بسم الله الرحمن الرحيم
#مابعد الشقاق
# للكاتبة لَيـل
فارگتهه وروحي لسة تريدها
هي مو تدري النفس ظل بيدها
عني راحت ليش ياهو يفيدها
ادري ماكالت وراي انسان مايكدر يعيش؟
هي شمسي وغربت ..المن؟ وليش؟
__________________________________
منى: صار الي صدمنا كلنا ياقوت حاضنه قبر خالي وتشهگ وتحچي
-بابا بابا اگعد بابا اجيتك انه ياقوت بنتك
بابا بس شويه بس اشوفك مره
ضلينا صافنين متفاجئين على فرحانين مانعرف شنو نسوي
مُلهم: يمه جاي تحچي ولله تحچي شوفيها
عَمره: اي يمه الف الحمدلله
راح مُلهم تقرب يمها وهي تبچي ما مستوعبه شنو الي صار وعليمن احنه فرحانين
مُلهم: ياقوتي حبيبتي الحمدلله الحمدلله
باوعتله بعدم فهم وهدأت شويه
ياقوت: هاا؟
مُلهم: صوتچ بويه صوتچ الف الحمدلله ربي
استوعبت رجع صوتها حضنها مُلهم فرحان
عَمره: سبحان الله كومه اطباء وكومه علاجات وطلعت علاجها يم قبر اهلها الك بيها حكمه ياربي
منى : گعدنا يمهم امي طلعت القران وگامت تقرا ومُلهم نضف المقبره داير مدايرهم حطينا بخور وغسل القبور بمي ورد واكو شتلات وورد حاطي قريب يمهم هم سقاهن
صارت الدنيا العصر مُلهم گال
-خل نروح لامير المؤمنين
الليل كله چنت بضريحه ادعي وماقصر اروحله فدوة مولاي
ياقوت ماقبلت تعوفهم وتروح
ياقوت: بس شويه ولله ماشبعت منهم مُلهم
مُلهم: ولله اجيبج بس ورانه طريق ياقوته
ماقبلت ابد انتظر مُلهم فد عشر دقايق ورجع طلب منها تگوم حتى نروح واحنه وامي نقنعها
لمن حلف مُلهم يجيبها يلا قبلت مشينا وهي كلسا تلتفت عليهم وتبچي
مُلهم: ياقوت بس باعيلي وروح خالي وروح مُهاب اجيبج بس لا تبچين مو شلعتي گلبي
هزت براسها بمعنى تمام ومشينا اخذنا للامام زرنا وصلينا وتشكرنا من مولانا وطلعنا
مُلهم: مو جوعانين؟
ميار: انه ميته جوع
عَمره: وانه هم جوعانه
أنت تقرأ
مابعد الشِقَاق
Mystery / Thrillerلِبـطـلٍ حَـنون بطـريقةٍ مُـتعبـة، صَـلب ومتهـالك،غامـض لدرجـة تُصيبك بـالرهبة.
