مابعد الشِقَاق

المحطة 10

بسم الله الرحمن الرحيم
# مابعد الشقاق
# للكاتبه لَيـل

عَلى درب اليردون انه دوم انتظِر
ها بلّـكت يعودون ، ماواحد يمـر

--------------------------

مُلهم : الاوضاع بالموصل جاي تصير اسوء والمنظمه احتلتها بالكامل
الجيش يتقدم بصعوبه بيها وعدد الشهداء والجرحى بتزايد مستمر
كل بالي يم خالي ومحمد بالصفوف الاماميه
بين يوم ويوم اروح الهم او همه يجون نتشاوف عالسريع وكلمن يرجع لشغله
تعب قلق خوف ومن ناحية ثانيه بعدنا عن اهلنا ماذينا وصلنا لمرحله مانلحك نتصل عليهم ونحچي وياهم

گاعد بالمقر الجراحي واجه صاحبي

-هاك خويه سيادته يريدك

اخذت التلفون وحاچاني خالي
- ها بويه مُلهم ، رتب وضعك دبرتلك نزول يومين

- عاشت ايدك خالي بس شوكت؟

- بالليل من يخلص شغلك اطلع

- محتاجين شيء اجيبلكم وياي

- بس شوف الاهل شمحتاجين ورتب وضعهم لان صعب بعد ندبر نزول
رتبلهم كلشي وارجع

- صار خالي

سد التلفون وانطيته للولد ورجعنا نشتغل
الوضع ماساوي كلش
امرار تتاخر المواد الطبية ونضطر نسوي عمليات بتر وقطع اعضاء بدون تخدير لان مانكدر ننتظر نخسرهم فالوضع والصريخ كلش مؤذي
خلص واجبي وصار وقت استراحتي لميت غراضي ولبست جنطتي واريد اطلع واجه صوت من وراي

-دكتور مُلهم الحگ خالك

لحظات صفرت اذاني بيها حسيت الدنيا ضاگت بيه والنفس ضاع
وگعت الجنطه من چتفي وركضت للمقر
الاطباء ملتمين وخالي گدامهم متروس دم !!
اريد ابعدهم اريد بس أوصله فقدت اعصابي
گعدت على ركبي گدامه وانه اتوسل بيه

-بويه لا تعوفني لا تعوفنا تحمل تحمل
-ماراح يصيرلك شيء ما تموت ما تعوفنا بويه منو النا من بعدك

احچي ومنهار لحدما اشرلي اقترب وهمس بصوت رايح

-محمد 

- شبي محمد خالي شبي

-محمد

يحچي ويجر بالنفس گوه اشرت لصاحبي يروح يشوف محمد وين
وتقربت من خالي

-لا تخاف ياروحي مابيه شيء محمد هسا يجي هسا

التفت عالاطباء محتارين شنو يسوون يحاولون يوگفون النزيف بس عبث كل جزء بجسمه ينزف
اشرلي اقترب منه ولزم ايدي باخر ماتبقى عنده من قوه وهمس