توالفت قلوبنا في عز المزوح وفي عز رعشه خوفي استأمنك

البارت الرابع والثلاثين

جابر بعصبية من حركتها وهي تحاول تفلت من يدينه : بسسس ! خلاص اثبتي ووشو كذبت يوم قلت كلامي في ذاك اليوم ؟ شفيتس انتي قلتها من باب ابي يكون شكلتس عدل قدام الاوادم مو شكل ورع
عهد دفعت صدره وبعدته منه وهي ما تحب احد يجرحها ويتكلم فيها : انت رافع خشمك على وشو ؟ الغرور ذا كله اللي فيك لجل وش ؟ اذا قعدت كذا على غرورك ترا محد بيكون حولك من الناس حتى ما كلفت نفسك تعتذر !
جابر وهو يحك راسه ويصرف لانه ما يحب الاعتذار : ويقول ليه اعتذر ؟ ماسويت شي هذا كله عشاني صارحتس وقلت صيري نفس البنات
عهد تكتفت: اوههه الاستاذ جابر يعتذر ؟ مستحيللل طبعاً يكسر غرورك صح ؟
ومشت تركته وراها يهمس : لهدرجه زعلتها وجرحتها ؟
مشت عهد وهي تتذمر بعصبيه وضربت رجولها بحجر كبير بدون قصد وصرخت بألم ، لحقها جابر بخوف وهو يناظرها وماسك ظهرها بخفه: شفيتس ؟ انتي ما تنتبهين ابد
عهد وهي ماسكه رجولها بألم ورفعت عيونها عليه ورمقته بحده وهي تحس بإحراج : انت وش دخلك؟ ان شاء الله اطلع الشارع واخليهم يدعموني بعد شتبي؟
جابر وهو يبتسم طرف شفته: قلت لتس انتس بزر ما تصدقيني كل شوي تضرين نفستس يا احصلتس طايحه وصافقه وجهتس بالأرض ولا تهربين من الناقه
عهد : وانا كل ماطحت احصلك جاي مسوي المنقذ على راسي
وتدخل عهد بيتهم وقبل تسكر الباب يحط رجله جابر يمنع الباب انه يتكسر ويقول : معليش بس ماني مخليتس زعلانه علي
وقفت عهد وهي تحس بصدمه من اللي سمعته وتنطق: من اللي يقول كذا ؟ انت؟ انت قلت قبل شوي مارح تخليني زعلانه؟ دقيقه دقيقه بديت اشك انك جابر
جابر وهو يدخل :ترا ماني قاسي لذي الدرجه مدري شفيتس تفكرين عني كذا
عهد وهي تحاول تسوي نفسها ما يهمها وتخفي الابتسامه وتكتفت: اي طيب وش تبي داخل بيتنا؟ المهم انا بروح غرفتي
وكانت بتمشي وتقدم جابر وهو يسحبها له: للحينتس زعلانه علي؟
عهد بعناد : اي ومارح ارضى وروح عن وجهي
جابر بنفس العناد: طيب واللي يقولتس والله مايروح؟
قاطعهم صوت اقدام احد جاي وتوسعت عيون عهد بربكه ودفعته ورا الباب وبسبب تمسك جابر بعهد انسحبت معه وضربت صدره بجسمها ورفعت اناظارها له وهي تسرح بملامحه وابتسم من لاحظ سرحانه وضرب راسها بخفه: شفيتس؟ مضيعه شي بوجهي؟
عهد وهي تقلده: مضيعه شي بوجهي يوه ياشينك
جابر رفع حواجبه وبضحكه: ياشيني ؟
التفتت عهد وهي تشوف ابوها يدخل ومتجه لغرفته وبدا توترها يزيد وغمضت عيونها وقربت من جابر اكثر وفتحت عيونها بشويش وكان جابر يضحك على خوفها ويكتم ضحكته ، عهد: لو اني رميتك قدام ابوي كان عرفت كيف تضحك
جابر : تهدديني ب ابوتس ؟
عهد : من قالك اهدد ؟ انا انفذ
ابتسمت لاجل تقهره ومشت من عنده وهي تبتسم بغيض وتركته وراها بنص الصاله لحاله
جابر وهو يكلم نفسه ( عنيييدددههه واذا قلنا لها شي زعلت )
__________________________
في مجلس الرجال
مساعد جالس مع العيال وحمد وخلف يسولفون وجالسين عند الموقد ( الغاز ) وفهد وجابر جالسين على اليمين ، ومساعد يشرب الشاهي ويقرا القصيد ، فتح مساعد جواله على برنامج تويتر وفرفر على الفيد اللي كان يشك انهم الاحفاد وحصل الفيد في الترند وفتحه وتوسعت عيونه من تأكد ان اللي بالفيد هم جارالله وسعود يتضاربون مع العيال وديم واقفة تبكي فز وصرخ بعصبيه : يامسسععووددد تعال شوف فصيحه اخوك واختك وسط العالم
كل العيال فزوا من عصبيته ومسعود فز بقوه وطاح الشاهي على رجله وثوبه واحترق وركض للعم مساعد: انت وش تقول !! مايجي من اهلي فضيحه
مساعد وهو يعطي الجوال لمسعود: شوف بعينك الفضيحه اللي جات على روسنا
حمد وهو عاقد حجاجه وبحده : ياعم استهد بالله اذكر الله واقصر صوتك جدي نايم يمكن انت فاهم غلط 
العم مساعد : فاهم غلط؟ اهاااا انتوا عارفين وساكتين !
مسعود ناظر العم مساعد بحده ورمى الجوال وطلع برا وهو يتصل على سعود وتقدم خلف وهو يسحب الجوال ويشوف المقطع مع العيال
حمد: طيب ياعم تراك ازعجتنا على الفاضي عيال وتهاوشوا وش الفضيحه ؟ هذا بدال ما تخاف عليهم وتروح تتطمن!
فهد : وهو صادق يبا انفعلت وصرخت على شي مايسوا
مساعد وهو ينزل عقاله وبصراخ: ترادد ابوك مع عيال عمك علي !
تقدم قاصد يضربه وتدخل بذي اللحظة جابر وهو يمسك يد مساعد ويرده وبحده وبهمس: ماتضربه قدام الرجال وتكسره!
فهد وهو ورا حمد وخلف : ياعيال لاحد يوقف بوجه ابوي ابعدوا من طريقنا ان كانه يبي يضرب خلوه
مساعد : غصب عنك بيخلوني اضربك ياولد الكلب
خلف احتدت ملامحه من منظر مساعد قدام ولده ونطق وهو راص على اسنانه: اقعد يافهد والله ما يلمسك ويضربك وسط المجلس لو على جثتي
-اما في الطرف الثاني فزوا البنات وهم يسمعون الصراخ وركضوا وهم يطلعون لمجلس الرجال ناسين كل شي وراهم وكانوا بحاله خوف وهلع
فهده : يابنات احد ينادي العيال صراخهم مو طبيعي ، قمرا بخوف من فكره حمد يصير له شي : ابي نورة كلمي حمد عشان يطلع ويقول لنا وش صاير
كانوا يتكلمون بخوف ونوره للحين تحت تأثير صدمتها من مساعد وبحكم ان المجلس يبين الاشخاص اللي بداخله شافت مساعد وصنمت بخوف ، لاحظت هناي رعشة نورة وقربت مسكت كتوفها برقه: نوير حبيبي انتي شفيتس ؟ تعبانة من شي؟
نورة اكتفت انها تهز راسها بالنفي ، ماجده : يوههه يابنات الصراخ يزيد ترا مارح أنتظركم
وكملت وهي تصرخ ماجده: ياخلللففف ياعييااللل ياعماانيي وش اللي قاعد يصير ! اصواتكم واصله للجيران
طلعوا العيال وهم عاقدين حواجبهم وخلف بكامل عصبيته ومساعد وراهم ، حمد بحدة: نورة وش مطلعتس انتي والبنات لمجلس الرجال ؟
نورة رجعت ورا بخوف من شافت مساعد وسكتت ولاحظ خلف انظارها اللي مثبته على مساعد وانسحابها لورا ونطق خلف: مو صاير الا كل خير ادخلوا داخل انتوا
مساعد : عن اي خير تتكلم؟
طلع حاتم وهو قابض يده بعصبيه: وش ذا الصراخ! ما تحترمون ان جدكم نايم!
مساعد كان بيتكلم وقاطعه حاتم: اسكت وروح بيتك يامساعد الصبح بنتفاهم وانتوا يالبنات روحوا داخل وقفتكم قدام المجلس غلط والعيال قصروا اصواتكم
كلهم هزوا راسهم بالايجاب وكتم مساعد غيضة وطلع لبيتهم وهو يحاول يتمالك اعصابه وحالف انه يزيد النار حطب كان مع كل خطوه يخطيها عيون نورة تلحقه بخوف منه
خلف بانت عروقه بقوه من عصبيته وتقدم وهو يسحب ماجده من ذراعها وصرخوا البنات بخوف ماعدا نورة اللي تكلمت بعصبية: وكسر يكسر ذي اليد لا تسحبها كذا قدامنا!
التفتت خلف لها وهو مستغرب من تصرفاتها وعصبيتها : اخ واخته خليتس في حالتس
سحب ماجده بقوه وبعدها من البنات وتكلم وهو يتقدم لها ورص على اسنانه بحده: وش هو له تصرخين قدام الرجال؟؟
ماجده بثقتها وغرورها المعتاد ردت ببرود : ماسويت شي كنا نحسبكم بتذبحون بعض من صراخكم وخفنا
خلف: لو ندفن بعض ماتطلعين ويسمعونتس الرجال سمعتي ! امشي قدامي روحي البيت
ماجده : بس ماخلصت سهرتنا مع البنات
خلف بحده وهو يناظرها: قلت امشي !
اما عند نورة بعد ما انصرفوا الاحفاد تقدم حمد لها وهم يمسك كتوفها ويضمها ومسح على شعرها وهو يقول : شفيتس يادنيتي انتي ؟ ليه احستس تعبانه ومتضايقه؟
نورة مسكت بظهر حمد وبادلته الحضن وهي تحاول تقاوم دموعها : مافيني شي ياروح اختك بس تعبت من الشغل
باس راسها وهو يعرف ان فيها شي لانها ماقد اشتكت من تعب الشغل وراح المجلس وجلس مع العيال وهو يحس بضيق من حال اخته اللي يجهل اللي صار بينها وبين العم مساعد

-

انتهى ، قرائة ممتعه 🤍
عيدكم مبارك ياقرائي الأحبة وكل عام وانتوا بخير هذي عيديتكم مني...
لا تقصرون بالتفاعل عشان ازيد عيديتكم🫣
ومنها ماتعرفون وش بيصير بين خلف ونورة البارت الجاي...