_______________
💕غيث بعد سنين جفاف💕
ليان :
واخيرا وصلت للغرفة المحجوزة هنا ..من سابع المستحيلات نسوق للدار ... تاعبة ياسر جسمي تاعب بارد ... تاعبة نفسيا و خاصة جسديا ... ... وقفت عند لباب نحيت طالون ذبحلي رجلياا .. انا موالفة بيه بصح ليوم جريت بيه من صباح بكري لنص ليل ... جبدت لاكارت لي تحل لباب ... حليت لباب و دخلت ...
دخلت للبيت نمشي دايخة قفلت الباب برجلي ونثاوب نشوف غير في سرير قدامي وانا وسطو راقدة نشخر ... لا نمشط شعري ولا نمسح المكياج نرقد كيما انا... قص على تفكيري لباب يطبطب .. اول حاجة جات في بالي خدمة .. خدمة !! مستحيل نخدم الوقت هذا عينيا حمر من التعب ... وجسمي مخدر ..طيشت طالون من يدي ومشيت للباب حليتو.. نشوف في انسان واقف قدامي .. انسان مستحيل كان يجي في بالي لي هو طبطب .. نحيت يدي من كادر لباب وبقيت نشوف فيه .. شعرو قصر فيه و لحية براسك ماكانش... ريحة بارفانو تبدلت ! ريحة بنينة مخلطة بريحة شراب ... حسيتو نقص في الميزان .. بقيت نخزر لعينيه بصح انا نتفحص فيه كامل ... كل تفصيلة فيه شفتها ... حسيتو تاعب من ليساغن لي تحت عينيه ... هو تاني باقي يشوف معايا لا انا تحركت ولا هو ... خرجت من شفايفي كلمة وحدة "ايفان!" ...
قاعد فوق الكانابي و انا على جنب السرير .. لقاء نوعا ما بارد .. بالنهاية هو هنا لمهمة كيفي انا بالضبط .. بصح علاه الرئيس ماقاليش عليه... هو صح قالي رح يبعثلي شريك في المهمة مي ما حكيناش في التفاصيل... صمت دام دقائق ولا واحد فينا تجرأ يهدر ... نفذ صبري و اخيرا هدرت انا :" من وقتاش وانت هنا"
بقا يشوف فيا حسيتو عراني ... حمحمت باش نفيقو من سرحتو ... حك خشمو :" انتي تخدمي في دار ازياء "
انا :" وي (هزيت كتفي) مهمة جديدة"
ايفان :" عندي المعلومات كامل على المهمة غير انك شريكتي الرئيس ما يعثلي والو على العميل لي معايا"
انا :"وانا كيفك نعرف بالشريك غير اسمو"
ايفان :"تفاجأتي؟"
للحظة عينيه لمعو يستنى في اجابتي .. عينيه الحمر التاعبين من جيهة شارب و من جيهة يمكن عندو حاجة مقلقاتو ..او ..اوف وانا وين نعرف ... حاولت نسيطر على روحي هزيت كتفي وتبسمت نبين في البرود تاعي
انا:" عادي.. المهم نتيجة المهمة تكون مرضية.. ما يهمش الشريك"
ايفان :" ممم صح ما يهمش" ناض حمحم ومشى جيهة لباب ما حبش يشوف جيهتي ... وقفت في بلاصتي نسنى فيه يعمل حاجة .. يعني جا هدر زوج كلمات ورايح !! نعرف بلي شريكي بصح على الاقل يقول كلام اخر .. يحكيلي على حوالو ولا اي حاجة المهم ما يروحش .. حتى وانا تاعبة ورح ندوخ من قلة النوم ...
تلفت نص دورة و قالي :" ارتاحي اليوم وغدوة نبداو مهمتنا"
ما ستناش اجابتي .. خرج و قفل الباب ...
محادثة دامت ثواني كلش جا بسرعة و راح بسرعة ... انا في حلم ولا يقضة ... ايفان كان هنا .. ايفان خلى ريحتو في البيت .. كسيت روحي كنت في غيبوبة وفقت ... تبسمت و من تبسيمة وليت نضحك ... طيشت روحي على سرير ... تكمشت وحضنت المخدة ... ضحكت وبديت نألف سيناريوهات بصح للحظة كلش ولا ضلمة .. تفكرت انا شكون و علاه انا هنا ... حنا عملاء ... مجرد ارقام ... نكملو مهماتنا و نبداو مهمة جديدة ... لا عندنا الحق نحبو ولا نكرهو ... مجردين المشاعر ... سرحت في افكاري و ركبني الخوف ... مشاعري متناقضة .. خايفة و فرحانة ... فرحانة بوجودو معايا في نفس المهمة و خايفة يزعزني وجودو .. غلطة صغيرة نخسر كلش ... مانيش حابة نريسكي بحياتي و حياتو .. غمضت عينيا وفتحتهم نستمد في القوة من الضعف لي داخلي .... زعما نساني .. حسيت برعشة جسمو يعني يمكن نكون مزلت في بالو ... ويمكن كان ناسيني اصلا و كي شافني تفاجىء ... بقيت بين افكاري ساعة وساعتين حتان رقدت بلا ما نحس .....
أنت تقرأ
﴿كاملة﴾ 🔞 Sunset | شمس الغروب 🔞
Roman d'amour🇩🇿🇩🇿 تسقط 'ليان' في عرين 'ايفان' الغامض .. لتكتشف ان طريقهم للانتقام واحد والهدف نفسه .. اذن ماذا سيحدث لو التقى جاسوسين من المخابرات في مهمة للانتقام من جرح الماضي ؟ الرواية و الاسماء والاحداث من وحي الخيال لا تمد للواقع بأي صلة ...
