﴿كاملة﴾ 🔞 Sunset | شمس الغروب 🔞

•03•

🌼لـمـسـة يـد🌼

ايفان : كان لمغرب قريب والشمس قريب تغرب ، مطيش روحي على كانابي نقرا في جريدة في طابلات دخل ادم عينيه حمر باين كان يتعارك طيشت طبلات فوق الكانابي قدامي و وقفت رحتلو 'وش بيك' غزر فيا بغش 'لكلب مش حاب يتربى لمرا هاذي موتو على يدي' فهمت بلي راجل خالتو عامل زبلة كي العادة باينة خيانة ولا سرقة تع دراهم من عوايدو يسرق من مرتو و هي تعيط لادم تشكيلو وبما انو بعيد ما يقدر يدير والو اما حنا رجعنا وكيما عاوني هو جا لوقت نعاونو ، حطيت يدي على كتفو "ايه نربوه هذاك ساهل حسبت كشما صرات حاجة ڨراف"
حرك ادم راسو لا "الراجل حركاتو مشبوهة حكات حوايج ياسر توسوست لازم نحط عيني عليه " ضيقت عيني متساءل "علاش توسوست" طلع راسو لفوق "مسيو ايفان اعداءنا ليامات هاذو يخططو لضربة كبيرة يعني وقتهم مليان مكانش نفس يتنفسوه و زيد (هبط راسو) شركتهم عادية شركة تأمينات وش الحاجة لي تخليه يخدم في ليل و صباح بكري!!" خزرت فيه يعني ممكن عادل منهم ! طلعت لبيتي ديراكت محبيتش نزيد في الهدرة خليتو وحدو يجمع افكارو و يصفي ذهنو اصلا راسي رح يطير من بلاصتو من الوجاع شربت 2 كاشيات ما نفعونيش تعبت الفترة اللخرة لازملي راحة كبيرة هه راحة !! سنين ما سمعتش كلمة راحة ، خزرت مع روحي في المراية لحظة صمت ! هذا ايفان لي صنعوه ، هذا ايفان لي يحرقهم واحد واحد ، حق بابا يرجع ثاني ومثلث دوشت ولبست قشي دجين فونسي و تريكو ابيض و فاست كوير و ڨوداس نوار لبست ساعتي و عدلت شعري وخرجت رايح لحنان نحب نسمع من عندها وكان قدرت ندخل لبيرو راجلها..
دخلت للدار بعد ما طبطبت و قلت للحارس انا شكون ودا الاذن من حنان داخل بكل شموخ في الجردينة لي بين باب لبرا و باب الفيلا و عيني دارت مسح على كل بلاصة فيلا عادية تع ناس عندهم دراهم بصح الصح كل لداخل دخلت لقيت مرا سمينة شوي باينة كبيرة في العمر تبان معينة منزلية رحبت بيا و قعدتني في صالة وانا عيني مزالت دور على كل حاجة عملت سكانار لكلش سمعت حس طالو عرفتها حنان درت بشوي تبسمت معاها و صافحتها و قعدت حطت رجل على رجل و شاورتلي بيدها باش نقعد "تفضل ايفان، تعرفنا في تيليفون كي كنت مع ادم لبرا وليوم يحضلي الشرف اني نتعرف عليك و نشكرك على وقفتك مع ادم" تبسمت مجاملها انسانة راقية في كلامها "العفو هذا واجب، انا جيت..." قاطعتني "نعرف جيت على جال عادل" تبا كيفاش عرفت هاذي "ادم قالك ؟" ضحكت عليا اكيد ادم شكون غيرو "لا بصح نعرف بلي ما يخبي والو عليك ونتا ليوم حبيت تعاوني صح !" جاوبتها "صح ونتمنى تحكيلي كلش" بدات تحكيلي وانا ندرس في كل حرف يخرج منها و نطلع ونهبط و نخمم مليح يمكن يكون خيط من الخيوط بدا يبان وانا ما عليا غير نحكمو باش نجبد الخيوط كل و ننتقم منهم واحد واحد ، حنان وقفت كي دخلت المرا تع قبيلة حطتلنا القهوة و خرجت ، وزادت رجعت " سمحولي ، مدام تيليفونك" عطاتلها تليفون عقدت حواجبها كي شافت شكون المتصل دارتلي "ولدي تسمحلي نرد هاذا من الشركة" حركت راسي "اكيد تفضلي" خلاتني وراحت وانا هزيت تيليفون نتفقد في الايميل حتان تحل لباب ودخلت.. هي !! وش دير هنا!!