لاتزعل الدنيا ولا تزعلك يالظبي العفر ان كان ما جازت لك الدنيا ندور غيرها

"١٤"

كان يستمع بهدوء وخجل من تصرفاته لين اخر نقطه وباندفاع :سيف كان معك حتى لو زعل زعله خفيف! فواز وعلوش وضعهم معروف وبدر بيتناسى لان اخته فالموضوع ويحس ان معه حق وفهاد ماغلط عليك أبد بس غيرهم نا..
قاطعه نيّاف :غيرهم ينسى لاني مادققت بتصرفاته ابد ولا حزت بخاطري! مثل ماقلت لك انا عارف كل اللي بيصير لي من البدايه انت زعلك كبير بديته مني ثم كملته بنفسك ولاقدرت تنتهي من الاول عشان تستقبل الثاني !! هادي كلهم حسسوني ان الموضوع خلص من بعد ما عرفوا الحقيقة الا أنت صح لامو أنفسهم لكن تذكروا انهم مايدرون واعذروا انفسهم وقبلها اعتذروا مني! خلك نفسهم لان انت بيدك تكسر الهروب اللي بينا مب انا ولو ما أنت عزيز وغالي ماجيت ووقفت المهزله ذي
هادي هز راسه وهو يحك طرف حاجبه :قلت سامحتني؟
نيّاف بعبط: لا اعتذر قبل
هادي بفشله :العذر والسموح..
قاطعه وهو يضحك وهادي فهم اخر شي ودفه بكتفه :غثيث!
نيّاف كمل يشرب الماء ومن بقى من خفيف رماها بوجهه وطلع وحس بحركته وراه وركض من الجهه الثانيه وهو مصدوم من جدية هادي بأنه بيكب عليه الفنجال اللي اخذه وقت يشرب الماء حقه ، أصطدم ببدر اللي معه أغراض وطاحت :ابن عقاب!
هادي واللي طاح منه الفنجال مع حركته وبسخرية :راحمك الله يالخكري
نيّاف رفع حواجبه : ها ها بدينا نغلط!!
بدر وهو يجمع أغراضه: تحسست ! قوم قوم جمع معي بس اغراض التأسيس الله حسيبك
هادي وهو يحاول يكتم ضحكته وما قدر :تصدق اني اقولها له قبل ! بس تحسس اليوم سبحان الله يعني واضحه
نيّاف تجاهله بتمثيل وبدر ضحك باستفزاز لنيّاف اللي صار مقهور من كلمة "الخكري" من بعد القضية .
.
.
نرجع لواقعهم ، انتهوا من الزواج وطلعوا بدري قبل العشاء عشان يلحقون على فعاليات بدر ومسلط ..
فواز ضرب بيده بتأفف من الإزعاج والزحمه ونيّاف ولاهمه ويناظر بجواله ثم قفله وهو يسولف ، علوش كان وراه وشاف الإشعارات حقته بما انه متكي طفشان وبنفس الوقت نيّاف سادح جواله بحضنه تحديدًا على فخذه، فز من شاف اشعار واتس وبأسمها (فهده أختِ) !
فواز اللي جنبه وكان متقدم ويسولف مع نيّاف وفهاد: علوش عطنا رأيك وش السواه
لف عليه من للاحظ سكوته :انت خير مطيح عيونك بجوال نيّاف
علوش طيّر عيونه وهو يتمنى تجي إشعارات بعدها عشان مايدري نيّاف ، ونيّاف لف من سمع إسمه
وفواز فهم لان فهده كانت مستمرة ترسل فعالياتهم بقروب اخوانها وخواتها وقام حول مقطع من محادثة قروبهم لنيّاف ، نيّاف ماكان فاهم شي لان باله مشغول  بشي ثاني وفتح جواله بهدوء وبعد ثواني:فواز وش مرسل انت

فواز من الربكه ماكان يدري وش ارسل تنحنح وهو يفتح جواله :ايه شوفه
نيّاف :هذا مصوره انا ومرسله لقروبنا يالفاهي
كتم ضحكته علوش بعز توتره وفواز بداخله يدعي على علوش اللي حطه في الموقف هذا :قلت يمكن ماشفت انت صاير ماتفتح رسايلنا
فهاد بذهول من غبائه :يقولك هو مرسله! صاحي انت
ضحك فواز بقوه عشان يشتتهم وبنفس الوقت ماقدر مايضحك على نفسه وعلوش انفجر معه لين سكته فواز وهو يلوي ذراعه ، علوش بهمس :فكني فكني أرسلت ارسلت
طير عيونه فواز وبنفس الهمس :تتجسس يالمخيس
علوش :ماينقال عنه تجسس هو فاتحه قدامي
وببتسامه :برسل وراها
فواز بخبث ارسل بسرعه نقطه ، وصارت اشعاراتهم ورى بعض وعلوش طنقر وبعصبيه بدون مايقصر صوته :احذف
وبقهر : والله ان تحذف
فواز ضحك ببلشه وهو متوتر من العيال اللي لفو عليهم وبربكه:علوش هد يابابا
علوش بجديه :احذف
فواز بهمس من شافهم لفو عنهم :واذا حذفت الاشعار بيبقى يادلخ
علوش كان بيتجادل معه بقوه بس قاطعه فواز وهو اللي لمح جوال نيّاف وبراحه :ارسلت الله انه ياخذ عدوينك
وتراجع بعيد عنه :ابلشتنا
علوش بقهر :أمش اقرب جعلك الوهن
فواز بحذر :شتبي تبي تفضحنا فالرجال خوينا أستح
علوش ببتسامة بسرعه:برسل بعدها ابيك تشوف أشكالنا
فواز كتم ضحكته وبهمس :حسبي الله ونعم الوكيل بس يعني وش دعوة زواج على غفله ولا إشعارات
علوش وهو بيرسل بحماس: فعاليات الزحمه شعرفك
ماكمل وهو يلصق الابيات اللي نسخها من تويتر للواتس الا وانفجر فواز ضحك لدرجة لفو عليه كلهم مره ثانيه ، وعلوش ناظره وابتسم اعتقد انه يضحك على الأبيات اللي كلها مدح في نيّاف بس أدرك من شاف جوال نيّاف جاه إشعار من فهاد وبدون شعور فز وكأنه تحمس :فهاد اح.
فواز قاطعه وهو يلف عليه بكل جسمه ويضحك بقوه ويصرخ بوجهه يحاول يقاطعه ونيّاف باستغراب ضحك : بسم الله شبلاكم
فهاد ببتسامة واسعه: انهبلتو؟
نيّاف ناظر ابتسامة علوش من ضحكة فواز بعد صرخته بفهاد ونظراته كل شوي لجواله ، نيّاف وده يفهم السالفه ناظر جواله ثم رفع عيونه لعلوش وعلوش من اللخمه سوى نفسه سرحان ، وهنا فواز ماتحمل ابد وضحك زيادة ، فهاد أبتسم بتعجب اكثر وغصب عنه ضحك معهم بدون مايدري وش السالفه ونيّاف رفع حواجبه ونزلها وهو أبتسم ولف عنهم وفواز لازال بنوبة الضحك اما علوش تو يستوعب وهو للاحظ أنه فعلًا يحبها لكن قبل شوي غير انه يحبها وغار من حركة فواز الا انه تحمس يلحق على الأشعار وراها وبعدها استسلم للضحك مع فواز .
.
.