كيف يعني ماتت؟ كيف بتي ماتت بتي هدي اسي كانت كويسه اسي كانت بتتكلم معاي، مافي واحده تقول ماتت بتي حيه زوبه، بتي انتي نصيحه صاح انتي ماجاك شي، ديل ماعندهن موضوع ساكت قومي علي حيلك يازوبه خلينا نمشي بيتنا، زوبه ردي يابتي عليك الله قومي يمه يمممممممه بتي مالا مابتتكلم بتي سويتن ليها شنووووو بتي قتلتوها بتي يممممه خالتي حليمه خالتي شوفي بتي شوفيها ابت تفتح عيونا عايني عيونا مغمته، عايني مالا بتتكلم ياخالتي ووووواي انا بتي واااااي قتلو بتي قتلوووووها يا ناس بتي ماتت قدام عيني بتي راحت منيييي وااااي انا يا الله ياوجعي سجمي وااااي انا من سواد ليلي يا الله يا الله، بدت تكورك شديد ونفيسه كانت بتحاول تتماسك وحليمه كانت بتبكي وفاطمه كانت بتعرق وبتلم في الحاجات حقتا تبيان رقدتا وغتتا بي الملايه وكان لسه دمها ماشي، نفيسه جات جنبها وكانت بتعاين ليها جات ترتيل زحي منها كلو منك انتي بي سببك بتي فارقتني قدر مانضمتا معاك ابيتي تردي كدا ارتحتي خلاص بطنك بردت، بدت عفاف تبكي جات جاريه عليها ومسكتا عليها وبقت تبكي، حليمه مرقت ومعاها فاطمه ونفيسه وبتول
تبيان طلعت وكانو الناس بره بين شك وظن مامتاكدين لسه سالوها قالت ليهم البنيه الله يجعله سلف صالح وطلعت طوالي تبيان زاتا كانت بتبكي وماقدرت تقعد بدو النسوان كلهم يكوركو بي صوت عالي ترتيل قفلت عليها الباب وبقت ماسكه بناتا عليها، العمده جاء داخل وماعارف في شنو
العمده: في شنو يانسوان مالكن
حليمه: بنية ترتيل زوبه ماتت يا العمده
العمده: ان لله وان اليه راجعون، مالا
حليمه: شكلها فاطمه الدايه قطعت فيها شريان
العمده: لاحوله ولاقوة الا بالله، وين البت اسع ووين امها والنسوان ديل متلمات لي شنو البنيه دي صغيره ماببكوها
حليمه: في الاوضه ديك، اتحرك عليها والعمده كان بحبها شديد
كانت زوبه دايما حولينو كانت اكتر واحده محبوبه عند العمده
الباب كان قافل بدق في الباب بس ترتيل ماكانت واعيه بيهو لحدي ماجاء الطيب وتاج الدين وعرفو الحاصل كسرو الباب ولقوها ماسكه البنات عليها وبتقول قتلو بتي قتلو بتي شالوها مني قطعو قلبي بتي قتلوها قدامي
تاج الدين والطيب ماقدرو يقربو منها كانو واقفين جاها ابوها ووقف قداما
العمده: ترتيل يابتي اصبري الصبر طيب
ترتيل: اصبر يابا اصبر لشنو شن الفايده وانا طول عمري صابره وساكته ياها دي النتيجه يمه قتلت بتي حرقت حشاي ماني صابره
العمده: اوعك اسمعك قلتي كلمتك دي تاني وعله البحصل ماهو طيب امك تقتل جناها كيفن، الحصل دا امر الله نحنا مانا فايتنو اصلو
