သိုင်းနတ်ဘုရားအသူရာ(ချူဖုန်း) အတွဲ(၂)သိုင္းနတ္ဘုရားအသူရာ(ခ်ဴဖုန္း) အတြဲ(၂)

1781-------1790

အခန်း(၁၇၈၁) ဂုဏ်သိက္ခာအားလုံး ဆုံးရှုံးခြင်း

''ဖေးရွှယ်လား''
ခံတပ်မှ ပစ်လွှင့်ခံခဲ့ရသူ မည်သူဖြစ်ကြောင်း အခြားသူများ မခွဲခြားနိုင်သော်လည်း ရှီးမန် ဧကရာဇ် မျိုးနွယ်စုခေါင်းဆောင်အနေဖြင့် ရှီးမန်ဖေးရွှယ်၏ အော်သံကို ကြားမိသည့်ခဏ၌ ၎င်းမှာ သူ့သားဖြစ်ကြောင်း ချက်ချင်း အတပ်ပြောနိုင်ခဲ့သည်။

ရှီးမန်ဖေးရွှယ်ကို အသေအချာ စစ်ဆေးကြည့်မိလျှင် သူ အံ့ဩထိတ်လန့်သွားခဲ့သည်။ သူနှင့်အတူ ခေါ်ဆောင်လာသည့် တပ်ဖွဲ့များနှင့် အခင်းအကျင်းကို လျစ်လျူရှုလျက် သူ့ခန္ဓာကိုယ် ရွေ့လျားသွားပြီး သူက ရှီးမန်ဖေးရွှယ်ကို ဖမ်းယူရန် ကောင်းကင်သို့ ရောက်ရှိသွားလေသည်။

''ဖေးရွှယ်၊ ဘာဖြစ်ခဲ့တာလဲ … ဘယ်သူက မင်းကို ဒီလောက် ပြင်းထန်တဲ့ ဒဏ်ရာတစ်ခုနဲ့ ထားခဲ့တာလဲ''
ရှီးမန် ဧကရာဇ် မျိုးနွယ်စုခေါင်းဆောင်က သူ့ရင်ခွင်ရှိ သားဖြစ်သူထံ လှမ်းကြည့်လိုက်သည်။ သူက သူ့သား၏ အသွင်အပြင်ကြောင့် ဒေါသထွက်နေသော်လည်း အဓိကအားဖြင့် သူ့သား ကြုံတွေ့ခဲ့ရသည့် ဒုက္ခများအတွက် စိတ်ထိခိုက်မှုကို သူ ခံစားနေရသည်။

ရှီးမန်ဖေးရွှယ်မှာ သောင်းချီသော နှစ်များတစ်လျှောက် သူတို့၏ ရှီးမန် ဧကရာဇ်မျိုးနွယ်စုတွင် ပေါ်ထွန်းခဲ့သည့် အထူးချွန်ဆုံး ပါရမီရှင် ဖြစ်ပြီး သူ၏ အချစ်ဆုံးသားလည်း ဖြစ်ပေသည်။ ရှီးမန် ဧကရာဇ် မျိုးနွယ်စုခေါင်းဆောင်က ရှီးမန်ဖေးရွှယ်ကို သူ၏ ရတနာအဖြစ် အမြဲတမ်း သတ်မှတ်ထားခဲ့သည်။

အမှန်အားဖြင့် ချူဖုန်းကို သူ မုန်းတီးခဲ့သမျှမှာ ချူဖုန်းက သူ့သားကို လူသိရှင်ကြား အရှက်ခွဲခဲ့၍ပင်။

ယခုမူ သူ့သားက တစ်စုံတစ်ဦးကြောင့် ထိုကဲ့သို့သော အခြေအနေအထိ အရိုက်ခံခဲ့ရသည်။ သူ ဒေါသမထွက်ဘဲ မည်သို့ နေနိုင်မည်နည်း။

''ခမည်းတော်၊ ခမည်းတော်ရဲ့ သားတော်က ခမည်းတော်ကို စိတ်ပျက်စေခဲ့တယ် … ကျုပ်က တကယ်ကို ပထမဆုံး ထွက်ခဲ့ရတယ်''
ရှီးမန်ဖေးရွှယ်က ခါးသီးစွာ ရယ်မောလိုက်သည်။ သူ့အနေဖြင့် သူ၏ ဖခင်ကို မျက်နှာပြရန် ရှက်ဖွယ်ကောင်းလွန်းသည်ဟု သူ ခံစားမိနေသည်။