من أنا.. الجزء الثاني

01

  بــعد مـرور ســـنتين :
      نضت على صوت الرافاي اصلا مارقدتش طول كنت غير نستنا فيه يصوني كشغل صفارة الانطلاق، هزيت تلفون حبستو ورحت نجري دخلت لدوش غسلت روحي وبروسيت سناني ورجعت للاشومبر الضلمة غير ندهمس بقيت نشوف فالخزانة ونجبد في قشي خلعني صوت وحيد _ها صبحي لاه يعني وش منوضك على 5 تاع صباح راه مزال لحال عمري لاه ديما مزروبة_ ياوحيد راني ليل مرقدتوش تخمامي اكل في هاذ النهار متنساش بلي عامين وانا نستنا في هاذ النهار بفارغ الصبر ، ناض قعد غير فبلاصتو _ علابالي عمري ومام انا راني متحمس بزاف لهاذ النهار _هيا مالا نوض راني مقدرتش نصبر وديجا لازم حنا نلحقو قبل الجميع ، جيت فايتة من قدامو راح نشعل الضو جبدني من يدي قعدني فحجرو_وحيد خليني نشعل الضو ونجبد قشي نلبس منيش قادرة نصبر _اتكالماي وشبيك فروحة ، حطيت يدي على كتافو وتحضنتو _الله غالب مش بيدي هاذي الفرحة دير هكذا ، باسني من خدي وهمسلي في وذني "مُنذ أن عرفتك وأنا أضيء .. كأني ابتلعت القمر في قلبي‏" _ياعمري وليت تقول شعر_لا هذا مش شعر _واش هو مالا، ضحك _منعرف بلاك غزل المهم كلام يعبر على وش فقلبي _نحبك انا _وانا نموت عليك _هيا نوضي منحكمش كثر علابالي قلبك راه في الجمعية والافتتاح تاع ليوم _ايه والله النوم ماذقتو من الفرحة منيش مصدقة بلي فتحت جمعية نعاون فيها لولاد لمتشردين وخصوصا اليتامى _الحمد لله هذا بفضل ربي_بفضل ربي وبفضلك نتا وعايلتي ربي يخليكم ليا ، نضت شعلت الضو ورحت توضيت صليت ودعيت ربي يوفقني وينور طريقي ،  مع كملت طول فتحت البالكو  وطليت على دارنا لقيت ضواو شاعلين عرفتها ماما متحمسا ومتوترا كثرمني ، عيطتلها فتلفون _صباح الخير ماماتي_صباح الفل والياسمين نضتي بنتي ؟_ ايه من قبييل وديجا من فرحتي مارقدتش كامل _مام انا بنتي هيا روحي وجدي روحك وفوتي لعندي باباك ملي ناض وهو يستنا فيك _ايه يالغالية شوي هك ونجي ؛ وحيد راح ينوض يارا وانا رحت جبدت قشي حيجاب ابيض واسدال بلو سيال مع كونفارس ابيض ، درت شوي ماسكارا وغوز خفييف في شفافي (انا مش متعودا ندير المكياج مي كي عاد يوم مميز درت شوية) جبدت صاك بلوسيال حطيت فيه تلفوني ومفاتحي ، بعد ماكملت فرزت لاشومبر وفتحت البالكو هويتها ورحت للارا لقيتها ناضت (لارا كبرت راه عندها خمس سنين وولات تقرا وتهدر لعجب مشاء الله) _صباح الخير الزين تاعي_صباح الخير ماما فرح _هيا نلبس بنتي ونهبطك عند جداتك ومباعد كي يلحق الوقت يوصلك عمك اشرف للقراية ليوم انا مشغولة ، دارتلي ايه براسها الفرحة في عينيها  هي اصلا تحب ديما تقعد لتحت عند جداتها متعلقة فيهم بزاف سيرتو عمها اشرف جبدتلها غوب صوف خفيفة فالمارو مع ليبا نوار وبوت نوار مشطتلها شعرها ودرتلها بروش بابيون نوار كملتلها _ماما فرح راني شابة ياك_راكي تهبلي بوبونتي ناكلك على هذوك لخدود_نحبك مامي_وانا نموت على بنتي ، جات تحضنتني وسلمت عليا هاذ الطفلة حنينة بزاف وتحب لي يحنن عليها حتى انا نحبها كأنو بنتي ، رحت بالزربة وجدتلها اللمجة لي تديها معاها ودرتهالها فساكودو عطيتولها ودرتلها حليب ليها وخليتها تفطر ودرت لوحيد قهوة ديتهالو وورحت لقيتو هاز البارفان ويدير_هيا عمري ازرب راح الحال_هيا راني كملت ، بقيت نشوف فيه لبس شوميز بيضة فاتحها شوي ملفوق مع سروال أطوال بلونوي مطلع شعرو بالجال _وش عمري تشوفي ليا_اا والو هاك قهوتك اشربها و هيا نروحو جا حط ذراعو على كتافي وباسني على راسي _خلاص فرح نقصي شوي من ستراس راني معاك متخافيش _وكي عدت معايا لي راني مطمنا ربي يخليك ليا يا سندي _وخليك ليا حبي،عطيتو لقهوة شربها وهو واقف تالمو هبلتو وانا نقلو هيا هيا؛لبسنا كامل ووجدنا رواحنا فرزت الحالة بوخفيف وفتحت تواقي تتهوا الحالة لبست فاست خفيفة (رانا في وقت الربيع وصباح تكون النسمة باردة) وهبطنا حطيت لارا عند خالتي (مرت عمي ام وحيد يعني) _ربي يوفقك بنتي فرح ومباعد ان شاء الله يجي عمك ويجيبني لعندك _ان شاء الله خالتي دعيلي ؛ خرجت حكمت فيد وحيد ورحنا لماما لقيتها فالباب تستنا سلمت عليها زاد لحق بابا باسني من راسي _متخافيش يالغالية راني معاك _ربي يخليك ليا باباتي ، شوي هك هبطو خاوتي سامي ويحي ولحقت تسنيم لابسة وموجدة روحها سلمت عليهم جبدت تسنيم على جيهة وقعدنا نحكيو نحوس غير نخفف الضغط _هاكي بكرتي _ايه ونخليك وحدك؟ منيتك ، ضحكت وقتلها ايه علابالي بيك حنونتي ديجا نتي وعايلتي جامي تخلوني _هاه احكيلي كلش واجد _نورمالمو واجد كلش مي هاني رايحة ضك انا ووحيد قبل مايلحق حتى واحد نريقلو كلش _ايه روحي وضك نلحقك انا و سامي _واياد وينو _خليتو عند سناء قاتلي نحكمو مع اصيل ومباعد تجيبهم وتلحق_ايه صحة مالا انا نروح نتلاقاو ثما ، رحت لعند وحيد كان يحكي مع بابا وخاوتي _وحيد نروحو راه وقت_ايه هيا ، سلمت على ماما ووصيتهم ميطولوش ويلحقوني ، ركبنا فطوموبيل طريق نص ساعة حسيتها عام باين عليا الستراس مرة نشوف لساعة مرة نجبد تلفون نشوف ونلهي روحي ، حكمني وحيد من يدي_خلاص فرح والله قلقتيني تحسب راح تجوزي الباك_بصح راح افتتاح جمعية وراح يجيو ناس من كل بلاصة وهاذا راه تعب عام ونص راني خايفة كاشما تصرا حاجة تفسدلي تعبي _لاا متهدريش هك تفائلي بالخير ونحي الافكار السلبية من راسك ...