﴿كاملة﴾ 🔞 Sunset | شمس الغروب 🔞

•04•

☠️ غــدر ! ☠️

ليوم نرجع ايفان عميل المخابرات بعد تهمة كانت قادرة تقعدني في الحبس 20 سنة اثبتت برائتي و خليتهم يطلبو مني السماح و يرجعوني كعميل سري ، نضت للدوش دوشت و عدلت روحي و خرجت نلقى ادم واقف يسنى فيا تبسملي بمعنى اهلا بعودة الشبح ، مشيت للباركينڨ طيشت مفاتح طوموبيل لادم يسوقها و انا ركبت جيهة قدام شوفار ديمارينا للمقر جاي في ٱخر الجبل في بلاصة جن ما يشوفهاش ، دخلت نافخ صدري حتط لينات شمس في عينيا لي يشوفني يصبح عليا "اهلا بالشبح ، مرحبا بعودة الشبح، صباح الخير يا بوس" عندي مكانتي و احترامي واجب عليهم كل ، وصلنا انا وادم لبيرو رئيس دخلت انا بعد ما طبطبت و هو بقى لبرا يستنى فيا ، دخلت لقيتو حاط رجل على رجل باين يستنى فيا وقف كي شافني قربت ليه و جا حضني حضن الاب مش الرئيس ،
محمد : مرحبا بيك بيناتنا من جديد
نحيت لينات شمس و خزرت فيه "لولاك ماكنتش رح نرجع لبلادي و ثبت برائتي الشكر كلو ليك" حط يدو على كتفي "ايفان انت ولدي قبل ما نكون رئيسك ، وضرك بعد الراحة تاعك نحبك تلقاهم واحد واحد ، تكمل مهمتك و اي حاجة انا نعاونك ، معداتك وسلاحك تلقاهم في بيرو تاعك" تبسمتلو وعملتو التحية و خرجت ما نحبش نطول الهدرة ياسر دخلت لبيرويا ، تبدل شوي قبل 7 سنين مكانش نفسو حليت الدرج نلقى سلاح و معدات تجسس و سكاكن خبيتهم عندي و خرجت وادم ورايا نحب نتحرك ما نستناش لغدوة يمكن الفرصة تجي ليوم وانا ما نحبش نضيعهاا ، ركبت في طوموبيل عطيت ادم مهمة يروح لشركة عادل وانا كملت طريقي لفيلا حنان ، حبست بعيد شوي نسنى في شمس الغروب تخرج (قصدو ليان) ما نعرفش اسمها سميتها على اسم شعرها الطويل الاحمر ولا لبرتقالي قلتلكم لونو متناقض كيما شمس الغروب ، شفتها خارجة بصح مش وحدها معايا المرا لكبيرة بقيت نتبع فيهم راحو لسوق يقضو صوالح باين ، خرجت من طوموبيل مشيت ببطء و فرصتي جات خلات لمرا لكبيرة تشري الخضرة وهي راحت دخلت لحانوت كوسمتيك ، دخلت و وقفت وراها وهي تخاير في حاجة تع بنات ما نعرف ما ركزتش كل تركيزي على ريحة شعرها ، لمرا لي تخدم تم حسبتني راجلها ولا صاحبها تبسمت وقالت تفضل مسيو اختار معاها لون غوج الافغ راهي حايرة ، تلفتت مفجوعة مني كانت رايحة تحكي اما سكتت تبسمت ببرود و قلتلها بهمس "محتاج مساعدتك كي تروحي للدار اخرجي تلقايني لبرا نستناك" و درت ورايا و رجعت خزرت معاها وهزيت غوج الافر احمر "هذا يجيك مليح" حطيتو في يدها وخرجت ، ما نعرف وعلاش عملت هاك بصح حسيت لون هذاك كي يتحط فوق شواربها يعمل فتنة كبيرة خاصة اذا سيبت شعرها خلاتو يطيح على كتافها، غمض عيني بقوة وحليتهم وش قاعد نخرف انا تعمل احمر ولا اصفر انا وش دخلني لمهم نكمل مهمتي ، ركبت ورجعت للفيلا وبقيت نستنى فيها بعيد...

ليان : خلاني مصدومة مشوكيا وكلمة مصدومة شوي ، علاه يحب يحكي وش يسحق فيا ، زعما حاب يخطفني ويبيع اعضائي ! هه ليان وش بيكي كون حاب يخطفك ما يقلكش ارواحي ، بصح روج لي اختارهولي صح يهبل يا جدك ههههه سعات الراجل يختار خير من لمرا ، بصح انا علاه فرحانة و كرشي وجعتني اااعع خالتي فاطمة وينك خليني نرجع خير ، خرجت لقيتها قاعدة في كرسي قدام الخضار تحكي معاه كي شافتني وقفت وهزت الساشي "هيا يا بنتي نروحو راني عييت " تبسمت معاها و هزيت عليها الساشي "يلا خالتي" مشينا بشوي حتان وصلنا للدار طيشت عيني لقيت طوموبيل كحلة فيمي بعيدة شوي على فيلا اكيد هذا هو ، دخلنا حطينا كلش في بلاصتو و خالتي فاطمة بدات توجد الغداء حمحمت و حكيت "خالتي" دارتلي ويديها يقشرو في الخضرة "نعم" هبطت راسي "انا شريت برودوي لوجهي ونسيتو عند الكوسمتيك نقدر نروح نجيبو" طلعت حاجبها تتساءل "علاه نتي من وقتاه تنساي" جاوبتها "خالتي كانو ناس ياسر وانا خلصت وخرجت نسيت برودوي وانا مخلصاتو تعيشي خليني" قاتلي "لا مش ليوم عاونيني في لغداء و لعشية ولا غدوة روحي" حضنتها من لور صدري جا في ضهرها "خالتلي تعيشي نخاف يهزوه مبعد طفلة تقلي علاه ما جيتيش قبل تعيشي" خزرت معايا "حاساتك تكذبي نتي ما تنساي والو بصح نحسب روحي بهلولة روحي روحي في يدك نص ساعة سحقك قدامي سينو ..." قاطعتها اوكي اوكي نص ساعة نكون هنا" هزيت تيليفوني و خرجت نمشي بشوي جيهة طوموبيل الكحلة كي قربت نوصل تحل لباب و دخلت لقيتو يستنى فيا قاعد ماخذ راحتو يخزر معايا "نعم تفضل مسيو"