توالفت قلوبنا في عز المزوح وفي عز رعشه خوفي استأمنك

البارت الثلاثين

دخل خلف وهم يركض بفزع من صراخ حمد اللي وصل صوته في الممرات: بسم الله شفيك ولد وش علمك ؟
حمد وهو يناظر خلف ويحس انه وصل حده رجع انظاره على العنود اللي وقفت وهي تناظره بصدمه مسك يدينها بقوه ، العنود : اه توجعني فك يدي !
سحبها قريب خلف ودفعها عنده : طلعها طلعها مابي اشوفها مابي اشوفكم كلكم
العنود طاحت بحضن خلف وبعدها من حضنه وهو متقزز منها ومن حركاتها وبحده : وش سويتي انتي ؟ اذبحتس يابنت اذبحتس؟ تشوفين وضع حمد يساعد عشان تعصبينه اكثر ؟؟
العنود بعبوس وهي تمسك يدينه بألم : تخسي
خلف برز فكه بعصبيه ومسح على وجهه : ياربي صبرني
حمد بهدوء : خ.. خلف اخذها وروحوا
خلف : وين نروح انت بعد ؟ تبينا نخليك تستهبل ؟
حمد بدون ما يحط عينه بعين خلف :روحوا السياره بلحقكم
بعد مرور ١٠ دقايق والصمت كان سيد الموقف ، خلف رغم انه شايل بقلبه من حمد الا ان خوفه عليه طغى وصار يناظره ويصد اما عنود بحثت في الواتساب بأسم ( قمرا ) وارسلت الصوره اللي كانت محتواها مسكه يدها ليد حمد ومبين ثوبه اللي اختلط بلون الدم وكتبت تحت الصوره ( الحمدالله تطمنت على زوجي المستقبلي وشكراً لتبرعتس بالدم الله يكتبه بميزان حسناتس ياحبيبي انتي ويعوضتس بغيره😙 ) قفلت جوالها وابتسمت بخبث وصلوا لطريق الحارات ونزلوا العنود وتقدم حمد يفتح باب السياره واستوقفه خلف : على وين ؟
حمد : بروح بيتنا نسيت انه مقابل بيتها ولا تحسب اني بلحقها وبسوي فيه الحرام ؟
خلف نزل راسه : ماتسويها وانت حفيد عقاب ، بس بدري عليك تنزل البيت
التفت حمد وملامح الاستغراب عليه وخلف ماعطى فرصه لحمد يسأل دعس على السياره وحرك الدركسون متوجهه للأسواق الشعبيه
حمد : خلف انت وش جاك اليوم ؟ وين مودينا بعد ترا التعب هالكني
خلف بحده : وش جاني ؟ اللي جاني ان رفيق روحي انطعن ! وبعدين ماهوب انت ما تبي تعلمني اسم اللي طعنك ؟ خلاص نسأل اللي كانوا هناك يعلموني لان صديقي وولد عمي واخوي يرفض يصارحني ويتكلم معي للأسف انه مايبي يشاركني احاديثه
حمد ابتسم بطرف مبسمه : هو ذا اللي مزعلك ؟ وانا ولد ابوي اجل غير الوجهه بنروح لهم انا وانت وب اتوطى في بطنه روح لبيت الشايب هادي عندي مع احفاده تفاهم ثاانييي
خلف بذهول : لا تقووولل هم !
حمد وهو يحاوط راسه خلف بيده ويخنقه بمزح : ومن غيرهم ؟ وبعدين لا تسوي انك شايل بخاطرك علي ترا مقدر ازعلك وانت تعرف
تعالت ضحكات خلف بعد كلام حمد وتغيرت ملامحه للجديه بمجرد ماعرف اللي ضرب حمد من يكون ولا يرضى على حمد مهما صار ، كانت علاقه حمد وخلف تنضرب فيها الامثال في الديره من قوه الترابط بينهم كان حتى زعلهم ما يستمر لاكثر من يوم يتصالحون بعد زعلهم على طول وهذي طبيعه علاقتهم
________________________
في مجلس الحريم
قمرا جلست في الزوايه وهي تهز رجولها بغضب من تصرفات حمد واستغربت من وصلت لها صوت رساله فتحت الجوال وتوسعت عيونها من شافت الكلام والصوره اللي جات من رقم مجهول رفعت راسها تدور بعيونها اذا في احد ناقص وفهمت بإن العنود اللي راسلتها بحكم أن البنات جميعهم موجودين بدون استثناء وحست بشعور غريب يجتاحها شعور يكتم النفس ويزيد الضيق كانت تجهل هالشعور وش يكون تجهل شعور ( الغيره ) همست : حريقه تحرقهم الاثنين انا وش دخلني اتضايق... تدري شلون والله اللي ما هميتوني لو تتزوج وتجيب منها عشره ما حزنت بسببك
سكتت لثواني وسرحت قدامها والاصوات بداخلها كانت تنطق ب : بس حبك وكلامك لي وانك مارح تتخلى عني كله وهم ! معقوله ! تعصب علي وانا اسوي فيك خير واعطيك من دمي بس العنود تمسك يدينها !
عضت شفتها بغيض وغيره لاحظتها فهده اللي كانت مقابلها تقدمت فهده وجلست بجنبها ومسحت على فخوذها بخفه : شفيتس ياكل طوايف اهلي ليه الحلو زعلان ؟ خايفه على حمد ؟
التفت قمرا من جابت طاري اسمه ورصت على اسنانها : يخسي
فهده بإندهاش : بسم الله شفيتس ؟ ليكون رجعتي على سالفه متردده بحبه
قمرا بصوت مخنوق: ليت السالفه كذا ، امشي معي
سحبت يد فهده بوسط المجلس وطلعوا متوجهين بيت سعد ( اب مسعود وقمرا ) ، الجده : يابنياتي على وين ؟
قمرا والضيق واضح على وجهها : قريب ياجده مارح نطلع بعيد
الجده منيره : زين زين وبما ان كلكم مجتمعين كلكم ترا الليله في عشى لسلامه حمد عشى رجاجيل وحريم جهزوا نفسكم والكل بيجي
فهده : ابشري ياجده بنجيتس
طلعوا وقمرا ماسكه ذراع فهده ومنزله راسها وطلعت منها تنهيده بدون قصد والتفت فهده : بسم الله عليتس !
كانت تضاحكيهم تعم المكان في المجلس بعد ما كان البكاء والصراخ مسبب فوضى من خبر حمد المحزن وتبادلوا الشاهي والقهوه والاحاديث وقصايد الجده اللي تطلعها بين حين وآخر والبنات يصفقون بحراره وحماس ابتسمت عهد على المنظر وفزت وهي تحس بضما دخلت المطبخ وصبت لها كاسه ماي بارد ورجعت شعرها ورا ظهرها بتعب وطاحت عيونها على جابر اللي كان واقف برا المجلس ويفرفر بجواله ويدخن ابتسمت بحب من منظره وهيبته وطوله اللي اخذه من خلف ووسامته رفعت الشال فوق راسها ولفته بخفه وطلعت وهي تناظره بتأمل وتفكر بعذر عشان تكلمه تقدمت له بعد ثواني ورفعت ظهرها وبس كانت قريبه منه تعثرت وكانت بتطيح انتبه لها ورمى الزقاره وركض ومسك يدينها ونزل لمستواها وابتسم وهو يحاول يخفي ضحكته لجل ما يحرجها : بسم الله عليتس انتي كل ما شفتس طحتي انتبهي عليتس لا يجيتس شي من كثر طيحاتس
تأففت وهي تنزل كعبها اللي انكسر ولعنت نفسها مليون مره يوم فكرت تجيه حست بالاحراج وتضايقت اكثر من لاحظت نبره الضحك بكلامه رفعت راسها وعيونها تلمع وتمالكت دموعها قدامه ونطقت بعصبيه : وش يضحك ! وانت كل ما شفتك لقيتك تضحك علي ! الشرهه علي اني جايتك ما تستاهل وتسوي نفسك مهتم لي بكلامك الحين وانت بداخلك ميت ضحك وبعدين اترك ذا العفن اللي تسويه ( تقصد الدخان )
جابر ببرود : الصدق تضحكيني وش اسوي ؟ وبعدين انا مو اسوي نفسي مهتم انا مو مهتم فعلاً قلت كلامي عشانتس بنت عمي ومابيتس تتضررين
عهد رفعت حواجبها : يعني انا ما اهمك ؟
جابر هز راسه بالنفي : واسمعي بقولتس عشاني ابي مصلحتس وولد عمتس انتبهي لا تطيحين قدام احد ترا العيال يضحكون عليتس خليتس مثل باقي البنات يعرفون لنفسهم وثقيلين مو انتي كنتس بزر كل شوي تطيحين وتخافين من اي شي
عهد رمشت بثقل وطاحت دموعها : وانت ماشاءالله عيونك على البنات ليه ؟ وتعلمني كيف اتصرف بعد يقال لك انك كامل الحين !
مشت من عنده وسط استغرابه وحس انه قسى عليها بكلامه بس اللي يعرف جابر يعرف انه يهمه نفسه وثقيل ولا يحب اللي يطلع شكله غلط قدام الناس كان بيروح لها بس رفض لانه مايحب يلحق الناس يحب هم يجون له بنفسهم وبالاخير هو يجهل حب عهد له .
_________________________
ورا بيت الجد هادي
هزاع وهو يعض اظافر صبعه : تهقى مات ؟
محمد : مدري ما وصلنا عنه خبر للحين ومر وقت كثير بس مستفز يقهر خله يموت عشان يعرف ثاني مره يحط راسه براس من ويتوب يتعرض لاحفاد هادي
قاطعهم صوت حمد اللي اقبل عليهم : بدري عليكم اموت على يدينكم يا كلاب انا بصير لكم كابوس اطلع لكم حتى بحلمكم مارح اخليكم
خلف بإبتسامه : تحسبون انك بتفلتون كذا بدون عقاب افااا واحنا عيال عقاب ما نعديها لكم
فز هزاع : الظاهر ما كفاك اللي جاك جاي من الموت تدور للموت مره ثانيه برجلينك
محمد وهو يشمر يدينه : حي الله ضيوفنا
حمد وهو يرفع ثوبه ويربطه: من يرحب يبقى
بثواني ركض حمد وهو يلكم هزاع ويرجع يثبته على الجدار : الرخوم تطعن من ورا
صرخ حمد : اما الرجااالل تضرررب في الووجه وتطعن في الوجههه ! حد علمك ولا باقي تبي تتعلمها مني وبطريقتي ؟
هزاع بضحكه : ووش هي طريقتك ؟
حمد لحس لسانه وغمض عيونه بعصبيه : ابشر بها
اما خلف ف لكم محمد في بطنه ورفسه: متخبين ورا بيتكم نفس الم*****
بعد مرور ١٥ دقيقه انتهوا من ضربهم وتنفس خلف برضى وهو يشوف الجرح مغطي وجه محمد والدم ينزل من فمه : تتعرض لحمد ب ادعس وجهك في بيتك واوريك الويل ! اعتبرها تحذير اول ، التحذير الثاني...
نزل وقرب من وجه محمد وهمس في اذنه : ب اذبحك
محمد استسلم لضربات خلف وهو يحس بإنهاك جسمه كله على كثر محاولته لمقاومته كان خلف اطول منه واعرض ويده قويه طاح يد محمد وهو يناظرهم ويحول انظاره على هزاع اللي كان شوي ويغمى عليه من كثر الضرب انتبه خلف لحمد وبإنه ماعاد صار يبصر اللي قدامه بسبب العصبيه سحبه من كتوفه وهو يناظر بعيون حمد : ناظرني حمد
حمد ما كان يستجيب ويتنفس بثقل صرخ خلف وهو يهز كتوفه : ققللتتت نااااظررننييي !
التفت حمد وركز عيونه على خلف اللي نطق : بردت حرتك ؟
هز راسه حمد بإيجاب ، ابتسم خلف وهو يطلع جهاز صاعق كهربائي من جيبه : نخليه ختامها مسك ؟
بادلها حمد الابتسامه وناظره بخبث : افا عليك
تقدم خلف وهو يكهرب محمد لين اغمى عليه وعطى الجهاز لحمد اللي كهرب هزاع وهو يضحك
خلف : حسافه مارح يموتون مع انهم يستاهلون بس بيغمى عليهم ساعات طويله

انتهى ، قرائه ممتعه 🤍
حلويني الاسبوع الجاي عندي اختبارات دعواتكم واعذروني اذا تاخرت بالبارتات ويمكن اقطع اسبوع وارجع انزل عشان الدراسه واذا بغيتوا شي تعالوا حسابي انستا : wrii74
علقوا تعليقاتكم تسعدني اللي يقرون بصمت ترا بزعل منكم وشاركوني تشبيهاتكم في الانستا بعد سيووو متأكده انكم فقدتوني😙