توالفت قلوبنا في عز المزوح وفي عز رعشه خوفي استأمنك

البارت الثامن عشر

قمرا استلقت على الكنب وزفرت بضيق : والله انتي حمارة ياقمرا ليش تبكين ؟ من يكون حمد ؟ وكيف تحبين واحد شك فيك ؟ لو يموت ما وضحت له حبي لين يروح هالحب والشعور الغريب مني
رجعت تتذكر الموقف وتذكرت حمد وهو يهديها ويمسح عليها وخوفه الواضح عليها ونسمه اللي ضرب وجها لما نفخ عليها ابتسمت بلا وعي واخذت المخده وكتمت وجها وصرخت فيه وبعد ثواني تسألت بصوت عالي : من كان يقصد لما قال احب وحده ما تحبني ؟ اصلاً انا وش دخلني فيك تعلمني وليه افكر فيك الحين يالله
فزت من مكانها وهي تضرب وجها بخفه ودخلت الحمام تغسل وجها بالماء البارد وبعدها غفت بتعب وهي حاضنه نفسها
_________________________________
داخل مجلس الرجال
لاحظ خلف عبوس حمد وعقده حجاجه وهدوءه الغريب قام من مكانه وجلس جنبه وضرب رجله بخفه : علومك ياولد حاتم ؟
حمد وهو للحين زعلان على خلف شوي : علومي طيبه وتسرك
خلف : طيب لا تقول ان بغيت بس انا اعرفك اذا فيك شي او لا وانت صار معك شي ومعصب وزعلان منه و ماتبي تقول لي ، الحين مارح اجادلك لان عندنا ضيوف لا تكشر في وجيهم ابتسم
حمد تنهد وابتسم بمجامله: مادريت اني واضح
قاطعهم دخول الشايب الأربعيني : السلام عليكم
الكل ردوا السلام ماعدا خلف اللي سكت بصدمه وناظره وابتسم الشايب من عرف خلف وتقدم لصدر المجلس عند عقاب وحاتم وقعد بينهم
الجد عقاب : ياخلف قم صب القهوه لضيفنا
خلف قال بداخله ( ليه ياجدي ليه ؟ مالقيت الا انا ) : ابشر
فز اخذ الدله والفنجال وكشر بوجه الأربعيني وبرز فك خلف بعصبيه من شاف ابتسامته وعرف نيته وبهمس : اذا تبي السلامه لا تقول اللي تبي تقوله
الأربعيني بطرف إبتسامه : على خير ان شاء الله
رجع مكانه واستغرب حمد من تعابير وجه خلف : الحين تقول لي ضيوف وابتسم وانت مضيف الرجال وشوي وبتضربه من عصبيتك
خلف : اهخخ ياحمد منت فاهم
حمد : ولد الرجال مسوي لك شي ؟
خلف : ياخوفي انه يسوي
الجد : انت منت من الديره كنت بطريق سفر ؟
الإربعيني : اي بالله انا ماني من اهل النعيريه انا جايكم من الدمام
حاتم ( ابو نورة ) : يامرحبا بك
الإربعيني : تبقى
شرب من القهوه واكل من التمر وفز : وين حمام الرجال ؟
خلف بحده مخفيه : حياك معي ادلك
مشى بجنبه وابعدوا من المجلس : هذا هو الحمام على وجهك
فتح المغسله ودخل يدينه في الماي ونطق خلف : انا مدري عنك صح بس والله ثم والله لو تقرب من البنيه وتاخذها وسط المجلس ان مايحصل لك طيب للحين انا اسايرك يالشايب لا تحدني على اللي ما ابيه
الإربعيني اعتلت ضحكاته : ووش اللي ما تبيه ؟
خلف طلع سكين من جيبه : مو بصالحك تراني اذا بعتها بعتها ولا تتوقع اني ب اسكت عشان عمرك ، اللي مايفهمنا نفهمه طيب ولا غصب واللي يدوس لنا على طرف يتحمل اللي يجيه
الإربعيني بلع ريقه ومشى قدامه : مارح تقدر تسويها دامني في مجلس شيبانكم
خلف بحده : الضيف نكرمه ونحطه بالعين والراس لكن اذا ضيفنا وقح ويغلط علينا ويتعدا حدوده ويمس اشياء تخصنا هنا نترك حقوق الضيف على جنب ونربيه ولا اظنك ودك تجرب
تجاهل كلامه الإربعيني ودخل المجلس ولحقه خلف وهو مابعد عيونه منه ورغم تنبيهه الا انه اخذ نفس وقال : يا ال عقاب انا جيتكم طامع في نسبكم واتمنى انكم ما تردوني
غمض عيونه خلف بعصبيه وطلع مسباحه وحاوط اصابعه ولعب فيه واحتدت ملامحه
حمد : كنت تعرف ؟
خلف وهو عيونه على الإربعيني وبهمس : تكفى ياحمد لا يوجعني
حمد : يخسي ما جا على الدنيا اللي يوجعك بعد
حاتم بصدمه : ان شاء الله خير بس انا مستغرب انت بذا العمر ومنت متزوج احسبك انك اب
عقاب : ماقلت لنا من تبي ؟
اعتدل بجلسته: انا ماعرف اسمها انا لمحتها وخذت روحي وبحاول اوصل لكم اللي شفتها هي حواجبها وعيونها شوي حاده ولها خصر وعندها زمام ( خرمه ) في خشمها وكانت عند الغنم والحلال
توسعت عيون الجد ونطق بحده : اعقبب
ركض خلف بغيره : والله انا اللي باخذ روحك يالواطي
ولكمه في وجهه وبعد حمد خلف من الرجال وقرب حمد ولكمه لكمه ثانيه: ما توصف حريمنا يالرخمه
والعيال تجمعوا يفككون بينهم وركض فراس وهو ماسك شماغه ودخل بينهم بسهوله وضرب الضيف مع العيال بفزعه ويده الصغيره تحاول تضرب بشكل اقوى وصرخ حاتم : حمد خلف ابعدوا من الضيف
الإربعيني: كنت عارف مارح تشوفون ضيفكم ينضرب في مجلسكم ومن عيالكم وتسكتون
مسعود : عمي لا تدافع عن ذا الخسيس اجل يوصف الحريم في مجلس مليان رجال !
الجد عقاب : حاتم لا تخيب عشمي فيك وتعطيه بنتك
العيال كانوا باقي على وضعهم وحمد ماسك ثوب الإربعيني وشده له ، حاتم : انا اقول وسعوا من الرجال تسمعوني ولا لا ؟
ابتعدوا واقترب حاتم من الرجال اللي ابتسم : والله انك كفو تعرف لهم
حاتم : وب اعرف لك انا
اخذ فنجال القهوه وضربه بقوه على راسه وتكسر الزجاج وقطع صغيره من الفنجال طاحت على ملابس الإربعيني وفي الأرض ابتسم الجد برضى ورص على اسنانه حاتم : اذا تبي تموت قول كلمه زياده
_______________________
عند البنات
العنود جلست بقهر من كلام قمرا وحب حمد لها اللي وضح قدامها دورت قمرا بعيونها وما حصلتها
العنود : بنات وين قمرا ؟
ديم : ما اعرف صراحه بس تحصلينها تدور برا وتقرا روايتها
فهده : لا ما احس طولت مره
تعالت اصوات الرجال وفزت الجدة بعصاتها وفزوا البنات برعب ولحقو الجده اللي طلعت بعصبيه لقريب المجلس وبصوت عالي : يااعقاااب وش علم العيال ؟
والبنات متجمعين عند الدريشه ( النافذه ) المفتوحه المطله على المجلس ويناظرون بقلق وبعد لحظات خرج الإربعيني وثوبه مبهذل ويستعجل خطواته سكتت نوره من عرفته وانصدمت من شافت طالعين وراه الاحفاد وصدر حمد وخلف يرتفع وينزل بعصبيه
ماجده : بسم الله شفيهم يتضاربون ؟؟
العنود : ياويلي حمد اكيد ضرب احد شوفوا كيف معصب بسم الله عليك وعلى روحك
البنات ناظروا فيها بقرف ، العنود : شفيكم انتوا بعد ؟ اخاف على رجلي المستقبلي عادي
جارالله لمح ديم والبنات من الدريشه ( النافذه ) وبحده : ادخلي داخل انتي وياهاا
التفتوا العيال لمكان النافذه وشافوها تتسكر بهدوء
الجد عقاب وهو يرفع عصاته للأعلى : مابه الا الخير يا منيره ادخلي
منيره : ماني بداخله لين تجي عندي الحين وتعلمني بالموضوع طيرتوا قلوبنا بصياحكم
الجد عقاب كان يعرف عناد زوجته اقترب منها والاحفاد والآباء دخلوا داخل المجلس والبنات اقتربوا من الباب وابتدا الجد يقول للجده منيرة اللي صار بتفصيل والبنات يتسمعون
نورة توسعت عيونها وبهمس: لعنه وش يبي ذا الشايب ماكفاه طرده خلف له بالمره الأولى
هناي : وش سويتي فيه يانورة عشان يصير ذا كله ؟
عهد : حبيبتي هذي بنت حاتم تطيح الطير من السما شرايتس يعني ذا شي طبيعي بنسبه لرجال شافها
نورة ابتسمت : احبتس واحب كلامتس تدرين ؟
عهد وهي تمثل انها اغمى عليها : بنات تقول احبتس امسكوني بطيح
ضحكت نورة وضربت راس عهد بخفه : احبتس ياخفيفه
ماجده : يستاهل ماجاه صراحه هاللي ما يستحي
ديم : بنات امشوا ندخل عشان جدتي ما تدري اننا سمعنا وتضربنا بالعصا
فهده: لا تكفين كل شي الا العصا
ضحكوا البنات من ردها ورجعوا للداخل ونورة مو معهم في الجلسه ابد ، تفكر بحمد وليه خلف ضرب الرجال وهي ما تعني له شي

-
قرائه ممتعه 🤍
شاركوني تشبيهاتكم وآرائكم في حسابي انستا : wrii74