Ako'y maghihintay kahit gaano pa yan katagal
Titiisin ko ang lahat para lamang sayo, mahal
Hindi ako mahihiya at sasabihin kong lahat
Nararamdaman ko sayo handa kong ipagtapat.
Hangga't ako'y nabubuhay sa mundong ibabaw
Sa Panginoon, pangalan mo'y lagi kong isisigaw
Ang matupad ang matagal ko ng pangarap
Na makayakap ka at makasama ko sa hirap.
Ang buhay ko'y maginhawa at puno ng kulay
At dahil sayo ngiti ko'y biglang sumilay
Bawat luha'y pipigilin ko na pumatak sayong mata
Tatanggalin ko ang pighati at kirot na nadarama.
Sa mga sandaling ako'y nakatingin sa malayo
Natatanaw ko ang mga mata mong mapanuyo
At ang isipan ko ay bumabalik sa nagdaan
Nakatambay sa pag-ibig na mahirap pakawalan.
Bumabalik sa lugar kung saan tayo nagkakilala
Hindi na mawala saakin ang iyong ala-ala
Para akong buang tulala at nakangiti
Habang naiisip ko ang iyong mga kiliti.
Ang mga ngiti mo saakin ay nagpapasaya
Sa mga panahon at sandaling kasama ka pa
Sana malaman mo sinta na ako'y naghihintay
Ikaw lang ang mahal habang ako ay nabubuhay.
Sa dinami-dami ng mga tanong dito sa'king puso
Kung bakit ikaw ang tinuturo ng kamay at nguso
At kahit na itanggi ko na hindi kita mahal
Ang pangalan mo laging kasama sa mga dasal.
Sa tagal ng pagsasama natin, di ko alam kung bakit
Naramdaman ko nalang na para bang ako'y naakit
Ang puso ko na dati'y kaibigan lang ang tingin
Pero ng matitigan ka, gusto na kitang angkinin.
Gulong-gulo na ang isipan, di alam ang gagawin
Kung pwede lang sa templo ika'y agad na dadalhin
At sasabihin ng tapat ang pagmamahal ko sa iyo
Pinapangarap ko noon pa man na ikasal sayo.
Hindi ako mapakali pag nasa isip kita
Laging naaalala ang panahong tayo'y nagkikita
Ngunit ng lumisan ka, ako'y nawalan ng langit
Sobrang hirap pag wala ka, ramdam ko ang sakit.
Ikaw ang aking swerte at pinagkukunan ng lakas
Ang mundo ko'y kinukulayan mo ang madalas
Kapag nakikita kasi kita para kang bahaghari
Kaya ikaw ang tanging hiling sa'ting habag na HARI.
