توالفت قلوبنا في عز المزوح وفي عز رعشه خوفي استأمنك

البارت الرابع

في سياره مساعد
فهد كان عينه على توأمه فهده كيف تحاول تجذب انتباه ابوها بالسوالف وهو مو معطيها اهميه تعود يشوف ابوه كذا وكأنه ما عنده عائله ويستثقل كل واحد فيهم
نطق مساعد بعصبيه : خلااص انطمي صدعتيني بسوالف الكفار ذي
فهد : ابوي تعوذ من الشيطان بنتك تسولف معك وش مزعلك ؟
مساعد : لا تعال حاسب ابوك بعد ياللي ما تستحي اذا بتتحمل كثره الحكي اسمع لها انا ماني مستعد !
سلطانه وهي تتعبث بجوالها : كل مره تهاوش عيالك ونفس الروتين خلاص
مساعد : انتي خليتس على جوالتس احسن
فهده ابتسمت بضيق وهي تشوف محاولاتها بأبوها بكل مره تبوء بالفشل
حس فيها فهد بحكم انهم تؤام ولف لها بوجهه البشوش : تعالي ياعيوني ان ما سمعتس اسمع لمن ؟
فهده ضحكت وهي عارفه حركه فهد وعشان ما تحسسه بضيق اكثر تقدمت له مع جوالها وصارت توريه وجه الممثل التركي : تخيللل ان هاذا الخايس يخون هذي الجميله ولفت الصوره وكانت صوره ممثله مشهوره
فهد : والله ماله داعي وقرب من اذنها وهمس : العن امها محلاهااا
فهده ضربت راسه بخفه : ولد عيببب لا تضيع علومك بس
____________________
في سياره عبدالعزيز ( ابو هناي )
عهد متلذذه وهي تاكل ضربت هناي كتف ابوها وامها  بخفه وغمزت وابتسمت بخبث وهي قاصده تحرج عهد : اييي كيف اللبنه حلوه ؟
عهد تذكرت الموقف وغصت وهناي تضحك وتضرب ظهر عهد اللي ابتدت تكح واعطتها ماي
عبدالعزيز وهو كاتم الضحكه : بسم الله عليتس صحه صحه
عهد ناظرت ب ابوها وبعتب: حتى انت !
عبدالعزيز وهو يمثل الغباء : وش شدخلني انا ؟
عهد : حتى انت كاتم الضحكه اعرفك
هناي وهي ترفع حواجبها بلعانه : بس والله شكل اللبنه مره لذيذههه
عهد : سكتوها مني ذي !! وبعدين الغلط عليه خير يقول كذا وشوي ويقلط علينا هو والسمع ماشاءالله !
سلوى بدفاع : اي اي صادقه بنتي ماعليتس منهم خلف هو المخطي مو انتي
هناي : امي وين الله يصلحتس وهي صوتها ... كملت وهي ترفع صوتها بخبث : الأصصصممم بيسمعهههه
عهد قامت فيها ضرب
هناي بصراخ : عز انا في وجهك
عبدالعزيز اعتلت تضاحيكه وهو يمسك ذراع عهد : بسس هي في وجهي قالت خليها !
عهد لفت عليه بقهر : احلف ؟ وانا مو بنتك بعد وهي تطقطق علي من اليوم ماقلت لها شي !
حضنها وهو يضحك وخفف من سرعه السياره لحظتها وتقدمت هناي : وانا بعد ابي ابي وسعي لي عهد خذيتي الحضن كله
سحبها عبدالعزيز لحضنه : بس انتي يالسوسه خلي عنقودتي
كانت نظرات سلوى تعبر في هالمنظر تطالعهم بحب وهي تدعي بداخلها ان الله يديم هالمحبه وما يفرقهم ويديم عبدالعزيز ذخر وسند لبناتها ولها ، انتبه لها عبدالعزيز وقال : تراتس بنتي بعد تعالي
وفتح لها ذراعه ودخلت معهم بالحضن
____________________________
في النعيريه بعد مرور ثلاث ساعات
عقاب : اقبلنا على المغرب والعيال محد منهم وصل حد يعرف وينهم ؟
حمد : والله انا اخر مره كلمت فيها خلف الظهر وقال انهم في الطريق
حاتم :  طيب اتصل عليه مره ثانيه وشوف وينهم
رفع السماعه حمد وثواني وصله صوت صاحبه واخوه واللي بصوته وتراحيبه يرد روح حمد
خلف : ياجعلها ترحب ملاايين ، شكلك مشتاق لي بالحيل امرني ؟
حمد : تبقى ، انكتم يالخايس مقدر انكر اني مشتاق لك بس جدي يسأل عنكم
خلف : خلاص ١٠ دقايق وحن عندكم وابشر باللي يزعجك دامك مشتاق لي
حمد : انت تعال وبعدين نتفاهم
خلف : نتقابل على خير
- انتهت المكالمه -
طمن حمد الجد وطلع من المجلس ودخل البيت : يا نوي...
نوره لفت وهي بكامل زينتها وكانت لابسه لبس بني مخصر مبين فيه تفاصيل جسمها وحاطه مكياج خفيف يبرز ملامحها وشعرها منسدل على ظهرها
حمد بإنبهار : بسم الله عليتس تبارك الرحمن قريتي اذكارتس ؟
نوره : دام قلت هالكلمه يعني شكلي حلو الحمدالله رضيت الحين
تقدم حمد ومسك وجها بيدينه : انتس حلوه بكل الاحوال ، اسمعي اقربي من الباب الخلفي بعطيتس صحن حطي فيه تمر
نوره : على ذا الخشم
باس حمد خشمها : ياجعلني ما اعدمتس
طلع ولحقته نوره وجهزت له التمر ومدته له
حمد : نوير تراهم قريبين علمي جدتي
مر الوقت واعلنوا عيال واحفاد عقاب وصلوهم بدق البوري واعتلت التراحيب وطلع لهم الجد عقاب بعصاه وعلى يمينه حاتم وعلى يساره حفيده حمد اللي كان يرحب فيهم الترحيب الحار ويطلق عده طلقات في الهوى تقدموا الأعمام للجد واجتمعوا عليه وباسوا راسه وحمد ركض لرفيق دربه خلف وحضنه بقوه: يامرحببااا بهالشوفه
خلف وهو يبادله الحضن ويشد عليه : الله يبقيك
بعد منه وكمل يسلم على عيال اعمامه وشاف النسوان وراهم وكل وحده من البنات متغطيه وقال بصوت مرتفع : النسوان جهه اليسار مكانهم جدتي منيره هناك تستقبلهم
مشوا البنات بجنب بعض وقمرا بحكم انها ما تعودت تتغطا ف غطت وجها بشكل مهمل وطاحت منها الغطوه ولمحها حمد ولمح شامتها اللي تحت عينها وصد
قمرا بهمس : صح اني ما اعرف اتغطى ولا تعودت بس ما تنكبيني وتطيحين قدام الرجال !
ديم سمعتها : تكلمين من يالدايخه ؟
قمرا : اكلم نفسي وحظي النحس
الجده منيره على بعد خطوتين منهم : يامرحبااا ببنياتي ياهلااا
ووراها كانت نوره تستقبلهم بإبتسامتها وبعد ما انتهوا من السلام وجلسوا داخل فزت نوره تمرر القهوه وتحط لهم من الحلا
نوره : بناتت ياويلكم ان سحبتوا على الحلا اللي مسويته ولا وحده منكم تردني وتقول دايت من الحين اقول لكم ها !
ديم : شوفوا بتجلطني احنا مشتاقين لها وهي ذابحها السنع تعالي اقعدي بس
فهده: اقول خلي عنتس الحلا انتي الحلا كله
ابتسمت بخجل ووزعت الحلا عليهم وصبت لهم من القهوه وجلست بين عهد وقمرا
عهد وهي تتأملها : احلويتي ياربي بسم الله عليتس جميلهه
البنات انفجروا يضحكون من خفه عهد وكيف تكلمت فجأه
قمرا بضحك : يما اذكري الله
عهد ضحكت بفشله : ماشاءالله بس صدق تهبلينن
نوره: يابعد روحي والله انتس ماخذه الزين كله وبتغطين علي بعد
قاطعهم صوت حمد وهو ينادي ب اخته فزت نوره وطلعت له
حمد وهو ماسك بيدينه الثنتين الدلال وعروق يده بارزه وبحده : كان نمتي وينتس ؟ امسكي الدلال ونظفيها وبعدين وين الهيل ! من ماخذه من المجلس ؟؟
نوره : يالمشخاط اركد انا اللي اخذت الهيل عشان ازين القهوه للبنات
( المشخاط يعني الكبريت تناديه كذا اذا هو معصب )
حمد بعصبيه خفيفه ورفع حواجبه : انا مو حاط هيل لمجلس الرجال وهيل لكم ؟
نوره ببرود وهي تطالعه: صح بس خلص حقنا واخذت منكم
مرت لحظه صمت ...
حمد صرخ : الدلاللل نظفيهااا وش فيتس تطالعين وجهي الرجال جاوا والقهوه والشاهي ما بعد جهزوا اعجلي
فزت نوره وراحت عند المغسله وحمد حصل الهيل قدام عيونه على الطاوله اخذه واخذ الدلال ورجع للمجلس ونوره رجعت للبنات وجلست بهدوء وهمست وهي تناظر ماجده : بنات شفيها جالسه لوحدها ليه ما تجي تقعد معنا ؟
هناي : يوههه ذي ماجده الغرور راكبها هي واخوها جابر
ديم : حرام عليتس احسها ما تعرف تتعرف على الناس
ماجده حست انهم يتكلمون فيها وناظرتهم بإستحقار وصدت
البنات بنفس الوقت القت عيونهم ببعض والصدمه معتليه وجههم
ديم رفعت يدها وبضحكه : اسحب كلمتي
نوره : ماعلينا المهم وش رايكم بالحلا ؟
فهده : لذذيذذ تسلم يدينتس
عهد بإعجاب واضح على ملامحها : وااههه لازم تعلميني الطريقه
ابتسمت برضا وهي تسمع كلامهم : ياجعله عافيه ياحبايبي
-
ب اقرا تعليقاتكم شاركوني الاحاديث...
قرائه ممتعه وإن شاء الله يعجبكم ومالكم الا البارتات اللي تجمل عاد التفاصيل الحلوه بتجي وعاد باقي اشياء كثيره 🤍