توالفت قلوبنا في عز المزوح وفي عز رعشه خوفي استأمنك

البارت الثالث عشر

رتب حمد المكان وعاونه خلف ودخلوا العزبه والدلال في السياره وركبوا داخل وفتحوا دريشه السياره ( النافذه )  وتأملوا المطر اللي ما امطر على الأرض وبس امطر على ارواحهم وبللها بالطمأنينة والسرور بجيته تنفس حمد ريحه المطر مع الطين والغيوم متجمعه بجانب بعض وكانت السما لوحه فنيه بجمالهاا وصرخ خلف على فهد وهمس من قرب فهد  : ودك تحارش جابر؟ اضرب خصره اكثر من مره وحط رجلك
فهد ابتسم بخبث وراح يركض ورا جابر اللي جالس في حاله وما وعى إلا على فهد وهو يدق خصره اكثر من مره ومن الجانبين تنرفز لانه عنده الموت اهون من ذي الحركه فز ولحق فهد وتعثر بحجره وطاح على وجهه في التراب وانفجروا العيال يضحكون وفهد ماقدر يكمل ركض من الضحك وجلس على الأرض وهو ماسك بطنه ويضحك
حمد : المعنى الحقيقي لكلمه اكل تراب
خلف كان يضحك ويأشر على جابر وبصوت متقطع : ش.. شوف وجهه كله تر.. تراب
لف حمد لجابر اللي صار يتفل ( يبصق ) على الأرض ويحاول يطلع التراب اللي دخل فمه ونص وجهه تراب ومغمض عينه اليمين ماقدر حمد يمسك نفسه اكثر وتعالت اصواتهم بضحك ومسك خلف يد حمد وجسمه يهتز بخفه ومال براسه على كتف حمد اللي غطى وجهه بالشماغ وردف وهو يضحك بخفه : الله ياخذ بليسك ياخلف
ارتفع صوت الأذان لحظتها ووقف مسعود يجمع العيال لصلاه وتوضوا وكل واحد يصب الماي على الثاني وبعد ما ساندوا بعض اتجهوا للقبله وفهد كل ما شاف وجه جابر رجع يضحك بسبب الطيحه وتمالك نفسه وصفوا وكبروا والمطر نزل عليهم بشويش بعد ما امطر عليهم بغزاره وخف مع الشروق
_________________________
في بيت سعد
انتهوا البنات من الفلم وافتحوا الدريشه ( النافذه ) وصوت المطر وهو يهطل بخفه اندمج مع صوت ضحكهم وسوالفهم
نورة بشهقه: اذن الفجر واحنا للحين قاعدين والحين جدتي وجدي صحوا
عهد بإستغراب : يعني ؟
نورة: يعني الله يسلمكم عندكم ساعتين تنامون فيها واذا زدتوا على نومكم ساعه بتقومون وانتوا معصبين عشان جدتي مارح تخليكم
هناي بصدمه : وشهووو ؟ بسوي نفسي ما اسمعتس حبيبتي بعطيها نومه لين العصر
نورة ضحكت : هذي نكته الاسبوع صح ؟
فهده : والله انا نفس وضع هناي بنام ما تكفيني ساعتين
نورة قامت ورفعت يدينها : انا مالي علاقه بعدين تجوني زعلانين عشان صحوكم غصب
قمرا : نوير انتي وش بتسوين بتنامين الحين؟
نورة : لا بروح اسوي الفطور وبشوف جدتي وجدي اذا يحتاجون شي وبعدين الظهر بنام كم ساعه
عهد : يوههه ما تتعبين ؟ بسم الله عليتس والقوه
نورة وهي تتغطى بالحجاب وقبل تطلع : انتوا اللي بتتعبون انا متعوده على ذا الروتين عشان كذا انصحكم نصيحه اخت محبه ناموا وقوموا بعد ساعتين
ماجده بهمس : وش هالروتين وهالعيشه القشرا اللي تعودت عليها ويبونا نتعود عليه بعد !
طلعت وسكرت الباب وراها ودخلت سياره الشاص معلنه وصول احفاد عقاب والتفتت نوره وغطت نص وجها بالحجاب من سمعت صوت العيال واضطرت تمر قدامها لان مافي طريق ثاني ومشت بخفه ونزلت راسها ولاحظها خلف وفز قلبه من شافه وما بعد عيونه عليها الا لما سحبه مسعود مع ثوبه ونزله : وش بك سرحان ؟ كلهم نزلوا الا انت
خلف لف له بحده : وش دخلك ؟ اسرح ما اسرح مالك شغل ولا عاد تسحبني كذا
مشى من عنده وهمس بخفه : الله ياخذك بعدت عيوني عنها اللي ما شبعت فيها ولا قلبي هدا من شاف خطواتها
ارتفع صوت الجد : ياهلا بالسرابيت تعال انت وياه وينكم من المسجد ؟
راحوا العيال لبيوتهم وما ناموا في المجلس كالعاده لانهم عارفين الجد مارح يتركهم ، تقدم حمد للجد وهو كان يترنح من التعب وجنبه خلف اللي مسك يده وشدها يثبته
حمد : ابد قريب هنا سمرنا الليل مع بعض واخذتنا السوالف بس صلينا جماعة
حاتم : وش فيك دايخ ؟
الجد بحده : اكيد ، ما نام ومسربت مع العيال وش تنتظر منه زين ما ضرب وجهه الأرض من كثر ما تبغي عيونه النوم بس هين وانا عقاب منت براقد بتقوم مع خلف الحين وتشتغل
خلف : جدي الله يهديك خله ينام وانا بساعدك باللي تبي فيه
الجده منيره : عقاب وش فيك على حمد ؟ خله ينام واضح التعب عليه خف عليه شوي
الجد ناظر رجول حمد وجسمه كيف يميل وعيونه تقاوم النوم : ياحمد لا تزعلني منك روح نام وب اصحيك الظهر وانت ياولد عبدالله تراك بتعاوني بس اول تعال افطر معنا
حاتم وهو يساير الجد : يابوي اترك خلف والعيال ينامون وانا اكفي عنهم
الجد : اسكت مني ياحاتم كلمتي وقلتها وبتمشي
خلف ابتسم : ماعليك ياعمي حاتم انا اموري طيبه ومصحصح بجيكم
طلع حمد وهو عاقد حجاجه وهمس لخلف اللي مشى جنبه : وش هالطاقه اللي جاتك فجأه ؟ متأكد ما ودك تنام ؟
خلف وهو يدف ظهر حمد لداخل البيت : رح نام وخلك مني مافيني نوم
حمد وهو يمشي لغرفته : اللي ودك فيه اجل
خلف همس وهو يشوف حمد راح : كيف يجيني نوم بعد ماشفت العيون العذبه والحسن اللي عذب قلبي وخذاه ومشى ؟
( عند البنات )
انصرف الكل لبيته ومابقى الا فهده اللي قامت وهي تقول : قمرا انا بروح لان لو جلست دقيقه زياده بنام عندكم خلاص مقدر تبين شي ؟
ضحكت قمرا : ابداً ياروحي نوم العوافي
فهده بإستغراب : الأ وين ديم صدق ؟
قمرا : يوههه مستحيل تقاوم النوم تحصلينها في سابع نومه وتتحلم
طلعت فهده وهي نازله من الدرج قابلت سعود اللي كان واقف وينتظر ورفع انظاره لها
توسعت عيونها ونطقت بصوت خفيف لأن الكل نايم : قطعااا ياللي ما تستحي ما تتوب من حركاتك انت ؟ وش موقفك قريب غرفه البنات واحنا متجمعين ها ؟
سعود ميل راسه بإستغراب وابتسم بطرف شفته: وش تقولين انتي ؟
فهده ناظرته بحده : تعرف عدل وش اقول يالنسونجي
سعود احتدت نظراته ورص على اسنانه : لا ترمين كلمه ماتعرفين وين هي تروح بعدين صرت انا النسونجي وانتي طالعه من غرفتي صححي تفكيرتس عشان ما اقولتس كلام مايعجبتس
فهده بصدمه : ايش ؟ تخسي ما دخلت غرفتك
سعود وهو يأشر على الغرفه اللي طلعت منها : النسونجي هاذا غرفته وانا كنت ادري ان قمرا مجمعتكم وسمعت صوتس ووقفت برا انتظرتس تطلعين عشان ادخل
فهده وهي ترمش بثقل ودقات قلبها تسارعت من وجهه وهو يناظرها مشت بسرعه وضحك سعود : الناس تعتذر
مشت فهده ولا ردت عليه وقالت بداخلها ( مشيت هالموقف بمزاجك وجت لصالحك بس بعد مازلت تناظر البنات )
_______________________
في بيت عبدالله
دخلت ماجده بتعب ومسكت نعالها بيدها وطلعت امها بوجها : وينتس فيه طول الليل ؟
ماجده : كنت عند بيت عمي سعد مجتمعين البنات وشفنا فلم وتوهم يروحون
عايضه: اشوفتس استانستي مع بنات عمتس ماعاد اشوفتس عندي دقيقه قلت لتس حلوين بتستمتعين معهم ما تسمعيني
ماجده : لا والله ماحبيتهم بس شسوي مالي في هالديره غيرهم اضطريت اقعد معهم واقضي وقتي بس في من البنات جوهم حلو
عايضه: ترا ابوتس شوي وبيقعد وان شافتس داخله البيت هالحزه مارح تسلمين هذاني اعلمتس
ماجده عبست وجها : يالله خليني اروح غرفتي قبل اخذ محاضره وهواش من فجر الله

-

قرائه ممتعه 🤍
شاركوني ارائكم وتشبيهاتكم للروايه في حسابي انستا : wrii74