بسم الله الرحمن الرحيم
#مابعد الشقاق
#للكاتبه لَيـل
اتمنى اوخر تراب گبره
وانزل واشم ذاك عطره!
خايبين ماشايفه صايرلي فتره
عمت عيني عليه نايم بمتره
شلون اعوفه وحيده نايم
ذاك الخلص كل عمره صايم!
غرب زينه وتبقى البهايم !!!
الدنيا زينها مايضل دايم.
--------------------------
منى: شنو نشلت يمه يعني بعد ماتگوم ماتتحرك
امي هزت راسها بمعنى اي
دنگت لخالتي بوستها وهي بس الدموع تنزل من عيونها
شلون بيوم وليلة حياتنا كلها انهدمت وكلشي تغير
طببنا خالتي لغرفتها شالها مُلهم خلاها عالچربايه وامي گعدت يمها وتبچي
مُلهم: منى وين ميار؟
منى: فوگ بغرفتها
صعد يريد يشوفها لحگته شفته مادخل بقى بالباب
وصوت بچي طلع من الغرفه
رحت بصفه اريد اشوف شنو صار
لگيت ميار وياقوت متحاضنات ويبچن باوعت لمُلهم عيونه حمر وگوه لازم نفسه مايبچي عافنا ونزل
دخلت يم البنات حضنتهم اثنينهم وگعدنا نبچي سوه ياقوت چانت هادئه كلش بس صوت الشهگه والدموع تارسهه وجهها عكس ميار الي چانت ماتعرف شنو تسوي من القهر
سمعنا امي صاحتلنا نزلنا انه وياقوت ميار رفضت تطلع من الغرفه
عَمره: يمه اعرف حزننا چبير وادري حتى وگفتنا على رجلينا صعبه بس يايمه الي راحو شهداء ولازم نگوم بفاتحتهم وانه مااگدر وحدي اريدچن وياي
منى: صار يمه
ياقوت هزت براسها بمعنى اي مُلهم چان طالع شويه واجه ويا هواي غراض ووياه مره چبيره شويه وبنيه شابه
عرفنا بعدين ذني ام صاحبه وبتها واجو يساعدونا لان فاتحه وهواي ناس
للظهر البيت نترس ناس وامي متصله على مُلايات يقرون جهزنا كلشي يخص الفاتحه احنه بالمطبخ ونسمع صوت المُلا علا وچانت بطلب من امي القرايه مو عالموتى انما عالامام الحسين عليه السلام لان هو سيد الشهداء وكل شهيد راح يلتحق بيه
وفصل من المجلس على السيد القاسم عليه السلام باعتبار هو شهيد وعريس ومحمد سوده عليه هم شهيد وعريس
امي طبت يم النسوان بالفاتحه وتلطم وتملخ بروحها وتصيح
-اخ ياخويه كسرت ظهورنا يابو محمد كسرت ظهورناا
ميار مانزلت من غرفتها ابد وياقوت صدمتنا كلنا وحتى خفنا عليها واگفه بحيلها وشالت الفاتحه هي وامي شيول
حتى من تشوف وحده من النسوان تساعد امي بشغله ماتقبل وتاخذها منها
خلص اول يوم فاتحه بس نهد حيلنا البيت مافرغ من الناس واكو بيهم باتو يمنه
بحيث مابقى مكان النا ننام وكلنا نزلنا نمنا بغرفه خالتي عدا ميار الي ماقبلت تفتح باب غرفتها نحاچيها تكول انه بخير بس عوفوني بحالي مُلهم ماكدر يدخل بسبب الهوسه مال النساء بالبيت وبات برا بچادر الزلم لان حتى بيتنا ذاك نترس ناس وزلم
ثاني يوم گعدنا من وقت نريد نلحگ على الشغل اول مافزيت لگيت ياقوت نايمه بحضن خالتي وحاضنتها
عفتها على نومتها وطلعت من الغرفه لگيت امي بالمطبخ گاعده تسوي ريوگ للناس واكو مره جاي تساعدها طبيت ساعدتهم
شويه وندگ الباب مال المطبخ فتحته طلع مُلهم
أنت تقرأ
مابعد الشِقَاق
Mystery / Thrillerلِبـطـلٍ حَـنون بطـريقةٍ مُـتعبـة، صَـلب ومتهـالك،غامـض لدرجـة تُصيبك بـالرهبة.
