توالفت قلوبنا في عز المزوح وفي عز رعشه خوفي استأمنك

البارت الرابع عشر

اقبلت نورة للدكه وكعاده كل صباح في يدها الفطور اللي احتوى على صحن زيتون ومربى وجبن وعدس وفول ويتوسط الصحن خبز حطته على الأرض وتقدمت للجد والجده وباست راسهم : صبحكم الله بالخير ياجده تراني مالقيت الموقد كنت بجيبه عشان نسوي الكرك في ذا الجو اللي يرد الروح بس مالقيته حد شافه ولا اروح اسويه داخل وارجع لكم
خلف قال بداخله ( والله انتي اللي تردين الروح وتردين للمجنون عقله ) : ايه الموقد اخذناه يوم كشتنا الليل وموجود بالمجلس
الجد : قوم جيبه
خلف قام ومشى كم خطوه والتفت على صوت ولد صغير يصرخ ب اسم نوره وحضنها وكان يوصل لركبها همس : اهه ياذا الورع اللي ماخذ حظي اعنبوك وخر منها
تأمل نوره وابتسامتها وايدينها اللي حاوطت الصغير ونزلت لمستواه وحضنته مشى وهو يتبسم ويحس سرور الكون كله على صدره
نوره : لبيه ياحبيبي وش تبي ؟
فراس : امي تقول عندكم طحين ؟
نورة ضحكت وآشرت على خدها : اي عندنا طحين بس اول بوسني هنا
طلع خلف بالموقد وشافه يبوسها وتوسعت عيونه وبصوت خفيف : اعقب ياذا الورع مايوفر مره يحضنها ومره يبوسها عزتي لك ياخلف
الجده : منهو ولده يا نوير ؟
نورة : ولد ام العنود فراس ناقصهم طحين
الجده : حق الجار على الجار وحلالنا وحلالهم واحد يابنيتي تحصلين الطحين في المخزن عطيهم منه
نورة : ابشري على خشمي
قامت ومسكت يد فراس اللي حاوط اصبعها بيده الصغيره وصادفت خلف اللي خطف نظره منها ومشى للدكه واعطته الطحين وراحت للجده وهي تضحك من ركضه : يامحلاه الصغنون الطحين اكبر منه
الجده : قولي له قبل يروح يقول لامه وبنتها يجونا العصر
نورة بصراخ : فراااسس قول لامك واختك يجون عندنا جده منيره تبي تجلس معهم العصر
فراس وصوته بعيد : إن شاء الله
الجد : افطروا افطروا الاكل لا يبرد
تربعوا وحطت نورة الحجاب على راسها ولفته بخفه على صدرها عشان ما يطيح ويزعجها وهي تاكل سموا بسم الله وافطروا وبين السوالف قالت الجده : ألا يا نوير وين البنات
نورة واللقمه في فمها وبوهقه وضحت على ملامحها: جده شفيتس انتي شفتينا الليل واحنا قاعدين مع بعض ؟ وكملت بهمس : ولا نسيتي عشان جدي موجود وحلفتي توهقيني بروحي ؟
سمعها خلف وابتسم بخفه : ياجدي وش تبيني اساعدك فيه ؟ انا خلصت من الفطور الحمدالله
الجد : رح للأبل عطهم العلف وانتي يانوير روحي معه عطي الغنم الشعير
الجده : اترك نوير تفطر ماكلت شي
نورة : لا لا عليتس بالعافيه انا خلصت
قام خلف ولحقته نورة متجهين للحلال وكان شبك الأبل والغنم بجنب بعض يفصلهم شي بسيط قربت من شبك النياق ونزلت بجسمها تاخذ الشعير وكانت غافله عن الناقه اللي نزلت راسها لها وقريبه منها فز خلف وابعدها وانصدمت من قربه لها رفعت راسها وانتبهت للكايدة
نورة : شفيك ؟
خلف : اسف اني قربت بس كانت الناقه قريبه منتس وشوي وبترفستس
نورة ضحكت بطرف مبسمها : ايي الكايدة تحبني ومتعوده تشوفني انا اللي اعطيها العلف عشان كذا جتني اول ما لمحتني بس تراها تغدر مرات فيني زين انك بعدتها
خلف قال بداخله ( هو في احد ما يحبتس ؟ )  اخذت الشعير وفتحت شبك الغنم والسخله الصغيره ركضت حولها ونقزت بحماس وتعالت ضحكاتها من المنظر وخلف مابعد انظاره عليها تأمل ضحكاتها وعيونها وحواجبها الحاده اللي اخذت من ملامح حمد شوي
نورة بضحكه خفيفه : وش جاتس انتي ؟ بعطيكم اكل بس اهجدي
قاطعهم صوت السياره اللي مرت ووقفت ونطق شخص غريب : السلام عليكم
قامت نورة ونظفت يدها من اكلهم وتقدمت وتقدم بجنبها خلف وبنفس الوقت : وعليكم السلام
: من انتي بنته يا بنت ؟
نورة : آمرني ناقصك شي ؟
: لا اسأل عنتس انتي من ابوتس ؟
خلف احتدت ملامحه بغيره وهمس لنورة : روحي للأبل ابي اتفاهم مع الرجال
راحت بهدوء للكايده اللي كانت تنتظرها ومسحت على راسها وباستها
خلف : ووش تبي فيها يوم تسأل عن محارمنا ؟
الغريب بإبتسامه : سألت عن ابوها لاني نويت من شفتها اتقدم لها
خلف بعصبيه : ماعندنا بنات للزواج انت تفهم ولا لا ؟ وانت جاي مع ذا الصبح تدور لك عروسه يالأربعيني توكل واقصر الشر
حرك السياره ومشى وهو مصدوم ، مسح وجهه خلف وهو يستغفر وخاف انه يكون موقف نصيبها عشانه يحبها وقال بتردد : نوره بسألتس
نورة كملت تمسح على الكايدة وناظرته وعقده حجاجها وانتظرته يتكلم
خلف : لو جاتس ذا الرجال اللي راح قبل شوي وتقدم لتس بتقبلين ؟
نوره بصدمه : وش كان يبيني ؟ اكيد برفض هذا بعمر ابوي ماشاءالله عليه
خلف صد بعصبيه : طيب خلصتي من الغنم انا خلصت من الأبل عشان نرجع
نورة هزت راسها بإيجاب واستغربت عصبيته وناظرته وهي تبي تفسر تصرفه اللي عجزت تفهمه انتقلت عيونها لملامحه وحواجبه الثقيله ومبسمه والشامه اللي توسطت مكانها تحت مبسمه وشنبه الكثيف وثوب الكم وهو رافعه عن يده نزلت راسها وخطت خطواتها بجنبه وقالت بدون ما ترفع نظرها عنه : انت ليه احسك دايم معصب ؟
خلف ناظرها بدهشة : انا ؟؟
نورة ابتسمت من رده فعله ومازالت منزله انظارها عنه بخجل : ايه انت يعني بس اشوفك تضحك اذا كنت مع حمد والكل يعرف علاقتكم في بعض كيف ماشاءالله الله يديمكم
خلف : حمد يفهمني ومقدر اعبس وجهي وهو عندي ونعم الخوة اللي عرفتها في ذا الإنسان ونعم الخوي اخوتس ارجل الرياجيل كلهم
سكت ثواني وضحك : انتي ليه منزله راستس يابنت حاتم خايفه مني ؟
رفعت راسها وناظرته بتحدي : عشانك قلت بنت حاتم بس ولا انا مو خايفه منك
تلاشت ابتسامته وتوترت نورة من مرت لحظه صمت وكلهم يناظرون في وجيه بعض صدت وهي تفرك كفوفها وابتسم خلف بطرف مبسمه
حاتم بصوت عالي : يامرحبا بحبيبه ابوها ودنيته
نورة مشت عنده وحضنته بحب ونطق خلف من وراها : جدي عطيت الأبل علفها اقدر انام الحين ؟
الجد وهو يناظر وجهه وعقده حجاجه : رح يعطيك العافيه نام خلصت مهمتك
خلف باس يد الجد عقاب وراسه ومشى لبيتهم وجلست نورة تقهوي ابوها والجد والجده وحطت التمر قدامهم وبعد لحظات اجتمعوا الاعمام وازواجهم في الدكه ومر الوقت وصار الظهر ومحد من الاحفاد صحى
نطقت الجده بحده : وين البنات والعيال ؟ تراني عازمه ام العنود جارتنا بيجونا العصر
الجد : كل واحد يروح يصحي عياله
نورة همست للجده : ابي انام ساعه ونص او ساعتين وبصحى تبين شي ؟
الجده : ابد سلامتس يابنتي روحي ارتاحي
سلطانه ( ام فهد وفهده ) : يا ماشاءالله بنت حاتم تنام الحين وعيالنا وبناتنا يخرب نومهم و يقومون الحين ليه ؟
نورة : والله ياعمه انا موجوده من الفجر واساعد واروح اشوف الحلال لحالي وانتوا كنتوا وقتها نايمين ومحد منكم صاحي
الجد: روحي نامي لتس كم ساعه
مشت بثقه قدام انظار سلطانه وفز حاتم : انا بصحي العيال
عبدالله ( اب خلف ) : ب اصحيهم معك
الجد : خلاص انتوا الاثنين تكفون الباقين قوموا لبناتكم
انصرفوا الاباء والامهات
________________
في غرفه حمد
دخل حاتم وفتح الانوار وسكر التكييف وفتح عبدالله الدريشه ( النافذه ) ليتخللها نور الشمس الساطع
فتح حمد عيونه بإنزعاج : وش صاير ؟
حاتم فوق راسه : بتقوم ولا اصحيك بالعقال ؟ اختار
فز حمد وفرك عيونه : كل شي ولا العقال يالقائد الحين اقوم
عبدالله بضحكه : بعدي الا وين خلف وجابر ؟
حاتم : عليك بجابر خلف كان يشتغل الصبح وتوه راح ينام

-
قرائه ممتعه 🤍
اليوم يعتبر دلعتكم بالاحداث ترا استمتعوا،  وش رايكم بغيره خلف ؟ ولقاء فهده وسعود ؟ والرجال الغريب هل بيرجع ولا ماعاد له رجعه بعد كلام خلف ؟ ظنكم نورة انتبهت لحب خلف لها ؟ ذي اليومين بتكون العنود موجوده في بيت عقاب كيف حماسكم ؟؟😙
شاركوني ارائكم ب اقرا بكل حب واستقبل تشبيهاتكم في حسابي انستا :
Wrii74