توالفت قلوبنا في عز المزوح وفي عز رعشه خوفي استأمنك

البارت الثاني والأربعين

في مجلس الحريم
كان الكل ملتمين على الصحن الكبير ويسمون بالله وياكلون ، عهد والفوطه براسها : زين اني لحقت على غداتس نوير تسلم يدينتس
ام هناي وعهد : ماقصرتي يا نوير كثر الله خيرتس
عهد والفوطه طاحت بظهرها وبين شعرها المبلل: لذيذ الجده اليوم هلكتني مع الدجاج ما قصرت وانتي غذيتيني
تعالت ضحكاتهم من ردت الجده: اللي يسمعتس يقول اني معذبتس ومخليتس تراكضين ورا الكلاب تراهم دجاج
فايزة ( ام جارالله ) : وش فيتس يا عهد اكلي بشويش وارتاحي الدجاج ما يراكضون وراتس للحين
ضحكت عهد بفشله وضربت هناي كتفها : خليها عليها بالعافيه انتي تغدي وخلي عينتس منها
الجدة : اعوذ بالله اذكري الله على بنيتي اشوف
فايزة : ذكرنا الله ماشاءالله عليها مارح تجيها عيني
قمرا : الا بنات وين فهده ماشفتها؟ ولا تغدت معنا
الجده وبيدها الرز: اي ما علمتكم بترجع هي وابوها
فزوا البنات وبصراخ : ايش!!
قمرا وهي تتجه للجده: جده تكفين لا يروحون ابيها
نوران : يابنت وخري عن جدتس خلاص لا تزعجونها يابنات
بعدت قمرا وملامح الحزن معتليتها ، قاطعهم صوت الجد الرخيم عند الباب : ياا منيرة
نورة وهي تغسل يدها بسرعه : يبا الله يخليك لي جدتي تتغدا تعال داخل محد غريب
الجد وهو داخل ومرتكي بعصاه: يامرحبا بذا الصوت يابنيتي
وقف لحظة ويشوف الكل مجتمع :  زين انكم هنا كلكم نوير تعالي لجدتس
توترت نورة وتقدمت للجد اللي حضنها من الجنب وكمل كلامه من انتبهوا له كلهم : الليله عندي خبر بيفرحكم
عهد وهي تصفق : الله وشو ياجدي ؟
ماجده : اششش خلينا نسمعه واضح في شي كبير
ضحك الجد من حماس عهد : اليوم بتكون ملكه بنيتي نوير من خلف
صرخوا كلهم ، عايضه ( ام ماجده ) : على البركه ياحبيبتي
الجده ابتدت دموعها تتجمع : يا ماشاءالله مبروك مبروك بنيتي كبرت
فزت نورة من لاحظت صوت الجده اللي يدل انها بتبكي وضمتها : جده تكفين لا تبكين مفروض تفرحين لي ليه تبكين؟
الجده وهي تضم نورة: والله انها دموع فرح يابنتي
بعدت نورة وهي وتبوس راس الجده اللي ابتدت تمسح دموعها بالشال : غالين علي لا تنزل دموعتس ياجده وتراني قريبه منتس مارح اروح مكان
وابتدوا البنات يصرخون بفرحه وترد على تباريكهم وتضمهم وحده وحده ، قمرا بزعل : ياربي بنات ليت فهده معنا بذي المناسبه
عهد وقفت ترقص وهي ماسكه طرف ثوبها وتحرك يديها بعبط : الله عندنا مناسبه واخيراً
هناي كانت تمسح على قمرا وضحكت من منظر عهد : اجلسي فضحتينا عند جدي
نورة : الا يابنات ترا بروح اتسوق من تجي معاي ؟
عهد بحماس وهي ترفع يدينها : اول من يركب معاتس
ماجده : بجي معاكم
هناي : وانا
ونورة آشرت على قمرا بعيونها اللي كانت مو معاهم  وماسكه الجوال وتراسل فهده ، هناي وهي تضرب ظهرها بخفه : بتجين صح؟
قمرا :هاه ؟ وين ؟
عهد : ياويلي من ماخذ عقلتس ؟ نتكلم عن السوق السوق بتجين؟
قمرا ضحكت مجامله : اي اي اكيد
____________________________
في سياره مساعد
فهده وشنطتها بحظنها وتأففت بقهر : طيب مو كذا ليش ما علمتونا  من بدري نتجهز! حتى ما عطيتوني فرصه اودع بنات عماني
مساعد : اسكتي لا اسد فمتس انا
فهد بضيق ويحاول يسكت اخته من لاحظ عصبيه مساعد : خلاص فهده خلاص
فهده بعصبية : لين متى واحنا نسكت فهد ؟ هذي حاله ما ياخذون راينا ب ولا شي وفجأه يصدمونا خير ؟ ترانا موجودين يعني اذا تشوفونا لا تقرفونا بحياتنا
كانت سلطانه مندمجه بالجوال وتبتسم وتراسل... لف مساعد بعصبيه وهو رافع يده وناوي يضربها : مارح تسكتين صح!!
ضرب بريك فهد بنص الخط ووقف على جنب وهو يمنع مساعد يضرب فهده اللي غطت وجها ورجعت بخوف : يبا لا تضربها تراها بنتك خلاص وماقالت الا الصدق ! بتلومها ؟
رجع يناظره مساعد بصدمه : وش قلت؟ انت ترد على ابوك ياللي ما تستحي؟
فهد وهو يفك ازرار ثوبه بخنقه : ابوك وابوك انا ماعصيتك مره وابر فيك بس انت اللي عاق فينا يبا انت تشوف تعامل اعمامي معنا وتعاملك كيف ؟ ليه ليه اشوف عمي يحضن ولده ويشوفه صديقه مو ولده وبس وانت تعاملنا كأننا جايين عبىء عليك ولا...
فهده ووجها صار احمر من العصبيه: كملها فهد لا تسكت!!! ولا انا بكمل بدالك انتوا تشوفونا جاين حياتكم بلغلط افراد اضافيه بس صح؟
مساعد واهو يمسح بوجها ولحيته ويصفق فهد بكف : انت ما تستحي ترادد ابوك يالثور
ورجع يضربه بتكرار بالمسباح وفزت فهده بخوف ودموعها بخدها وتضم فهد : لا تضربه لا تضربه خلاص
كان فهد متعود على ضرب ابوه له ومستسلم وساكت وبعد كم دقيقه وقف ورجع لمكانه وكان كل شي يصير تحت انظار سلطانه اللي كملت تراسل بجوالها : حرك السياره الله ياخذك من ولد
فهد بهدوء : فهده فكي يدينتس من رقبتي وارجعي مكانتس
رجعت مكانها فهده وهي تمسح دموعها وتناظريني امها بصدمه : انتي متأكده اننا عيالتس؟ ولدتس ينضرب وساكته وهمتس جوالتس !
سلطانه وهي تناظرها بحده : احترمي نفستس يابنت
فهد : فهده خلاص قلنا اسكتي !
التزمت الصمت وشافت اشعار قمرا بالجوال وكان محتواه ( فهدددهههه ليش رحتي ؟ ما ضميتس ولا سلمتي علي ورحتي كذا ! اف حتى تونا ندري اليوم بتتم ملكه نورة وخلف تمنيتس معنا )
بكت من قرت الرساله ومسحت دموعها وهي ترد : ما تعرفين ابوي يعني ؟ لازم يمشينا بكيفه صدمنا ما درينا عن شي تخيلي كذا على طول قال بنرجع وخلصوا اغراضكم بسرعه ومقهوره لاني ما ودعتكم حتى  نص اغراضي باقي في البيت عندكم
رفعت عيونها على اشعار دكتورها النفسي : السلام عليكم ورحمه الله وبركاته ، كيف حالك ؟ اكلتي حبوب الاكتئاب ؟
دخلت على الشات وردت : عليكم السلام نفس العاده ابوي والعايله اللي مو طايقه احد ، الصراحه خلصت حبوبي بصرف لي حبوب من ارجع

-

انتهى ، قرائة ممتعه ❤️
شرايكم بصدمه فهده اللي محد يدري عنه🫣 البارت الجاي بيكون عن طلعة الاحفاد بالسوق ... تتوقعون وش بيصير معهم وسلطانه من تراسل ؟ ووش صار مع جارالله والحادث ؟