مها عقب كل اللي حصلته من أهلها بسبب الفضيحة الجماعية لبنات الشلة ، وعقب ما سودت وجه أهلها... عرفت برجعت شوق وقررت تكلمها ومادامها عارفه كل السالفة من شذى فقررت تحاول تستخدمها ،، بس شووق هالمرة كانت أقوى من المرة السابقة،،.. كانت أقوى بكثير !!
من بعد هالمكالمة جلست شوق في مكانها،،. كانت ناسية سالفتها ويا فهد مؤقتا بوسط هالحزن اللي هم فيه ، لكن مها رجعت تذكرها بذيك التفاصيل اللي حصلت لها مع شذى وأريج ...
قامت من مكانها وراحت تشوف نجلاء ، والجرح اللي قرب يلتئم رجع ينفتح وينزف .. طلت عليها لقتها على حالها بالسرير من غير حركة ولا صوت ..
سكرت الباب بهدووء وماكانت تدري بالانسان اللي واقف قريب منها يطالعها... التفتت بتكمل طريقها بس تسمرت خطواتها وهي تشوفه واقف بقمة الدرج يطالعها بصمت....
"وينك ؟؟"....قاله قلبها وهي تناظره!!... شافت بعيونه الشووووق والحب والحنية .. وأكبرها اعتذار العيون كانت تشوفه !..
كابرت وتحركت من عنده وهي تتذكر كلام مها... الود ودها تاخذ الجوال وتشوف كلام مها صحيح ولا لا ..!!..
ناداها : شوق ؟
وقفت وناظرته .. فهم نظراتها وقرب : ..... متى جيتي ؟؟؟
رفعت حاجب تطالعه .. ساخرة : من يومين .. وانت مو داري عني ؟
تنهد من اسلوبها وهي نزلت عيونها ،،.. يومين وهو مو داري عني وش كثر هالشعور يعور..
فهد : اسف بس تدرين بالظروف !.. ما سمحت اني أعرف !!
شوق بسخرية من ورا قلبها : طيب عاذرتك !
فهد وهو يحاول يطيب خاطرها : .....اخبارك؟؟
شوق بنبرة ساخرة : ..مو أحسن من قبل... انا هي هي مثل ما خليتني .. نفس حالي مافي خير شفته من عقبك !!
شافته ينزل راسه وهو يعض على شفته ... أخيرا رفع راسه : خلي الوضع يهدى .. وبعدها لي جلسة معك
شوق : لا تستعجل لأني مو متحمسة أبد
ظهر التعب اللي كان على وجهه .. وصار واضح .. هز راسه لأن هاللحظة بالذات ماله حيل يتجادل معها ..
فهد بتعب غطى على صوته ، وشماغه على كتفه : أظنك اكبر واعقل من كذا... ظروفنا هاليومين تنسي الواحد حتى يفكر في نفسه... فساعديني يا شوق انا حدي تعبان وأبي حياتي تتعدل ..
لانت وتأثرت من نبرته وحاله .. " تذكرت كلام هديل أم الطفاقة " .." انا لو مكانك برجع له وأول شي بسويه ..باخذه بالاحضان وبسأله.. أنا وشو بالنسبة لك ؟ "
ودها يا ناس.. ودها لكن.... قاطع أفكارها : شخبارها نجلاء ؟
شوق : .. نايمة ...
هز راسه وكأن الجواب يرضيه ...
يوم تحرك خطوة نادته بخوف وتردد : .. فهد!
وقف لها بابتسامة تعبانة :... لبيه!
شوق بتردد تدري ان هذا مو وقته : ... هو ... صدق ان.......( سكتت)
تبي تسأله عن الصورة بس ما قدرت تكمل .. وفهد سأل وهو يقرب : .... ايش؟؟؟؟؟؟
ذكرى المكالمة قبل شوي والأفكار المزعجة عنه خلت عيونها تلمع بحززن.. وفهد لاحظ هالشي وقرب : شفيك الحين؟؟.. شي مضايقك ؟؟
شوق من غير لا ترفع راسها : ... لا بس.....مها اتصلت قبل شوي ... وقالت كلام ...
تنهد وكملها بهدووء : ..عني ؟؟؟
هزت راسها ايجاب تبي منه جواب صريح
فهد بألم : للحين تشكين ؟؟..
شوق ماردت... وفهد كان صدق تعبان
فهد : مارح ارد عليك اليوم انا اعترفت لك من قبل يا شوق .. واذا تبين كلام أكثر من عيوني بس....... الحين انا تعبان وقت ما تهدى الأمور بجلس معاك واسألي اللي تبين ... خلاص!
ما تدري ليش حست من نبرته انه طفش منها بس فهد كان قاصد... بان الضيق على وجهها وفهد ابتسم وقرب منها .. لين صار فمه عند اذنها وهمس لها بشغف : صدقيني أحبك بكل حالاتك...
شوق تيبست ما تحركت ما أصدرت ردة فعل !.. وفهد ظل مدة مثل ماهو مبتسم يبي يشوف ردة فعلها ..!
أخيرا تراجعت من نفسها وهي تحاول تغطي على مشاعرها :... تحسبك بهالطريقة بتكسبني !!
ضحك بنعومة عليها.. واضح عليها تكابر واضح كل شي على وجهها.. أما شوق تركته ماتبيه يشوف ملامحها المفضوحة ..
وهي رايحة وببرود : .. طريقتك ذي ما تنفع معي ..!
اختفت عنه وهي مبتسم .. مستعد أتعلم كل الطرق لو تبين !!...
ارتدت عيونه بشكل عفوي لباب نجلاء ،،. وراح غرفتها يشوفها .. فتح بابها بهدووء، وقبل لا يفتح النور سمع صوت ونات وألم .. خلته يفتح النور بسرعة ويشوف اخته تتلوى بمكانه وهي تصيح ..
قرب منه بخوف : نجووول شفيك؟
نجلاء وهي تصيح : بموووووت ياخوي بموت !
فهد : شفيك وش تحسين فيه !؟ قومي اوديك المستشفى حالك كذا ما ينفع
نجلاء : لا خلني تكفى خلني .. الموت أهون علي من ذا الحياة .. قلي وشو له أعيش.. وشو له اعيش يا فهد وسعود تاركني
فهد والهم بياكله : وشو له تعيشين ..؟؟؟... لازم تعرفين الحين انتي لمين تعيشين ... عشان هاللي في بطنك ..بتعيشين له يا نجلاء من له غيرك
فتحت عيونها وناظرت بأخوها بألم ... ونغزة ألم خلتها تغمض عيونها وتضغط على يده ... فهد عرف ان اللي فيها شي كبير لازم يوديها المستشفى
نادى على امه وجت بسرعة ومعها ندى ووراها شوق ..
ودقايق كان مع امه واخته بالسيارة وعلى المستشفى ...
أنت تقرأ
رواية انتقام ينجب الحب ( سعوديه )
Randomفي وقت كان قبل منتصف الليل بساعة ... رياح نهاية الربيع هبت وهزت معها الأشجار الخضرا والأزهار الملونة اللي كانت مجملة الحي .. اللي كان من اجمل أحياء الرياض وأرقاها .. في وحدة من البيوت اللي كانت في الظاهر تشبه القصور .. وفي وحدة من غرف الدور الثاني :...
