طلعت من جوه وكان البيت مليان نسوان، هوووي ياحريم انا ماعندي بكاء عشان تجني ولاعندي شي رايح، ماها نفيسه البسندوها، انا بت بله النضمي الكتير معاي مابنفع وعلي ولدي مصيرو يعود والبسمعا تجيب سيرة علي في شي بضبحا وبشرب من دمها، بعد كلاما النسوان بدو يطلعو واحده واحده كانت بتغلي من جوه بس مابتظهر الضعف جاتا انتصار نفيسه جبتا ليك الشاي اتلفتت عليها وهي غضبانه شديد
نفيسه: تتنفسي بي ضلوعك، انا قلتا ليك دايره شاي
انتصار: دا زمن الشاي حق العمده، وانتي يومي بتشيلي في الزمن دا
نفيسه: داك محل العمده دايره تودي ودي مادايره خلي، وتاني اوعك تجيبي حاجه
انا ماقلتا ليك طيري من وشي، قعدت في الكرسي وكانت سارحه في علي ياربي الحصل عليهو شنو، اسي زمان زي الزمن دا كان بجي من بره يسلم علي ويشيل الشاي حقو ويدخل لي جوه، ماكان بدور يقعد مع زول عمرك ياعلي ماغلطا علي في كلمه ولا عزبتني في شي، الله يردك لي في صوت بقول نفيسه نفيسه قطع افكاره
العمده: ياوليه بنبح لي ساعه مابتردي خبارك
نفيسه: ماسمعتك، ووقفت علي حيله انا عندي وجع راس داخله لي جوه ارتاح
العمده: انوديك الدكتور ان بقيتي تعبانه
نفيسه: لا ماتعب نفسك باخد لي حبوب وبروح
العمده: انا عرفتك ماك شديده من ماجبتي الشاي
عاينت ليهو وكانت معبوره منو شديد
نفيسه: انا داخله لي جوه، وفاتت منو، وهي زعلانه شديد العمده كان حاسي بي الحاجه لكن ماداير يتكلم فيها عشان عارف نفيسه لمن تقوم كعبه شديد
بعد علي فات كنت بجر في رجليني جر لحدي ماوصلتا البيت، كانت امي جوه من جيت بقت تكورك يابت انا ماقلتا ليك ماتتحاومي مالك الرايح ليكي شنو، وبقيتي تطلعي من راسك ماعندك راي في زول
فطومه: خالتي نحنا مشينا نجيب لينا حاجات من قسمه رسلت لينا ولمن جاين من هناك غزال تعبت وبقت ماها قادره تمشي، انا كنت واقفه بس مابدي اي كلام قعدتا في اقرب سرير امي جات جاريه بقت تسال فيني يابت مالك شاعره بي شنو يابت ماتتكلمي
فطومه: خالتي بس قالت عندها وجع راس، انديها حبوب وبتبقا كويسه، امي كانت قاعده لحدي مابلعتا الحبوب وفطومه فاتت وريان عرفت انو في شي، مرت اربعه ايوم انا لابتحرك ولابعمل حاجه ولابقدر اكل مرات بجامل امي بس لكن ماكان عندي نفس لي حاجه، عندنا بت من القريه ممرضه قالت انو بكون ملاريا، وخلوني علي كدا كنت في عالم براي حسيت بي الضعف والانكسار بس لازم اقاوم لازم اقوم، اليله عرس ريان قمتا وكنت تعبانه شديد عيوني مورمه وحولينا السواد، ماخلوني عملتا حاجه جهزنا حاجات الجرتق وريان لبسوها كانت طالعه حلوه شديد بالحنه والتوب
