توالفت قلوبنا في عز المزوح وفي عز رعشه خوفي استأمنك

البارت العشرين

لبست قمرا بنطلون يبرز ملامح جسمها وقميص طويل من الاكمام وماسك على خصرها وجكيت طويل ، تعطرت بعطرها الأنثوي وتمكجيت مكياج ناعم يناسب وجهها وكانت قمر اسم على مسمى
فهده بذهول : بسم الله عليتس الرحمن الرحيم عيني عليتس بارده الله يعين قلب حمد على الستايل والفخامه
قمرا : ياكثر الحب لتس ، إلا منتي ناويه تلبسين عشان تغطين علي ؟
فهده : حبيبتي انا لو البس اللي في دولابي كله ماجيت نفس جمالتس
قمرا احمرت وجنتيها بخجل : اطلعي لا اجيكم ووجهي احمر كله منتس
تعالت ضحكات فهده وتوسعت عيونها بلحظه إدراك : تكفين انقذيني ملابسي كلها فساتين ماعندي ملابس تناسب اسطبل الخيول
قمرا : افا عليتس بس ابشري عندي ملابس بتناسب وجهتس وعلى جسمتس بعد بيطلع ناااررر
توجهت قمرا لدولابها واخذت بنطلون ابيض يزينه ثلاث ازرار مزخرفه من كل جانب وقميص كت يمزج بين اللون الأسود والأبيض : يلا لتس 5 دقايق إذا ما خلصتي تركتس ورحت
فهده تمثل العصبيه : اح يالخاينه عقب ما خليتس تقومين وتكشخين بتسحبين علي ؟؟
ضحكت قمرا بخفه وسكرت الباب وراها وتوجهت تسوي قهوه اما فهده انتهت من لبسها ورتبت شعرها البني القصير اللي يعانق عنقها بطوله وتمكجيت مكياج خفيف ، دارت على نفسها برضى وأبتسامه زادت جمالها جمال كانت عيونها على انعكاسها في المرايا واختمت زينتها بلمستها المعتاده وهو عطرها اللي بريحه الياسمين
فهده ركضت لبرا الغرفه وصرخت بفرحة : واااووو قمرا اول مره اجرب البس ذا الستايل يجنن
قمرا بإنبهار : هلا والله بالكشوخي انتي اللي محليه اللبس بعدين حبيبتي ما اسمح لتس وش خليتي للبنات الباقين ؟
فهده بغمزه : شرايتس حياتي قمرا بنت عمي ما تبين اطلع بستايل حلو وشكلي يكون حلو ؟ مانقدر الموضوع وراثه عندنا
قمرا صفقت بيدينها: اللعبب وش هالروقان اللي مخليتس تمسكيني مدح من اليوم ؟ انا بروح قبل تتحمسين وتمدحين اكثر واتوهق لاني معرف ارد ووجهي بينصبغ باللون الاحمر
تهربت قمرا وضحكت فهده وبهمس مسموع : صح ان روقاني ذا مشكله بس ياحلوتس حلوااه
فهده كانت مستلطفه قمرا وجهلت انظار سعود عليها بإعجاب ، التفتت على استعجال وشهقت من شافته يناظرها ويبتسم بدون وعي : وجعااه وش مطلعك انت ؟ صد
سعود صد بإحراج : انتي اللي وش مطلعتس بدون حجابتس في بيت فيه عيال !
استوعبت فهده وضربت جبهتها بخفه وبهمس : ياغبائييي
ضحك سعود بطرف مبسمه من سمعها وركضت لفوق وهي تصرخ بإحراج وتشتم نفسها وهي تبتعد منه وتنهد سعود من ريحه عطرها اللي انتشرت في انحاء البيت ولخبطت موازينه ومشاعره
____________________________
بعد مده اجتمعوا الاحفاد
العنود ناظرت فراس بصدمه : فراس بيروح ؟
خلف : اي ليه؟
العنود : لا ماينفع فراس روح بيتنا يلا
فراس بزعل : لا ابي الوح معكم هيل ( لا ابي اروح معكم خيل )
عهد : العنود خليه يروح مع العيال
العنود بنفي: لا لا لا بعدين اذا رفسه الخيل ولا طاح منه هو باقي صغير
فراس بحده وبنطق اطفال : انا مو صغير انا رجاال
نورة ضحكت : معه حق هو رجال لحد يقوله شي
العنود كانت بتتكلم وقاطعها حمد : هو معي بتكون عيوني عليه لا تخافين
قمرا رفعت انظارها له بحده وبادلها حمد النظر وهو قلبه وروحه عليها
مسعود : يلا ياعيال قبل يقوم جدي وينتفنا نتف
خلف : وهو صادق يلا مشينا
ركبوا السياره وبعد ربع ساعه وصلوا للأسطبل ونزلوا من السياره
قمرا : الله الخيول تهبلل ماشاءالله
حمد قال في داخله ( والله انتي اللي تهبلين ) ، ماجده طلعت كاميرتها الصغيره واخذت بعض الصور للأسطبل والخيول ، حمد : يلا ياعيال عاونوني نطلع الخيول على عددنا
سعود : معك معك يلا
غابوا عن الانظار حمد وسعود لثواني ورجعوا ومعهم عدد من الخيول
خلف وهو يأشر على بعض الخيول: ذي المجموعه لنا وذيك المجموعه لكم
جابر بإستهزاء: هم يعرفون للخيل اصلاً ؟
فهد بضحكه : ما ظنتي
البنات ناظروهم بحده وتقدمت ماجده وهي تسحب الخيل الأبيض وتركب فوقه بسهوله تحت انظارهم وبضحكه وغرور : نسيت اني اختك يا جابر ؟
تقدمت نورة وركبت بالخيل الثاني وانظار خلف تلحقها بإنبهار وصدمه بمعرفته انها خياله وقبل تمشي قالت بصوت مسموع : هذا اللي ناقص بعد
حمد لاحظ نظرات خلف وبهمس : عيونك عيونك صح اني ادري بحبك بس لا تفلها كثير يالحبيب
خلف بنفس الهمس : وش تبي انت ؟ إن لله شكلك بتكلمني بكل صغيره وكبيره
قربت نوره بخيلها من ماجده وراحوا الجانب الثاني وكانت نوره تسمح للهوا يضرب شعرها بقوه ورجعت يدينها بحب وماجده ماسكه اللجام ورافعه راسها تستنشق الهوا وتستشعر بسرور بجوفها
حمد وهو يحاول يخفي ضحكته بسبب مناقرته مع خلف : يلا الباقين اخذوا الخيول
حطت فهده كفوفها على راس الخيل ومسحت عليه بشويش ونزل راسه لها : الله حبيته باخذ ذا
فهد : مسرع ما حبيتيه هو مداتس ؟ توتس تشوفينه
فهده : صح بس شوف خلاني امسح على راسه وقرب مني يعني حتى هو يحبني وواضح ان حنا بنتفاهم
سعود مسك السرج وركبه وضحك من سمع كلام فهده : الله يعطيتس العقل
فهد: ورع اختي ! بدق وجهك
سعود مشى بالخيل للجهه المعاكسه للبنات ولحقه بعدها بثواني جارالله بتضاحيكه ، قمرا وديم والعنود ناظروا الخيول بصمت ، مسعود : خواتي واعرفكم تعالوا اخذوا ذي الخيول هاديه
قمرا ناظرت الخيل الأسود : لا انا ابي ذا
مسعود : متأكده ترا مدري عنه شكله جديد على الاسطبل
قمرا هزت راسها بإيجاب ورجعت انظارها على حمد اللي سأل العنود : البنات كلهم اختاروا ماعداتس ما تبين ؟
العنود بدلع واضح بصوتها : لا مره اخاف منهم بس احبهم من بعيد
تقرفت قمرا من دلعها ومشت بالخيل للبنات ولحقتها ديم
حمد : ايه زين الا ياخلف فراس بيركب معك وانتبه له
خلف : عطني الرجال ذا اخاف اقول الصغير ويزعل
ضحك حمد ورفع فراس ومده لخلف : وصلتك الامانه
مشى خلف للباقين ولحقه مسعود وحمد مسك خيله المعروف بأسم رعد واللي صهل بترحيب وشوق لصاحبه وركبه وهو يرفع ثوبه ويتعصب بغترته ولحق العيال
جابر وهو متصدر على العيال وبضحكه : وين مهاراتكم ياعيال ما هقيتكم كذا تخلوني اسبقكم
جارالله وسعود ناظروا بعض وهزوا روسهم بفهم وضربوا اللجام بالخيل بقوه وضرب بحوافره على الارض وركض خيل جارالله وسعود بعكس بعض يلحقون جابر اما خلف ف كان يمشي بخفه عشان فراس اللي جلس قدامه ونطق بضيق : اسرع نفسهم
خلف : وش اسرع تحسبه سياره اذا سرع مارح يوقف ياحبيبي
حمد كان يركض بالخيل وصار بجانب خلف وشد على اللجام: وش فيك ؟ حتى فراس ضاق
خلف : وش تبيني اسوي اركض به وهو عندي
حمد : بسيطه خله يشد عليك ويتمسك ، وبعدين سابقني ما تعودت عليك تمشي بالخيل على الخفيف
خلف : روح وبلحقك بس مو بالسرعه اللي متخيلها بس ب اجاريك
غمز حمد وضرب برجوله على الخيل وطلع صوت خفيف واستجاب الخيل وركض
فراس بنطق اطفال : ثف حمد اسرع معهم ما ابيك نذلني ابي حمد
خلف بطرف ابتسامه : طيب خلاص لا تجحدني ب اركض امسكني عشان ما تطيح
ابتسم فراس وصفق بفرحه عظيمه وتعالت ضحكات خلف وشد اللجام وضرب برجوله بخفه وركض بسرعه معتدله ولحق حمد ودب قلب فراس برعب والتفت على خلف ودفن وجهه بحضنه وضمه وضحك خلف وابتسم بحب : ياصغير ناوي تاخذ قلبي وتاخذ مكان ولدي قبل يجي ولا وش ؟
نزل غترته وغطا ظهر فراس فيه : لا تخاف انت شجاع شوف حمد بنسبقه
التفت فراس وناظر بعيونه على حمد اللي شهق من شافهم : بتسبقوني ؟؟
خلف : اي الفارس فراس بيتجاوزك
حمد دق تحيه لفراس: ونعم يالفارس
ضحك فراس وآشر على العيال اللي بعدوا منهم بمسافه: خلونا نلوح عندهم ( خلونا نروح عندهم )
خلف : بنجيهم ماعليك انت وش تبي بس وتم
حمد حرك حواجبه بخفه : علوم فراس معك حب الخيول ويوم سرعت انبسط؟
غمض عيونه خلف عشان ما يشوفه فراس وهز بنفي ، حمد : افااا يافراس سمعت انك تخاف ؟
فراس بحده : انا ما احاف
خلف بإستهزاء: صح هو رجال ما يحاف شفيك انت ؟
تبسم حمد واختفت ابتسامته وضحكاتهم من قاطعهم صوت صراخ البنات وسمعوا عكس العيال الباقين بحكم انهم قريبين ، خلف : اخو العيال وش علمهم ؟
حمد : ولد انا بروح وانت لا تجي لان معك فراس انا ب اسرع بالخيل ولا تتكلم للعيال يمكن شي بسيط
خلف : اعجل طيب
حمد عقد حجاجه بخوف وشد اللجام وضربه بخفه وطلع صوت وركض بالخيل لجهه البنات ...

-
قرائه ممتعه 🤍
شاركوني ارائكم وتعليقاتكم اللي تعطيني باور وتحمسني اكتب اكثر لا تحرموني منها ، حياكم في حسابي انستا تشاركوني التشبيهات هناك ونتكلم عن الروايه في الستوري مع بعض : wrii74