لاتزعل الدنيا ولا تزعلك يالظبي العفر ان كان ما جازت لك الدنيا ندور غيرها

"١١"

"بيت ابو سيف".
جهزت شنطتها وتركت عبايتها فالصالة وهي تجهز قهوه تنتظر سيف ..
دخل ابو سيف :على وين!
سلطانه ابتلشت وهو اللي له فتره يقول مافيه روحه وللحين مابلغت سيف بالموضوع هذا , ابتسمت بهدوء :باقي يايبه ٣شهور وتجي الإجازة وبرجع اكيد
باعتراض وبعصبيه :الدنيا قايمه فوق راسنا وانتي بتروحين هناك ترا ماني راضي على روحتس من البدايه فهده أخته بالرضاعه والجادل منجبره بس انتي!! تبين تضيعين هناك
سلطانه تنرفزت :وين اضيع سيف أخوي معي وتا
قاطع نقاشهم الحاد صوت الضيف اللي جاي له وطلع له يرحب , راحت بضيق تجهز قهوتهم وهي عرفت ان ابوها يربط المواضيع مع بعض ويحس روحتها للرياض فساد لها وان سيف تاركها ببيت نيّاف بدون مايسأل والحين الوضع تغير ونيّاف ماهو ولد الديره ولا لنا حق نقعد ببيته !!

"الجـادل"
جهزت أغراضها وهي تنتظر وداخلها شعور سيئ من كل شي من ناحية وين بيجلسون هناك ولا بيروحون لبيت نيّاف!! وسيف بيوديهم تساؤلات كثيييره ببالها شافت اشعارات السناب ورجعت تسولف معهم ..
البندري (اذا رجعوا أهلنا من فرنسا بنقابلهم ههههههههه)
سلطانه (ماشاءالله من الديره لفرنسا اتمنى اقفز هالقفزه)
فهده (الا قولي طموح واصرار البندري مخليها توصل للمرحله هذي!! الا غصب تبي اهل مثقفين!!)
البندري (طيب طيب ههههههههه بس تذكري اول ماجينا فالشقه واجتمعنا وقلتِ لي تقبلي ان اهلتس مادرسوا وهاوشتينا انا والجادل على احلامنا)
فهده (ههههههههه وانتي قلتي ما للصعب الا صعب! كفو يابنت طلال!!)
الجادل (صدق ماشاءالله والله طول وقتي متعجبه كيف المعجزات هذي تحصل)
سلطانه (اقول بنت طلال اعطينا الخلطه ببداء أحلامي من اليوم!)
البندري (تبون الصراحه قمطت ام العافيه يوم صار حقيقي واني مب بنت اهلي اللي ماتمنيت اني بنتهم)
سلطانه (انا وسيف لو قايلين اننا مخطوفين على طول بنتأقلم أصلًا)
الجادل (انا شكيت انها انا الصراحه!)..
-
وقف سيف عند باب بيتهم وشاف اغراضها وطلعها بالسياره ودخل يناديها ويخليها تبلغ البنات وعيونه على بيت الجادل ينتظرها وهو متشتت ويفكر كيف يتزوجها وكيف يخليها توافق عليه
"بعد نصف ساعه كلهم بالسيارة وشعورهم غريب , فهده اول مره تحس انها بمكان غريب دايما وجود نيّاف معها يحسسها بالراحه والأمان , الجـادل كالعادة نفس الشعور لكن عدم وجود البندري و نيّاف معها ووجود سيف وصار روحتهم متعلقه فيه أربكتها , سلطانه متوتره من أبوها وموضوعه وهي خايفه تقول لسيف وبعدها يصير بين ابوها وسيف مشاكل ويرجع توترهم السابق.

_

قال أنت وش فيك لا حاضر ولا غايب
‏قلت المقادير . . لا منها ولا عنها

‏لا تمتحني وأنا من الفضفضه تايب
‏وغاسل يدي من كفوف الناس وألسنها

‏من قلبي الورع حتى عقلي الشايب
‏عفت الأحاسيس ظاهرها وباطنها

‏اللي رحل وش خذا والجاي وش جايب ؟
‏" والله مدري ! لكن الله يزييييينها "

قرت تغريدته وهي تتنهد قطع تفكيرها رسالة بدر (بمشي للرياض معي أبوي ومامعي شاحن تطمني اول ما نوصل بنمرتس)
أستغربت انه بيجي مع بدر توترت أكثر وهي تتجه للمطبخ وتسوي الضيافه واي شي يجي ببالها تسويه من معجنات وحلويات .