لاتزعل الدنيا ولا تزعلك يالظبي العفر ان كان ما جازت لك الدنيا ندور غيرها

"٤"

عند البنات بعد دقايق //
دخلت وشافت الاشياء اللي بالارض وهدايا والبنات يسولفون بحماس جات بسمه وبعيونها دموع وضمتها , البندري بضحكه : ام دميعه
بسمه بفشله : انا اسفه هاوشت ابوك ماعرفته الا اخر شي
البندري : صدق؟
وبضحكه : ابد شكرًا ان شاءالله وقفتيه عند حده عاد
بسمه بعدت بضحكه : يالعاقه راضيه
البندري جلست : مب عاقه بس رفع ضغطي دايم ضدي بكل شي
جبله رفعت يدها : يارب ان تخرج البندري من الديره مخرجًا حسنًا
البنات : امين
البندري : بنات شكرًا على كل شي صدق ماقصرتوا معنا
ديما : كنا بنروح بس تذكرنا انكم تعبتوا معنا واحنا بالمقابل ماسوينا لكم شي
حلا : عقبال نجيكم مره ثانيه ونحتفل بتخرج حصه وطيف
حصه ببتسامة : ان شاءالله
غاليه : يلا يلا عمر ينتظرنا تأخرنا
وبدوا يسلمون على بعض وطلعوا وهم مستغربين من النظرات والكلام عكس اول ما دخلوا وكيف رحبوا فيهم وضيفوهم لكن تجاهلوا كل شي وركبوا متجهين للرياض وبدر كان وراهم لين طلعوا من الديره وتأكد انهم راحوا خوفًا من ان اي احد يعترض طريقهم .

عند البنات الجادل تصب القهوه وفهده تقولهم كيف بسمه واجهت ابو بدر ..
البندري حطت يدها على وجهها : يع يوم قالت انها هاوشته توقعت شي عادي ماتوقعته بيقولهم كلام كذا
الجادل : ليتها اهبدته بشنطتها
سلطانه وهي تبي تهون عليها : عادي لاتتفشلين فالنهايه هم جايين وعارفين ان الديره كذا
البندري وهي تتقهوى : ايه صح وش بيتوقعون مثلًا
فهده ابتسمت : بس يعتبر انها عدت
سلطانه بتأفف : ابوي اول مارجعنا من المزرعه قال معتس جوال ولا لا وقال لامي فتشي غرفتها وامي اسفهته
فهده : انا ابوي ماواجهني للحين بس كلهم يدرون ان مامعي جوال
البندري بتأفف : اكيد نيافوه بيزعجتس عشانتس معي وبيقول بتأثر عليتس!
فهده : لا ماتوقع نيّاف مب كذا صح حريص وعصبي بس هو وسيف وفهاد متفتحين وفاهمين شوي
البندري تذكرت بدر : لبى بدوري اللي ورطته بس لازم اعطيه شي مقابل اللي سواه معي
الجادل : بتتعبين يالبندري
البندري دمعت : ياخي بدوري ياخي احبه
فهده : دمعت دمعت يعني صادقه
البندري قامت : يلا بروح لبدر
سلطانه مسكتها : اخاف ابوتس هناك ويتوطى ببطنتس
سحبت يدها وبضحكة جانبيه : وراي عزوتي البدر ومسلط وصويلح!
حصه : الله يخليهم لتس يلا اخذي هديتس وتوكلي وسمي بالله واقري اذكارتس
البندري خذتها : ان شاءالله مب صاير الا كل خير
الجادل بتفكير : بنات مين تتوقعون قالت انهم اكترونيات
البندري وهي عند الباب : اسمعوني زين ! أبحثوا فالموضوع لاني شاكه بوحده متخلفه

طلعت مع الباب وهي تشوفهم يناظرون بغرابه شدت على عبايتها تغطي يدينها ومشت لبيتهم وتوجهت للسطح مع انه حر بس ضاق عليها البيت

نيّاف اول ماطلعت شافها وشاف كيف غطت يدها ومشت بكل ثقه ابتسم بتعجب شلون بتخليهم يتأقلمون مع الوضع غصب نفس كل مره لف على بدر اللي وقف سيارته ونزل وتوجه له ..
بدر : وين ابوي
نيّاف : مشى وطلع من الحاره
بدر : بدون سياره ؟
نيّاف : ايه
وبسرعه : تجهز بعد المغرب بنروح وباخذ معي مسعود وصالح وجيب معك مسلط
بدر : خلاص تم اللوحه جاهزه صح ؟
نيّاف ابتسم : ايه بتعجبك بعد
ابتسم بدر وحرك سيارته واتجه للبيت يبي يناقشها مع ان ماله خلق ..
نزل وشاف امه فالصاله تخيط ولف يدورها ماحصلها وخمن انها فالسطح وطلع وفعلاً كانت موجوده , ينقهر اذا انقهرت ويحزن اذا حزنت البندري كانت بنته اكثر من انها اخته يحب مسلط وصالح لكن وجود اخته بينهم شي حلو ويعجبه! يفرح كثير ان له اخت ومب اي اخت اخت نفس البندري ذكيه , قويه , تعرف مصلحتها , اي شي تسويه يحس انه صح
كلها على بعضها فخر بالنسبـه له ..
ابتسم من شافها سرحانه ارتكى على الجدار وتنهد وهو يقول : دايم اتمنى اول مايرزقني الله يرزقني ببنت  وتكون نفستس واسميها عليتس بعد
لفت ووقفت البندري بفرحه بوجوده وتوقعت انه بيعاتبـها على اللي سوتـه ودها لو يهاوشها بس لا يعاتبها لكن هالمره غير ماقالها شي يدري انها متضايقة ومايبي يزودهـا عليها وبداخلها ماتقول الا "اخخ ياكثر الحب يالبدر" قربت وضمته وباست راسه وبأسى : ادري اني اشغلتك اليومين هذي لكن اطلب منك العذر والسموحه
بدر مسك يدها وجلسوا بظلال الجدار : شوفي يالبندري انا مب كل مره ببقى لتس حيّ , فيه مسلط وصالح مايقصرون لكن ابيتس تعرفين اللي لتس واللي عليتس انتي غاليه عندي ومارضى انتس تنطقين ولا تنهانين ! انا ماعتبت خطوه من الديره ولا توظفت عشانتس ولا علي منّه لاني لو اصمل واروح وانا ذاكرتس وراي بخاف عليتس كل دقيقه! خيالي كله يدور على مشهد واحد انتس تعاندين ابوي وهو يضربتس ! يعني ابيتس تركدين هالاسبوعين مابقى شي واخذتس معي للرياض تكملين دراستس!
البندري بحب : ابشر ماراح اكلمه ابد ولا اعانده حتى لين نطلع من ذا الديره
ابتسم لها وهو بباله كيف بياخذها معه بسهوله!