لاتزعل الدنيا ولا تزعلك يالظبي العفر ان كان ما جازت لك الدنيا ندور غيرها

"٢٠"

تسند بي أنا أصدق من ظنون الخايف الهاقي
‏وتعااال موطنك صـدري اذا حسيت بالغربة .

دخل بسيارته للديره اليوم اجازته بدت ويالله مرت الساعات عنده بعد معرفته بوجودها بالديرة ! مرّ الكافيه وكان مقفل استغرب ورجع يتجه لحارتهم وتحديدًا بيتهم !
سلم على امه وصالح وراح ينام مرت كم ساعه وصحى من رنين جواله وهو يتأفف ورد بسرعه :هلا
عبداللطيف :نايم؟
بدر عدل نبرته :صحيت
عبداللطيف :انت فالديره ؟
بدر :ايه امر
عبداللطيف :مايامر عليك ظالم
وكمل بهدوء :انا مشيت اليوم الصباح للرياض زوجتي تعبت فجأه ورحنا المستشفى وخواتي ببيت نيّاف وابي اوصيك عليهم اذا مافيه كلافه هم ببيتهم وماناقصهم شي لكن احتياط الليله تكون عندهم وكم ساعه واجي انا
بدر صحصح وهو يعدل جلسته ويحاول يرتب كلامه: ابد ازهلها تم!!! وماتشوفون شر والديره امن وامان لا تشيل هم
عبداللطيف :الشر مايجيك ، ماتقصر يابو عقاب لكن الحرص واجب
قفل وهو مستغرب مايدري ليش جايين ونفس الشي شفيها سلطانه؟ اكيد سيف والبندري مايدرون عنها! لان الخبر للحين ما انتشر

" بيت نيّاف بالديره "

ورد بقلق :هناي طول وقتك نوم اصحي
هناي فزت ولفت :وش ؟ ردوا عليك
ورد :لا باقي بس عبداللطيف يقول نزيف خفيف بس ماكمل قفل بسرعه
هناي تأففت :الله يبلشك كل مازانت الجلسه سحبتنا للديره ! وتنهدت وهي تفتح جوالها تشيك على الواتساب:الحين وش وضعنا اكيد هنا خطافين وحرامية ويحبسونا ونتربى بديره ثانيه عاد ليت ننخطف هنا

قالت هناي كلامها بعشوائية وبدون جديه بينما ورد خافت صدق وبداء يدخل ببالها هالكلام ، وتذكرت سالفة اختها ونيّاف وتذكرت الثور وكل شي يخوفها جاء ببالها
لفت هناي من صمتها :شفيه؟
ورد :مافيه شي ارجعي نامي
هناي رجعت لمخدتها :حمدلله والشكر
ورد بعد دقايق تذكرت ولفت :اليوم فيه صيانه صح
هناي :إيه وبكره بعد !
وبضيق: وموضي هذي اللي موظفتها ترا فاشله يعني
ورد :محد وافق يجي يتوظف هنا مالنا الا ذولي ترا
هناي :لو دورتي زين بتحصلين
ورد تأففت :عادي بنكون معهم بمكالمه لين ينتهون اهم شي الحين سلامتنا
هناي بتعجب :ليش وش بيصير لنا
ورد :اقصد يجون أهلنا على الاقل ناخذ راحتنا ونروح ونجي
هناي : ندور سواق يوصلنا!
ورد :تمزحين حتى توصيل طلبات مافيه تبين سواق
هناي :طيب اخو البندري هذاك قولي له يمرنا
ورد برعب : لا فشله استحي
هناي :ترا بزر وش فشله موب تقولين بزر! ابو ١٧ سنه
ورد وهي ببالها متوقعه تقصد بدر كملت بترقيع :فكرت وحسيت كبير بس مدري بدرس الموضوع
هناي :اخلصي بروح السوبرماركت

_
_

نوب أقول إني معيف وخاطري سامح وطايب
‏ونوب أغني للهبوب إليا اطرقتني "يا عذابي" .

الجادل بخجلها المُعتاد ومن بداء سيف نقاشه بسؤاله الغريب عن اقرب وحده لها وفضوله باتجاهها قوي وبهدوء تمثله هي ردت:كلهم احبهم عادي بس البندري غيير أكيد
سيف: البندري احسها قريبه منكم كلكم
الجادل هزت راسها بتأييد ، وهو قطع هالصمت من وقف عند البقاله ياخذ اشياء خفيفه لهم بعد ماتغدوا من ربع ساعه ..
رجع وهو يحط الكيس بينهم ويحرك :شيلي النِقاب الخط فاضي
الجادل :لا عادي
سيف طلع اللي بالاكياس ووزع كل شي وهو يفتح مشروبه ويفتح كيكته وياكل :على راحتس بس اكلي معي وحلي
الجادل وهي تبي تغيير جو لفت ورى تاخذ القهوه اللي جهزتها معها لانها مدمنه القهوة السعودية :وانا مسويه قهوه المفروض تشربها وتترك هذا
سيف نزل اللي بيده :تامرين امر
شتت انظارها وهي تسحب فنجال وتصب له وتعطيه :تسلمين
ندمت انها تكلمت وهي تسوي نفسها مشغوله ولا ردت عليه ، سيف كان يحاول يسيطر على ردات فعله بكل شي عارف انه خفيف معها لكن بكل الحالات يقدر اي شخص قدامه سواء هي او غيرها انثى او ذكر سيف شخصيته حلوه ويعطي كل احد قدره وحقه!