Alam ko naman na talagang kay hirap
Kung ang pangarap ay mawawasak sa isang iglap
Mga planong pinasibol ng panahon
Ngunit kinitil ng mapanirang pagkakataon.
Mga matatamis na pangakong binitawan
Sa kasagsagan ng mala-dyamanteng pag-iibigan
Tila ba isang itinayong kastilyong buhangin
Na sa paghampas ng alon ay tiyak na wawaksiin.
Paumanhin kung nasaktan kita
Lahat ng ito'y di ko naman sinasadya
Siguro nga'y direksyon natin di nagtali
Dahil sa pagtatapat ng katotohanan at pagkukunwari.
Tila isang maganda't pangit na panaginip
Na sa pagmulat ng mata'y iba ang masisilip
Isang katotohanang kailangang ipilit
Na tanging sa gabi mo lang masisilayan ang bituin sa langit.
Paumanhin, pagbigkisin ko man lahat ng mga bagay
Pilit itong binabatid dahil sa huwad nitong taglay
Siguro nga ito'y magiging bakas na lamang ng ating pagmamahalan
At tanging ala-ala nalang pagsapit ng kinabukasan.
