من صحت وهي قالبتها دراما عشان البرد ودخلت غرفتها وبهدوء:توقعتك طلعت
نيّاف بنص الغرفه وبحضنه اللاب ويناظر وجهها بتفحص :لاعندي شغل بخلصه هنا
لفت وهي تشتت نظرها وسحبت شنطتها تبي تطلع برى تلبس هناك , تنهد :شسالفه مخليتهم بالشنطه مستعجله على الروحه يوم الخميس ؟
البندري بغت تقول ما امداني بس اكتفت وبهدوء :مالي خلق ارتب وانا فالنهاية برجع
سكت ونزل راسه وطلعت هي بحزن وراحت للبنات ..
بعد دقايق شاف إشعارات رسايلها انهم خلصوا ومتى يطلعون سحب على الرسايل يبيها تجيه تقوله بنفسها عشان يشوف لبسها وشكلها ,اندق الباب وعقد حواجبه :ادخلي
فهده طلت عليه ببتسامة :صباح الخير ,خلصنا متى نروح
نيّاف تغصب الابتسامة وهو عارف انها ماتبيه يشوفها :صباح النور عطيني ٥ دقايق وقولي للبندري تجيب لي قهوه
فهده :تبي اجيبها لك انا
نيّاف بسرعه :لا لا البندري
وكمل بترقيع :زوجه على الفاضي
ضحكت وراحت تقولها وهو كل شوي يلتفت للباب!
مرت دقايق وبعدين دخلت أبتسم بسرعه على شكلها وهي عارفه كل شي بس سوت نفسها غبيه مدت الكوب وهو اخذه وحطه على جنب ورجع يناظرها وبسرعه وبتوتر:متى بنروح
نيّاف بتفكير :متى تبين
البندري :الحين نبي نلحق نشوف وين بنختبر
ومشت تبي تطلع ولفت وهي تشوفه يقفل اللاب ووقف بسرعه واخذ مفاتيحه وجاء وراها وباستغراب :شفيتس
نقلت نظرها للقهوه :فنجالك؟
ابتسم بورطه :برجع اتقهوى اهم شي اختباركم لاتتاخرون
جات بترد بس مسك شعرها :وش ذا الزين
سحبت الباب :مشينا يلا
ضحك وسكت اهم شي شتتها عن موضوع القهوه!
وهي مقهوره منه وسحبت عبايتها ولبستها وراحت للبنات :يلا
فهده :غريبه توقعت بنتأخر عشان قهوته
البندري :سيطرتي نسيتيها؟
ضحكت وكملت سلطانه:لها شهرين تورينا ذالسيطره وهي فالنهاية مسطره
لبست نقابها وهي تضحك :يلا يلا لانتاخر
الجادل :تعرفين تلبسين نقابتس ولا نلبستس؟
البندري :تضحكين على رجفتي! أوكي بس
الجادل بضحكه :بالميكب والشعر ماتحسست سبحان الله !
مشوا طالعين وركبوا,البندري قدام والباقين ورى كالعاده ,لف على يدها وشافها لازالت ترجف شغل المكيف الحار :حطيها قدامه
سوت مثل ماقال ,وابتسم على شكل يدها وبشرتها ومناكيرها مايعرف سواليف البنات بس اللي يعرفه انها انيقه وذوق وكل شي عليها يعجبه !
تأفف من الزحمه وهي تقول :شغل طلال مداح ابي اصور اول اختبار ومروقين
فهده :الا قولي اختبار وترجفين وين الروقان وشوي تبكين علينا
البندري بزعل :اوكي
نيّاف شاف الزحمه واخذ الطريق الثاني:اشبكي بلوتوث يلا
ابتسمت وهي تصور وفهده تضحك عليها وعلى سناباتها المهزوزه!
بعد ٣ ساعات..
تو مقفل من البندري اللي تتحلطم عليه من البرد وتقول انهم خلصوا , حرك ورد على اللي يتصل فيه :نعم
بدر: ينعم عليك وش تسوي
نيّاف :اللي اعرفه ان غلط تستخدم الجوال
بدر :انت ودك
نيّاف ضحك :تفضل امر وش تبي
بدر :وينك؟
نيّاف :والله تو اختك متصله تقول نيوفي تعال للجامعه طلعني
بدر بغيض :وبعدها وين بتروح
نيّاف :اذا هذا من اول يوم شكلي بحط لي مدير اعمال تتواصل معه يعطيك جدولي كل يوم
بدر بصبر :اخلص
نيّاف: نعم زوجها وش تبي؟ ترا ساكت عن حركاتك عشانها ولا انت ماتسوى شي
بدر :ما اسوى شي!
نيّاف ببتسامة طويله :شكلك تغار علي بعد ابلش يانيوف الاخت واخوها بيذبحوني
بدر :تعقب ارفع علومك وحطهم بالبيت وانقلع لدوامك
وقفل بوجهه وضحك نيّاف وهو يرسلهم انه برى.
ركبوا وفك الكيس وهو يضحك على بدر..
البندري بسرعه وببحه :تضحك على رجفتي انت ! مين باقي ماضحك بعذرك
وتنهدت :حتى القلم ماعرفت امسكه
تنهد بحزن وسحب يدها ولبسها القلفز الشتوي اللي شاريه لها , ابتسمت بسرعه على حركته
فهده :الله يرزقنا
رفع راسه يطالع على البندري بصدمه ماتعود خواته يقولون كذا قدامه والبندري ناظرته باستغراب بس هو ماقدر يلف على فهده اللي رقعت بسرعه :اقصد القلفز نفسه
ابتسم وحذف الكيسه عليهم :جايب لكم كلكم
شحت بنظرها الجادل للشارع وسحبت على فهده اللي تتكلم معها وسلطانه مبتسمه على نيّاف والبندري..
أنت تقرأ
لاتزعل الدنيا ولا تزعلك يالظبي العفر ان كان ما جازت لك الدنيا ندور غيرها
Romanceثاني روايه للكاتبة " رِهام ال سلطان " لا نستبيح الاقتباس او النقل وحفاظًا على حساباتكم من البلاغ وانتهاك حقوق الملكية الفكريه لدى الكاتب حساب الكاتبه انستا : @twqxz_ تويتر : @rsaieu
