو العوض، ماتزعل نفسك الجاتك في مالك سامحتك، سكت مسافه وقبل عليها حليمه انا ماني قادر علي اي كلام اسع ولاداير لي زول يقولي شي الفيني مكفيني، حليمه: يا الماحي انا ماني طالبه منك شي وانا حاسه بي الفيهو بس انت العمده انت كان سويت كدي باقي الناس تكون كيف
وقف علي حيلو وكان زول عريض وعاتي مقارنه بيها هي حليييييمه قلتا ليك ابعدي مني الساعه دي واقفلي الباب دا وراك وماني داير اشوف لي زول اليله دي نهااااااي ابقي مارقه يا وليه ماتكتري كلام معاي، كانت بترجف من النبره الحاده البتكلم بيها طلعت وقفلت الباب لقت نفيسه مرتو الاولي قاعده خالفه رجل علي رجل وبتشرب في شاي الصباح كانت بتحاول تخفي التوتر وتبين انو مافي شي
نفيسه: حليييمه مش كانو طولتي المسافه في النقه ياوليه دا زمن يتكلمو فيهو التقول ماك عارفه العمده لكن تعرفي كيف يختي هو انتي فاضيه من القوايل والجبنات بس مامشكله بتعرفي بعد كدا اكب ليك شاي؟
حليمه كانت بتعاين ليها بنظرة غيظ شديده وبعدها اتحركت طوالي مشت البيت حقها
العمده زول صارم وماكان بقبل الخساره وكان من اغنياء القريه والخساره الاتعرض ليها دي حاترجعو رجعه كبيره ماكان خاتيها في الحسابات كان متزوج مرتين حليمه ونفيسه عندو خمسه بنات وولدين حليمه عندها ولد وبتين ونفيسه ولد وتلاته بنات بس نفيسه كانت المسيطره وماسكه زمام الامور في بيت العمده
قمتا مافاهمه اي حاجه الناس دي كلها بتجري في شنو ماعارفين بس العارفنو انو في حريق، بعد ناس ابوي طلعو طلعنا نحنا ومشينا علي اتجاه الحريق كان كبير شديد وظاهر من بعيد لحدي ماوصلنا مسافه كدا من الحته الفيها الحريق كانو الناس بطفو في النار وبدت تطفي لكن اكلت اي شي كانو النسوان كلهم واقفين والبنات والاطفال الصغار قبلت علينا نفيسه دي مرتو لي العمده كانت سمحه شديد وعاتيه وصحتا سمحه شديد لابسه الدهب في يدينا الااتنين هي الوحيده الفي نص الناس لمن ترفع يدها بتعمل صوت وكانت رقبتا محزقه من الصحه حقتا عاينت علينا كدا بنظره بتاعت استصغار انا العمده لو كان سمع كلامي وماختا المحاصيل حقتو مع الفقر ديل ماكان اسي حرقت بس نعمل شنو عين الجعان غير تجيب الفقر مامنها فايده، ومشت طوالي زول قال كلمه مافي الناس كانت ساكته وبتعاين شويه شويه الناس بدت ترجع بعد عرفنا انو المحاصيل حقت السنه كلها اتفقدت في لمح البصر جينا البيت وكان الكل ساكت الشمس بدت تشرق
