ديم الحُـر

30

Hi ✨

ثم تؤمن أنّ كلّ‏ مُناسباتَك‏ ،
السَّعيدة‏ أو الحَزينة على اختِلاف‏ مُسمَّياتها ،
هي في النّهاية عِبارة ‏عن حُضور شَخص‏ أو غِيابه!

               ______________________

تقدم حُـر من بينهم و بحركه سريعه ،
سحب سلاح من ظهرة و وجهة عليهم!!
صدى صوت رصاصه ب المكان ،
استقرت ب جسم ديم!!
الي فتحت عيونهة تباوعله ب صدمه ،
ارتخت و وكعت ب الگاع منزله راسهة!
تحت عياطنه و صدمتنه ..

حميد نزل يمهة قبل م يلزمهة ،
ابتعد و انضرب ب الحايط نتيجه رفسه حُـر اله!!
كعد كدامهة رافع راسهة ،
و الـلواء و الشباب ركضو عليهة ..

حُـر ب خوف :- صارلج شي ، بيج شي ،
باعينييي!!

رمشت و عيونهة تتنقل بيناتهم ،
علي سحبهة يمسح على بطنهة ،
ديريد يشوفهة تنزف لو لا ..

حُـر :- لابسه سترة مووو ،
عليج العباس كولي اي!

رفعت ايديهة تحاول تهديهم ،
بعدهة تحت تأثير الصدمه ،
باوعت لـحُـر و انفجرت تضحك هي ويا!!

ديم :- مابيه شي ، مابيه أهدئوا..

رجعت تضحك و الـلواء تنهد ب تعب ،

علي :- لابسه سترة؟!

هزت راسهة ب اي ،
رفعت راسهة من شافتهم ديطلعون حميد ،
تحت مقاومته و عياطه ب اسم ديم!!

الـلواء و الشباب طلعوا وراهم ،
بقه حُـر الي سحب شماغه ،
و رفع ايدهة يشدهة بي!

عيونهة تتنقل على تفاصيل وجهة ،
و هو مركز ب ايدهة ،
رفع انظاره الهة ،
ابتسمت و كالت :- مابيه شي ..

ابتسم ب خفه و ترك ايدهة ،
قبل م يحجي اي شي ،
عگد حواجبه من سمع صوت اشتباك!

التفت يريد يطلع ، بس وكف ب الباب ،
نظراته تتنقل بيناتنه ب حيره و قلق ،
ألتفت من اجه أكرم ،
باوعلنه و كال ب تحذير :- ولا وحده تطلع منا!

حُـر :- شديصير؟!

أكرم :- حاسب حسابه الساقط ،
اجوا عليه يردون ياخذوا!

ديم :- البنيه وين؟!

أكرم :- ب الغرفه الثانيه اخوهة يمهة ..

باوع لايدهة و سال :- ايدج؟!

ديم :- مابيهة شي ،
شـحنسوي هسه؟!

حُـر :- انتن تبقن هنا و احنه نطلع!
ديرن بالچن وحده تعتب باب هاي الغرفه ..

طلع بدون ميسمع جوابنه ،
ثواني و رجع!
تقدم على ديم و هو ديفتح دگم بدلته العسكريه!!
لحظه هذا شديسوييي؟!!

نزعهة و بقه ب بدي اسود ربع ردن ،
خلاهة على چتفهة ،
و هي تباوعله ب استفهام و ابتسامه خفيفه ،
سحب سلاح من خصره ،
مَـدة گدامهة و كال :- تعرفين تستخدمي؟!