توالفت قلوبنا في عز المزوح وفي عز رعشه خوفي استأمنك

البارت التاسع عشر

حمد سحب خلف لبرا وبعيد عن العيال : اي تكلم اسمعك
خلف: مافي شي اعلمك فيه
حمد : تراني معصب منك من اللي صار مع هارون تجي الحين تسوي غبي على راسي ؟ انا ودي تتكلم بدون ما اسألك اسأله كثيره واعتبرك غريب وتنحرج بس الظاهر انك تبي كذا
سكت حمد لثواني ينتظر رد خلف اللي عيونه كانت متشتته وتتصدد منه : يعني مارح تقول ؟ طيب الحين ليه لكمت الرجال يوم جا يخطب ؟ وانا وانت نعرف من كان يبي زين ، وكلمتك لا يوجعني وانت كنت على علم ب وش جاي الرجال عشانه
خلف : حمد انا اعتبرك اخ لي وماعندي القوه اني اتكلم في وجهك عن اللي بخاطري وانا مستحي منك في ذا الموضوع وفاهم وش تبي توصل له بكلامك وانت فاهمني لا تلومني
حمد عقد حجاجه وميل راسه يناظر بحال رفيقه: من متى وانت تحبها ؟
خلف : من يوم انكب على ثوبي القهوه وخليتها تطلع لي ثوب لمحتها
فز من شاف صدمه حمد وكمل : لكن يشهد الله علي مو بقصد واخسي اناظر فيها وانا متعمد انا ياحمد احبها من صادق شعوري ولا بغيتها بنيه خايسه وانت تعرفني ومابي اتكلم لك لان مدري وش رده فعلك ولا وش بيقول عمي وجدي
حمد ابتسم من توتر خلف وهو يتكلم وضرب كتفه بخفه : الحب مهوب عيب ياولد عبدالله اللي مزعلني اني اقرب واحد لك ولا تكلمت عن ذا الشي لي والرجال توني ادري عنه وانت عساك عالقوه ماخليت فيه عظمه الا وكسرتها وشهادتي فيك مجروحه واختي ما بتلقى احسن منك رجال من ظهر رجال
تقدم خلف وحضنه: الله يجعلني اكون قد الهقوه بس طالبك ما تكلمها ولا تقول لها شي انا ابيها حلالي وام عيالي وزوجتي وبتقدم وبجيكم من الباب ماراح ادخل بطريق فيه ردى لكن ياحمد عطني وقت مو الحين
حمد: فاهمك وفاهم شعورك ووضعك خذ وقتك لكن لا تبطي عنها مهوب كل الخطاطيب نصدهم وانت تعرف جدي
خلف : تكفى ياولد عمي
حمد: ابشر بسعدك اختي لك وانت لها بس انتظر خطوتك لابوي
ابتسم خلف بحب وهو يتخيل ذي اللحظه وضحك حمد: اوهه الحب ماسوا فينا خير اثرك نفس حالتي
خلف ابتسم وسع مبسمه وضحك بصدمه: احللففف؟ من تعيسه الحظ ؟
حمد : اذلف بس متوقع اني اعلمك ؟
خلف : ها شرايك والله ما ندخل الا وانت معلمني
حمد: اهجد ولا ترا مابعطيك اختي
خلف ضرب كفه على فمه: مابي اعرف انقلع تهدم مستقبلي وحبي
___________________________
عند البنات
فهده بهمس لديم : قمرا قالت لكم وينها ؟ مو عاجبني وضعها احسها متضايقه هالفتره
ديم : اي مالقيتها برا حتى يمكن دخلت بيتنا
فهده : شدعوه راحت بنص جمعتنا بدون ما تقول لنا شفتي انا اقولتس انها في شي مزعلها
ديم: جربي تكلمينها انتي قريبه منها مره يمكن تعلمتس
فهده : تقولينه ؟
ديم : اي ماعليتس
نورة ابتسمت : بنات ب اقولكم شي بيصدمكم بس في احد يحب الخيول هنا ؟
ماجده بحماس : الله ومن مايحب الخيول تدرون كنت داخله في الرياض نادي فروسيه
عهد : العبب يالخياله
ماجده رجعت شعرها ورا : اعجبتس
ديم : وقمرا بعد تعشقهم
نورة : تدرون ان جدي عنده اسطبل خيول قريب من المكان
صرخوا البنات وصفقوا بحماس ، العنود : احب منظر الخيول بس اني اخاف منهم
عهد : نوير تكفين نبي نروح
نورة بصدمه : الحين ؟؟
هناي: اييي تكفيينن كلمي حمد يتوسط لنا عند العيال الباقين ونطلع كلنا
نورة : بعد اللي صار اليوم احس صعبه بس بكلمه عشانكم ، لحد يتحمس ماعرف وش رده
ماجده : املي كله فيتس
نورة رفعت ظهرها بثقه ومشت خطوتين ولفت للبنات : يمااا هو معصب اليوم
تعالت ضحكاتهم ونطقت العنود: شوفي اذا رفض خليه لا تزعجينه تعرفين نفسيته اليوم كيف كانت
هناي ناظرت العنود بقرف وصدت ، عهد وهي تصفق بتشجيع : يلا يابنت حاتم تقدرين تكفين كلنا في وجهتس ترا
نورة : بنت لا تخليني اسحب شعره عندكم الحين من الفخر
عهد ضحكت : لا اهجدي اخاف انتي اللي يسحبتس من شوشتس
نورة مشت بخفه وشدت على يدها وسمت بالله وقربت من المجلس وبصوت ينسمع : يا حمدد
دقايق وطلع حمد بخطوات سريعه: شفيتس يا عيون اخوتس ؟
نورة : اشوا منت معصب بزياده
حمد بإبتسامه : لا ماعليتس احنا نسلم من المشاكل ذي عوايد قولي وش بخاطرتس ؟
نورة : اسمع تكفى ياولد ابوي انا كلمت البنات ومافي مجال لكلمه لا مالك الا ترضى
حمد : ماشاءالله خططي على كيفتس عقب عطيني خبر وش سويتي بسرعه
نورة ضحكت : شف انتوا واضح نفسيتكم تعبانه والبنات تضايقوا من الوضع ف قررنا نغير جو ونروح الاسطبل شرايك ياحبيبي ؟
حمد : احلفي ؟ اقول ادخلي بس شايفه الوقت الحين جدي وجدتي بينامون وانتي تبين تطلعون من بيسمح لكم ان شاء الله ؟
نورة : حمد تكفى انا اختك الوحيده وتقول لي لا !
حمد : مفروض احزن ولا وش ؟
نورة تعالت ضحكاتها وحضنته وباست خده: خلاص شوف بنتفق بتجون معنا انت والعيال وكذا ماعلينا خوف ومنها تتنفسون شوي وتتركون العصبيه
حمد سكت شوي وفكر بقمرا وضيقتها اليوم وحزنها ونفسيه العيال المضروبه : خلاص تم بس بشرط محد يقعد كلكم تجون ولا مافي طلعه
انصرف حمد للعيال ونورة دخلت على البنات وماسكه خصرها : يلا كل وحده تجهز بس ترا العيال بيجون معنا لان الوقت متأخر
ماجده : لا يع خير خليهم يجلسون
ديم : يابنتي احمدي ربتس اسمحوا لنا نروح في ذا الوقت
نورة وهي تصفق بيدينها : يلا يلا توزعوا
فهده وقفت مع ديم : انا بروح اشوف قمرا بسحبها معنا
نورة : تسوين خير لان حمد قال كلكم تجون محد يقعد واذا وحده قعدت انسوا الطلعه
___________________________
في بيت سعد
افتحت الباب ديم وفهده افتحت الانوار : اصحى ياحلوو بنمشي
قمرا بنص عين: ههمم وش نمشي ؟ اتركوني انام لا اطلع اللي بكبدي عليتس انتي وياها
ديم رفعت يدها : انا انسحب الباقي عليتس يافهده
فهده قربت منها : امشي الطلعه بدونتس خايسه ترا ان قعدتي قعدت معتس
قمرا : وش عليتس مني انتي روحي الجو حلو
فهده : بتجين معي غصب عنتس بس قبلها بتعلميني وش فيتس ومن مزعلتس ؟
قمرا تذكرت الموقف ورجعت عيونها تدمع: فهده فكيني واطلعي
فهده : لا والله ما اروح
شهقت فهده وكملت : ليه تبكين ؟ يخسي من يبكيتس
تقدمت وحضنت قمرا اللي بدت تشهق وتبكي حاوطت يدين فهده قمرا وخبت قمرا وجها في حضنها ، فهده : تكلمي انا ملاحظه عليتس متضايقه بس كنت انتظرتس تجين تقولين لي بس دامتس طولتي جيتس انا يابعد روحي وش صاير ؟
بعدت منه بعد فتره قصيره وابتدت تتكلم بعصبيه وتنزل دموعها بصمت على خدها
فهده : نعم نعم ووش جاب العنود عنده ؟
قمرا : تسأليني ؟ وش يدريني انا وش تبي فيه
فهده ؛ تدرين لو ما صفقتيه يوم تكلم عنتس كان رحت انا وصفقته
ضحكت قمرا وسط دموعها ، فهده : اي كذا اضحكي يامحلا ضحكتس ماشاءالله
سكتت فهده ومرت لحظه صمت ، فهده عدلت جلستها: قمرا بسألتس
قمرا : قولي
فهده بإبتسامه : تحبينه ؟
قمرا غطت وجها بكفوفها: مدري مدري بس حتى لو كنت احبه ب ابعد وازيح هالحب منه
فهده : ليه احسه يحبتس حتى نظراته لتس بوسط الجلسه ماهي نظرات عادية
قمرا : اهخ شلون احب واحد شك فيني ؟ وشلون احب واحد غيري تبيه وهو يعطيها وجه ؟
فهده لاحظت الحزن على وجه قمرا : يلا يلا طيب قومي تأخرنا بنروح اسطبل الخيول
قمرا : اماانهه ؟ الله يونس بس لا تقولين العنود معنا
فهده : العيال بيجون بعد وهي بتجي اعتقد
قمرا : الله يحفظتس اجل
فهده : خيررر بتقعدين عشانها ؟ والله تجين وبتكشخين بعد وتكسرين عينها وبتجيبين راس حمد وعيونها تشوف
قمرا قامت بحماس: ازهليني عشانتس بروح
تعالت ضحكات فهده : اي كفو

-

قرائه ممتعه 🤍
اهلاً ياحلوين ما وحشتكم ؟🫣
شاركوني ارآئكم وتعليقاتكم ب اقراها بحب ، شاركوني تشبيهاتكم في حسابي انستا : wrii74