توالفت قلوبنا في عز المزوح وفي عز رعشه خوفي استأمنك

البارت الخامس عشر

اجتمعوا الاحفاد في الدكه وكل وحده مكشره وجها وزعلانه اكثر من الثانيه ضحكت الجده : احسن عشان ثاني مره ما تسهرون
الجد : سهرانين ! هذا وانا معصب على العيال طلعتوا مثلهم
رجع نظره على العيال اللي بعضهم ابتسم بغباء وبعضهم صرف انظاره عنه ، جارالله كان يناظر ديم وعبوس وجها ومكتفه يديها قال بنفسه ( وش في روحي زعلانه ؟ جعل الحزن فيني ولا فيتس ، هذا كله عشان النوم لو انه رجال ذبحته عشانه مزعلتس ) اما حمد كان مايناظر قمرا ومنزعج بحكم انه توه صاحي ولاحظت انزعاجه وصدوده منها وما عطته اهميه
هناي : جده وين نوير ؟
الجده : قالت بتروح تنام حبيبه جدتها من الصبح وهي تكرف
ديم : بقوم اشوفها
راحت وعيون جارالله تلحقها وكف النظر عنها من وعى على نفسه واستوعب ان الجميع حوله ، الجد: ياحمد قوم افتح الشبك للأبل خلها تمشي في الأرض الواسعه
نزل حمد فنجاله وفز رافع طرف ثوبه وقام معه مسعود وركضوا للشبك وطلعوا الأبل والعيال في الدكه يطلعون اصوات وراحت اغلب النياق تجاههم ورجعوا مسعود وحمد للدكه وجات احدا الوضح ورا عهد اللي كان بيدها خبز وتاكل منه وسرحانه والعيال يتهامسون ويضحكون ، سعود وهو يهز يد جارالله  : تكفى شوف مفهيه والناقه وراها بتنشب لها في الاكل
جارالله : ابد مو جنبنا ولا جنب الناقه بالها بعيد
قربت الناقه منها ونزلت راسها ليد عهد وصرخ حمد : عهد وراتس
قطع تفكيرها ولفت على وجه الناقه وصرخت وبعدت منها والناقه مازالت تمشي لها  ، الجد وهو يضحك بخفه : تبي الخبز اللي في يدتس مديها لها
عهد لفت برعب لأبوها تستنجد فيه بنظراتها وجلست وراه : ابوي تكفى اصحى على مفاجعه وش ذا ابعدها
عبدالعزيز ضحك بطرف مبسمه : استغني عن خبزتس وعطيها وبتروح
عهد مدته له بيد ترجف : عطها انت والله ما اقرب منها ماعاد ابي الخبز والله ماخلت لي روح للفطور
ضحك جابر وهو يناظرها ورفعت انظارها عليه وكشرت وعقدت حجاجها وصد منها ومازال يضحك والعيال مثله
اخذ عبدالعزيز منها الخبز واكلته وراحت منهم ، عهد ناظرت العيال بحده : وجع وش اللي يضحك ؟
سعود : انتي بنت عبدالعزيز بن عقاب تخافين من الأبل ؟
عهد لفت على البنات وكانوا كلهم تعبانين ويبون ينامون ماعدا هناي اللي عضت شفتها تمنع الضحك وقالت عهد بخيبه : لااا ما تفضحيني للمره المليون تكفين لا تضحكين صفي جنبي
انفجرت هناي تضحك بعد كلمتها وغطت وجها بكفوفها وانجذب مسعود لصوت ضحكتها ورفع راسه بتأمل ، رفع يده حمد وقال بحده : يالكااايددةة
ثواني وتعرفت الكايده على صوته واقبلت وحاوطت كتوف حمد وصدره مسح عليها وضحك من شوقها الواضح له : يامرحبااا يامرحبااا يادهر قلبي
بعدت منه الكايده بعد مده ونزلت راسها بجنب حمد اللي كان متكي وقمرا ناظرته بغرابه وتتسأل ( كيف هالغلا والحب لبهيمه ؟ ) حس بنظراتها له والتقت عيونهم ببعض وناظرته بحده وطرف عين وصدت وهو مازال غارق في وجها وفي شامتها
قامت قمرا بوسط سوالفهم : بشوف ديم وين اختفت
ماجده جمعت شعرها بالجانب الأيمن ورجعت خصلات شعرها المتناثره ورا اذنها وقربت من الجده ومسكت يدها : الله ياجده يدينتس حلوه شرايتس احط لتس مناكير ؟
عايضه (ام خلف ) : تأثير النوم لاعب بتس انتي ؟
الجده ابتسمت : وشهو مناكيره ؟
مدت يدها ماجده واظافرها اللي طلتهم باللون الأحمر : هذا هو يجنن اللون وبيطلع على يدتس احلا
الجده دفتها بخفه : يابنتي انا كبرت ماعادني في شبابي مايصلح احط في يدي الله يخليتس لي
سعود : افااا انتس شباب ماكبرتي وازين من جدي عقاب بعد
الجد : اعقببب تتغزل في زوجتي قدامي
تعالت اصوات التضاحيك ونطقت فهده : الله الله ياجدي تغاررر
الجد : وكيف لا وهي كل اصحابي وخيرة ناسي ؟
جارالله : اخص يالجد العاشق
الجد اخذ البياله اللي جنبه وضربه فيها : اعقل ياولد
ماجده نقزت بحماس : تكفين ياجده تراني صامله على الاقل بس اصبع واحد اذا ماعجبتس بمسحه
الجده بدت ترضى : خلاص طيب بس ان طلع خايس ضربتس
ماجده بضحكه : بس تم
ابتدت تسحب يد الجده برفق وتحط لها على كل اصبع ويد الجده المليانه تجاعيد وبشرتها البيضاء وعروقها اللي بارزه بقوه على ايديها مع اللون الأحمر ياخذ العقل ، فهد ناظر ماجده بصدمه وقال بداخله ( قلنا انتس مو صاحيه بس ما توصل تحطين لجدتي مناكير ) وبعد 5 دقايق انتهت من يدين الجده : تراراراااا شرايتس يهبل صح ؟
الجده ابتسمت بحب لحفيدتها : حلو وزين بس مايصلح على يدي
ركضت هناي وجلست تشوف يدين الجده : ووااههه جعل ذي اليدين ما تمسها النار بصور يدينتس ياجده امسكي الفنجال
ابتدت الجده تطبق اللي يقولون البنات عشان يصورون وبعد فتره انزعجت وقالت : بس خلاص سكري مني ذا الجوال
جابر: الجده ماتحب الاضواء
هناي بحماس : جددييي شوف يدين جده منيره
تقدم الجد ومسك يدينها وضحك وباس يدينها بحب وصرخوا الاحفاد
الجد : وجععع يوجعكم لا تصرخون عندي عشان ما تلعب ذي العصا على ظهوركم
مسعود : والله يا ان جدتي ماخذه عقلك
احتدت نظرات الجد وضرب حمد مسعود : بس ارتاح ضربته عنك
الجد : بعدي الا ياولدي ياحمد شوف خلف وقيمه وابيك تشوف محلي وعلومه
حمد آشر على خشمه وركض لبيت عبدالله : ابشر
الجده : ماعاد باقي شي على العصر وام العنود بتجيني والبنات اختفوا انا بقوم بكلم نوير تصحى ونعدل المكان
فزت وفزوا معها ماجده وهناي وعهد وفهده اللي ساندوها بالمشي
_________________________________
داخل بيت الجده
قمرا دورت ديم بكل مكان ماحصلتها دخلت بشويش لغرفه نورة المعتمه وانتبهت لنورة اللي كانت نايمه وماخذه وضعيه الجنين بنومها وتاركه شعرها منسدل على المخده وديم انسدحت جنبها وغطت وجها بكفوفها
قمرا : اههه يالخاينه اثرتس هنا
كملت قمرا وهي تمسك كتوفها وتمسح على جسدها : ياويلي يابرودة الغرفه الصدق مو بعيده اصف جنبكم
قمرا قربت من ديم ونورة وغفت بتعب ، حست نورة بإهتزاز خفيف بطلت عيونها وناظرت البنات وبإبتسامه: ماقلت لكم بتتعبون
كانت بترجع تنام لولا باب الغرفه اللي انفتح بقوة وصدى صوت الجده بعصبيه : نايمين ؟؟ وجيرانا بيجونا الحين والبيت ما تنظف ولا تسنع !!
فزت نورة وجمعت نص شعرها وربطته وخلت الباقي منسدل : انا قايمه ياجده بس شوفي البنات
ضربت الجده العصى على البنات بثقل : قومي انتي وياها
قامت قمرا بتعب : توني نمت بس ساعه ليه تقيموني ؟
فهده : ماسمعتي جدتي تقولتس بيجونا ضيوف
عهد وهي تسحب يد ديم : ياربي بنات ثقيله ومو راضيه تقوم وش اسوي فيها ذي ؟
الجده : بنت سعد ما تبي تقوم ؟ دواها عندي اتركيها عنتس
ضحكت نوره من فهمت نيه الجده : الماي جنبتس في الطاوله
شهقوا البنات واخذت الجده الماي وصبت كميه قليله على يدها ورمت على ديم اللي حست بقطرات الماي على وجها وفزت بإنزعاج وبصوت عالي وشبه باكي : ااههههه اتركوني اناااممم مرتين اقوم على ماي ليه ؟؟
نورة اخذت المخده ورمتها على ديم : تراتس تصرخين على جدتس
الجده : مو واعيه البنت للحينها نايمه شفيتس عليها يا نوير
ديم ناظره الجده وباست راسها : اسفه ياجده ماشفتس احسبتس حدا البنات
نورة انتبهت ليد الجده : الله وش هالمناكير الزين والحركات
الجده فزت : يووهه العرب بيجون ونسيت منه تعالي يا ماجده امسحيه لي
ضحكت ماجده : لو تخلينه ياجده والله انه حلو
الجده مسكت برقعها: ووش يقولون عني طار عقلها وخرفت تحسب انها رجعت شباب تبين يقولون عن جدتس كذا ؟؟
ماجده : خلاص اللي ودتس امسحها لتس الحين
الجده وهي تسحب اذن ماجده بخفه : كله منتس دامتس انتي اللي حطيتيه لي انتي اللي بتمسحينه يلا الباب قدامتس امشي
هناي تخصرت وهي تناظر وجيه البنات : قوموا صحصحوا بسوي لكم قهوه تغطي على قهوه فهده
فهده : عاد قهوتي تركيه انتي مدري وش قهوتس
نورة وهي توزع بوسات بالهوى : اهخخ كنتس تدرين وش اللي بخاطري بقوم ابخر الصاله اللي بتعاون تفز من الحين
ديم وهي تغسل وجها وفاتحه باب الحمام : طلعوني منها انا توني صاحيه وجسمي مره مكسر
نورة : ماشاءالله عليتس وانا وش كنت اسوي قبل شوي اركض ؟ ولا كنت نايمه مثلتس ؟
ديم ابتسمت وطلعت نص وجها للباب وناظرت نورة ببرائه : نوير قلبي لو سمحتي تعبانه
نورة : شوفوا النصابة تناظرني كذا عشان اخليها بس والله اني مقدر عليتس خلاص اجلسي
تعالت ضحكات ديم : اعرف لتس

-
قرائه ممتعه 🤍
شاركوني ارائكم وتشبيهاتكم في حسابي انستا :
Wrii74