توالفت قلوبنا في عز المزوح وفي عز رعشه خوفي استأمنك

البارت الثاني

بجانب ثاني من الرياض
( عايله فهاد )

فهاد : يلا سمعتوا العلم اجهزوا لاننا بنلحق سياره سعد وبنمشي كلنا بنفس الوقت
فايزه : انا ماعندي اشياء كثيره بس بجهز شنطتك وانت ياجارالله طلعت ثيابك من الخياط ؟ الشتاء اقبل والنعيرية الحين برد ياولدي
جارالله وهو يحب يد امه: اي يا نظر عيني طلعتهم وخلصت كل شي بس ب احطهم بالشنطه
___________________
عند عايله عبدالله ( ابو خلف )
عبدالله وهو جالس يتقهوى مع زوجته ويشوف خلف يركض له فز وقال : وش علمك يا ولدي؟
خلف : جدي يقول عندنا ساعه نجهز عشان نجيه يبي نقضي الاجازه عنده
عايضه : طيب ان شاء الله بنجيه بس نخليها بكرا ؟
عبدالله بنفي : لا لا انا اعرف ابوي اذا لزم على شي وامي بتعصب انتي تعرفين كيف تبينا ملتمين عليها
خلف وهو يأشر على ابوه: قلت اللي على لساني
عبدالله : ياعايضه عطي علم لبنتس ساعه ونطلع
طلع عبدالله وخلف لحقه وهم ناوين يعلمون جابر يجهزون ويسنعون السياره اللي بتمتلي باغراضهم
عايضه وهي متوجهه لغرفه بنتها افتحت الباب ولقتها صاحيه وتحط ميكب خفيف وابتسمت لأمها
عايضه : ياهلا ببنتي اسمعيني ترانا بنسافر بعد شوي النعيريه
ماجده لفت بصدمه: لا يما مارح اروح مافي نت هناك يقطع وضيقه وما اندمجت باقي مع بنات عماتي واعمامي
عايضه : لا تعاندين تدرين محد بيسمح لتس تقعدين لحالتس لا ابوتس ولا اخوانتس واقعدي على جوالتس تسلي فيه لين تندمجين مع البنات
ماجده بقله حيله : متى بنروح ؟
عايضه : عندتس الحين نص ساعه
ماجده توسعت عيونها وقامت تركض وهي تلعن واقعها وحظها
______________
بعد ساعه بدون احداث مهمه
تجمعوا عيال واحفاد عقاب وكل عايله بسيارتها وقبل يمشون وقفوا عند مطعم صغير للفطور لان محد منهم افطر مع ان الساعه تشير ١٢ ونص الظهر ومفروض انه وقت غدا
في سياره عبدالله
خلف : ابوي انا بنزل لان عددنا كثير احنا وسيارات اعمامي بعد والله ان العامل بيضيع وانا بجيب الطلبات انتوا الحين علموني اول وش تبون تفطرون ؟
عايضه بحده : انا وابوك قد سبقناكم وافطرنا وهالحزه حزه غدا ياذا الجيل اللي مايعرفون الاوقات وملخبط يومهم دايم !
عبدالله : اي والله صادقه امكم متى بتقومون مثل الناس ؟ ونفطر كلنا على صحن واحد ؟ بس اللي بيعرف لكم والله ابوي عقاب اللي بيلعب الخيزرانه على ظهوركم للصلاه وقومه الصبح
جابر : تكفى يبا لا تقوله
ماجده تهربت من ذا النقاش وركبت سماعتها وشغلت اغنيه لعبدالمجيد
خلف وهو بدا ينفذ صبره ويعصب لف لجابر : اخلص علي وش تبي تفطح ؟
جابر وهو يحب يستفز خلف : وش يبيعون ؟
خلف احتدت نظراته : شايفني اشتغل معهم ؟ انقلع بس
بدل نظراته لماجده وصار يناديها اكثر من مره ولا ترد وجابر يضحك
قام خلف وسحب السماعه من اذن ماجده بقوه
ماجده : وكسرر اسحب اذني مع السماعه بعد ! اوجعتني وش تبي ؟
خلف : اناديتس ما تسمعيني ليه ؟؟ وش تبين تفطرين !
ماجده رفعت يدها اللي كانت ماسكه فيها توست جبن وعسل في وجه خلف : ما تشوفني اكل مابي شي
تنهد بغضب وراح وقبل يسكر الباب قال جابر : جب لي معك كرك
مشى خلف وهو يستغفر ربه ويلعن الشيطان وتوجه لسياره عمه عبدالعزيز ونزل الدريشه له وسلم عليه وحب خشمه ( سلام رجال )
خلف : ارحب ياعمي عساكم بخير ؟ انا بنزل للمطعم وجيت اشوفكم وش ناقصكم ووش تبون ؟
عبدالعزيز : طيبين الحمدالله  ، اصبر اشوف بناتي
لف ورا عند بناته وشاف هناي تتكلم بالاشاره وتحرك شفتها انها تبي حمص لانها مستحيه تتكلم وولد عمها موجود ضحك عبدالعزيز من خجل بنته
وعهد عطتها نظره ونطقت بصوت عالي : مو صاحيه والله ابوي انا ابي خبز لبنه خيار وزعتر
وما وعت الا على ضربه اختها بكتفها : ولعنه شفيتس ؟ خلعتي كتفي
هناي بهمس وهي ترص على اسنانها: صوتس وصل العراق !
سلوى : بس يابنات الولد موجود
لف عبدالعزيز لخلف : سمعتهم ؟
خلف ضحك : وشلون ما اسمع والله لو اني اصم ياعمي بس بنتك هناي ما سمعتها ( اصم يعني شخص فاقد السمع )
احمر وجه عهد وغطت وجها بكفوفها وهناي انفجرت ضحك عليها
انصرف خلف بعد ما اخذ طلباتهم كلهم وسند بطوله على الجدار وشوي ويشوف عيال عمه نازلين له يضحكون واستقبلوا بعض بالاحضان والترحيب الحار
خلف وهو ياخذ الطلبات : زين والله اللي شرفتوا يلا كل واحد ياخذ اكل اهله وناخذ علوم بعض ان شاء الله اذا وصلنا النعيريه ولحد يسوي فيها القوي ويسابق بالسيارات ترا وراكم اهل سمعتوني خصوصاً فهيد !
فهد : ابشر ابشر من عيوني هذي قبل هاذي
خلف وهو يقلده بضحك : لبى عينك هذي قبل هذي
سعود جلس يتأمل حالهم والحوسه ويركز بكل سياره وكيف ان وراها العفش ورابطينها بحبل عشان ما تطيح : ياعيال ياووك مكثرنا تكفوون والله يضحك وضعنا تقولون طاش ماطاش
ضحكوا العيال من تعليقه اللي ما توقعوه طالع سعود ثواني وصد ولمح عيون كانت عليه ورجع لف وجهه وركز على عيون تناظر في الجهه الثانيه من السيارات وقال بهمس: شفيها تطالعني كذا اعوذ بالله !
اما في سياره فهاد كانت فهده تناظره بحده وتقول في نفسها ( وجعع ذا النسونجي ابو عيون زايقه مدقق في كل سياره لا ويناظرني بعد اللي ما يستحي عمى ان شاء الله صد ! )
راحوا العيال ورجعوا نفس ترتيبهم القديم وكل واحد مع عايلته وحرك سياره العم سعد ( ابو مسعود ) والباقين لحقوه
-
هاي ياحلويني في احداث حلوه بالطريق استعدوا وعيشوا معهم كل التفاصيل اصغرها واكبرها وشاركوني شعوركم وانطباعكم في عايله ال عقاب 😙