سعير الهزيع

سعير-24-

- سعير الهزيع
بقلمي : جوانا الأمين ..

فضلا و لطفاً و ليس امراً تصويت و تعليقاتكم الحلوه املوهه بين الفقرات 🦋

-

يمة طلع الدرب طويل
و نصيبي بالدنيا متعوب
عليش احارب هذا الدرب
و اجيب التعب لروحي

-

مريم :- حياتي صارت هادئة ماكو شي جاي يصير مجرد نفس الروتين يوميه ويا اكبر او فهد
ضحى كثرت اهتم بيهه اكثر بسبب خمولهه الشديد و ورم جسمهه صاير يخوف

غيث تغير كلياً ماعاد يهتم بيه او يدري اكو احد ويا بالبيت ناسيني كلياً صاير كلش كلش متعلق بضحى ينام طول الليل بصفهه و ضال لازم ايدهه

يبجي و اني موجودة يمرد كلبي من يبجي و يشهق و لا متهم بجى كدامي او لا المهم مرته جاي تروح من ايدينه

فهد تعلق بيه و ضال وياي طول الوگت
اشوف لوعه ضحى بعيونهه وهي جاي تشوف فهد لازك بيه لزك بس ينام يمهه و يحضنهه .

اشوف بعيون ضحى مرات حجي بس اتجاهل اسالهه ضحى صدك تعبتني بدموعهه و كتومهه
تكتم وجعهه صايره ما تهتم المهم تشبع من عندنه

كل شوي تريدني اكعد يمهه و من يجي غيث انطي راحته اخذ فهد ونكعد بالحديقه بالكراج نلعب بالمطبخ نطبخ سوه حتى غيث ياخذ راحته وياهه .

جانت الدنيه عصريه و كاعدين اني و فهد و ضحى وحدنه بالصاله غيث طالع من الصبح و لهسه ما راجع

كمت عصرت عصير برتقال علمود ضحى و عصرت الي و الفهد كملت و اخذت كيكه الفهد هم رجعت انطيتهه العصير و كعدنه بالكاع اني و فهد يم ضحى وهي فوك على القنفه

- ضحى : تعبتج وياي

- تره والله دتضوجيني ضحى شبيج شنو
تعبتج شمسويه قابل

- مريم اني عندي اهل و اخوات تاركيني بيدج و انتي الغربيه حنتي عليه وهمه لا

- مابيهم نفع طزز بيهم

- يااا هههههه

ضحكت على ضحكتهه الذبلانه دنكت راسهه
تكمل عصيرهه و عيونهه شارده بالفراغ ماجاي افهم شجاي تفكر طول الوگت اتمنى بس لو اكدر افهمهه بس المشكله اني صعبه اواسي احد
او افهمهم

اندگ الباب المطبخ كمت جريت حجابي من رگبتي و لفيته طلعت صار بوجهي يمن عيونه حمر و اعصاب يتراجف استغربت منه

- ها يمن شبيك

- يمن : تعالي

- وين

- للحديقه الهزيع و خالج يريدوج

- لحظه انطي خبر لضحى

هز راسه و راح رحت انطيت خبر لضحى
و طلعت ركض للحديقه احمد واكف يفتر و ايده
على راسه شافني من اجيت اجه ركض عليه و كمز وراه الهزيع مادري شصار انسحبت ليوره
و صار يمن كدامي واحمد يصيح مثل المخبل