توالفت قلوبنا في عز المزوح وفي عز رعشه خوفي استأمنك

البارت الثامن

فهده بإندماج مع المسلسل بكت وشهقوا البنات فزت نوره لها : بسم الله عليتس شفيتس ليه الدموع ؟
فهده وعيونها تلمع من تجمع الدموع على محجرها وبيدها المكسرات: اهخخ يابنات بطلي مات
هناي ضربتها بالمخده : حسبي الله على ابليستس ما خليتي فينا دم
نورة زفرت براحه : وانا احسب جاتس شي
ماجده ناظرتها بصدمه : تبكين عشان ممثل ؟ والله ما عندتس سالفه
ديم وهي تشوف دموع فهده : الحسي دموعتس مع المكسرات وعلميني كيف الطعم ؟
عهد بضحكه : دموعها مالحه وعاد المكسرات مالحه اكثر
قمرا نزلت لفهده وحضنتها : ترا عادي الواحد يبكي عشان مسلسل شفيكم عليها !
ديم : طبعاً تهاوشكم لانها تبكي على كتب وروايات
قمرا توسعت عيونها : حيواانههه ما تفضحيني طيب اختس ياحمار
ديم : قبل ثانيه تقولين عادي الواحد يبكي غيرتي كلامتس ؟
عهد تخصرت : اههه تكفوون وش هالفراغ والملل
نوره: دام ماعندتس شي قومي عاوني جدتي برا
عهد فزت : والله ؟
______________________
عند الدكه
الجد : يا منيره الا ترعين الدجاج خليهم ارتاحي والعامل يعطيهم اكلهم
الجده : ياعقاب مابعد راحت قوتي خلني اتحرك وارعى الحلال
عهد وهي تلوح يدينها في الهوى : ياجده جيتس جيتس ب اساعدتس
سلوى ( ام هناي ) : الله يرضى عنتس يابنتي بعدي
مسكت ذراع الجده وتجاوزوا العتبه ودخلت المفاتيح على شبكهم وانفتح الباب : يابنيتي اخذي اكل الدجاج شوفيه قريب من الباب والحقيني
عهد وعينها على عدد الدجاج برعب : إن شاء الله
لحقت الجده وابتدت الجده تعلمها وفردت يدينها المليانه تجاعيد وفيها كميه من اكلهم : ذي الكميه بتكفيهم ارميها عليهم وانتهى
عهد بدأت تطبق كلام الجده فردت يدينها وتوسط كفها الأكل ، لحظات واجتمعوا الدجاج حوالينها وتجمدت من التوتر وغلطت غلطه انها ما رمت الاكل عليهم ، صرخت عليها الجده : ارمي الاكل في الأرضض !
عهد بتوتر بكت بصمت : جده مقدر ياجده كلهم حولي اخااف
تسابقوا الدجاج عليها والديك تشبث في ملابسها ونقزت الدجاجه على شعرها دوت صرخه منها وتراجعت وصدمت بجابر اللي كان واقف وراها وبيده اليمين طاسه حليب النياق مسك ظهرها وشهقت وكان وجهه قريب من وجهها لدرجه لاحظت الضربه اللي فوق عينه وحواجبه المرسومه وعيونه الحاده كل ذي التفاصيل اخذتها مع صدمتها وفرق الطول وضح حيث ان عهد توصل لصدر جابر اللي ضحك بخفه : افااا يا بنت عبدالعزيز ماهقيتس تخافين من دجاجه !
الجده مسكت راسها من الفوضى : لو اني داريه انتس خوافه ما دخلتس معي عدمتي المكاان الله يصلحتس
عهد ماردت ودموعها تهطل على خدها بهدوء وماقدرت تتحرك جابر ناظر وجها وابتسم : شكل عاجبتس مكانتس في حضني
بعدت منه بسرعه وارتبكت: آسفه آسفه بلغلط
جابر صد وحط الطاسه على الأرض : حصل خير،  ياجده ترا الحليب هنيا
مسعود توجه لهم وهو مشمر اكمامه وباين عليه التعب وحجاجه معقوده ومتعصب بغترته رق قلب الجده على منظر احفادها : جدكم نفضكم نفض خلاص يا عيالي لا تشتغلون
مسعود : الأمور هينه جعلني قبلتس خلصنا اصلاً كل شي
_____________
عند المحلات
حمد وخلف وجارالله وسعود متكين في الكراسي الشعبيه اللي برا ويمينهم ويسارهم المحلات البسيطه قطع سوالفهم رنه جوال خلف ورفع السماعه ورد : يامرحباا سمعت انك جيت
خلف : الله يحيك ، اي والله ونسيت من جزار
مشعل: دقيت عليك عشان اشوف شوقك له
خلف : انشهد اني مشتااق له اذا فاضي مريتك انا والعيال
مشعل : حياكم القهوه على النار وبجهز لك جزار
- انتهى الأتصال -
حمد ابتسم : ها ؟ جزار ؟
خلف هز راسه بإيجاب: سعود دق على اخوك وجابر وعطهم علم اننا بنروح المقناص
جارالله : هو بعيد ولا قريب مكان خويكم ؟
حمد : تقصد مشعل ؟ مهوب بعيد بزياده قول ربع ساعه حولها
سعود : يعني اقول لهم ياخذون سياره جدي القديمه ؟ احنا لحقناكم مشي ما معنا سياره
خلف : اي كلمهم
_____________________
عند البنات
هناي كانت ملاحظه ركود عهد وصمتها حطت يدها على كتفها وبهمس : صار لتس شي ؟
عهد بنفس الهمس : قولي وش ما صار ليتني ما قمت ورحت مع جدتي
هناي ناظرتها بتركيز وكملت عهد : الله وكيلتس تجدولت بسبب الدجاج لعبوا فيني
هناي ضربت راسها بخفه : انتي وش موديتس صوبهم مسويه شجاعه وانتي من جنبها ما تذكرين يوم رحنا المزرعه وش صار لتس يوم قربتي منهم ؟
عهد : اسكتي ما تساعديني ترا رجولي ما احس فيها من الخوف تدرين في وحده تربعت فوق راسي !
هناي انفجرت تضحك والبنات التفتوا لها وعهد غطت وجها بإستسلام من الفضيحه اللي بتجيها : انتي ما تعرفين تتحكمين بضحكتس مايكون في بطنتس علم ؟ لازم تشهرين فيني
فهده : ليه وش صار يوم تعصبين عليها عهد قولي لنا نبي نضحك مثلها احتاج والله بعد دموعي اللي خلصت على المسلسل
سردت لهم عهد الموقف ووجها احمر وتكتمت في موضوع جابر
______________________________
مسعود انتهى من الاتصال وفز : جابر العيال يبونا نتخاوى
جابر : وين ؟ ذي الديره فيها فعاليات عشان نطلع ونفرفر؟
مسعود مسك يده وسحبه عشان يوقف : بنروح المقناص بس قبلها لازم ناخذ سياره جدي لانه المكان يبعد شوي والمفتاح ظنتي عنده
جابر رفع يده : تبي كلمه انت انا برا الموضوع يصفقني بالعصا مافيني شده
مسعود دف جابر قدامه : امش اول بنشوف السياره يمكن حظنا يكون معنا وما نحتاج مفتاح
جابر بيأس خطى خطواته وتقدموا للسياره اللي كان كاسيها اللون الكحلي وموديلها قديم : يلا شوف حظك وارضى به
مسك مقبض الباب وفتح وضحك بصدمه : كيف كذا ! يلعنم الوناسه واخيراً بنروح مكان
مسعود وهو يقلده : حظك وارضى به اركب اركب
ركب مقعد السايق وشغل السياره وركب جنبه مسعود  ، بعد دقايق قليله دخلوا للسوق الشعبي وجابر متكي يده على الباب ويده اليمين ماسك الدركسون وفي طرف شفته الزقاره ومولعه وغترته الحمرا على راسه بشكل مهمل
مسعود بصوت عالي : يلا يعيال
تقدموا وركبوا ورا بعض ونطق سعود : ول ول ياجويبر وش ذي الدخوليه عذبت قلوب
جابر : افا عليك ياولد العم اعجبك
حمد : يا تسبدييي بس امشوا
ضحك جابر : شفيك ولا انقهرت عشاني اوسم منك ؟
حمد : يقلع الله ذا الوجه ترا خلف يغطي علينا
تنحنح خلف وضحك من نظرات العيال له ، حمد : يالعشير مدحتك بس لا ترفع صدرك عاد
مشوا وسط سوالفهم ومحاشراتهم وضحكهم ووصلوا لوجهتهم وترجلوا من السياره تقدم مشعل ومسك يد خلف ونطق بخشونه : خشمك
وسلموا على بعض ( سلام رجال )  ورحب بالعيال وقلطهم على القهوه وجلسوا بالفرشه
خلف : وين جزار وين روحي اللي مبطي عنه ؟
سعود : الناس تشتاق لحبايبها في ذا الشتى وذا يشتاق لصقره
اعتلت تضاحيكهم وفز مشعل : في السياره انزله الحين
اختفى ثانيه ورجع بجزار وكان ماسكه بالمنقل على يده ورحب خلف بصوت عالي من شافه: يامرحباااا بدهر قلبيي
فز واخذ جزار من مشعل ومسح على بطنه وتلثم بالشماغ الأبيض ورفع البرقع عن الصقر وقال بصوت خفيف : الحمامه موجوده ؟
مشعل رفع الحمامه بإبتسامه: نجهز الدقيقه ؟
خلف : جهزها وان ما جابها قبل الدقيقه انا مافهم شي ثقتي في الجزار ثقه عمياء
جابر : الله والثقه خلك قد كلمتك وجيب يا مشعل ثلاثه مو حمامه وحده
خلف وهو يعرف اخوه وحبه لتنافس: تم والله انه تم
جهز مشعل الحمامات وجارالله فتح المؤقت وبدا يحسب ورفع خلف صقره وبصراخ : ياجززاارر
ارتفعوا الحمامات وجزار لحقهم ومرت ١٥ ثانيه وذبح جزار الحمامه الأولى وبعدها ب ١٠ ثواني ذبح الحمامه الثانيه وعدت ٣٥ ثانيه وذبح الحمامه الثالثه وتساقط ريش الحمام على الثرى واختلط التراب بالدم ، وكأنه اخذ من اسمه نصيب وقلب المكان مجزره
خلف وهو يترقب جزار راجع له ووقف على المنقل بشموخ : كفووو ماخيبت ظني فيك
جابر ضرب كتف خلف : والله وطلعت قد كلمتك
ابتسم خلف ورجع نظره على صقره : وطلع جزار قد الهقوه
حمد بفرحه شققت وجهه : صقرك مثل راعيه ماعليه خوف وانت يا جويبر كسر خشمك صويحبي
سعود ضحك : حميد فرح اكثر من خلف
خلف ابتسم : ياجعل صويحبك يفداك
جابر ناظر حمد بطرف عينه : اللي تقول عنه كسر خشمي اخوي يالحبيب
حمد بضحكه وهو يبي يستفزه : كسر خشمك ولا ما كسره ؟ جاب الثلاثه مذبوحين وطرققق
جابر فز وبحده: خلف شرايك تمسك ولد عمك ؟
خلف وهو يمسك صدر جابر ويرجعه لورا : اهجد
ضحك حمد من حس بالإنتصار وشاف جابر متنرفز التفت له خلف وضحك من ضحكه : انت يابزر اترك عنك هالحركات

-
قرائه ممتعه 🤍
آرائكم ؟