من أنا.. الجزء الثاني

04

  قالي منطولش ونجي ، قعدت فالهول حاكمة قلبي وخايفة وندعي ميكون والو بابا موالف يمرض مي هاذ المرة صح خفت عليه )كأنو قلبي كان حاسسني) مافيقني من تخمامي غير صوت إياد طلعت راسي لقيتو هو وتسنيم دخلو فتحتلو ذرعيا_هيا حبيب عمتو ، جا يجري عندي تعنقش في رقبتي ويبوس فيا _توحشتك وليدي من صباح وانا هنا لاه مجيتش ليا_مثمعتش بلي لاكي هنا ماما مقاتليش ، ضحكت فوسط دموعي على هدرتو _مالا تسنيم ضك نعاقبوها _ايه يجي بابا ونقلو ، جات تسنيم مخلوعة من حالتي سلمت عليا وقاتلي غير الخير فرح وشكاين _جيت صباح لقيت بابا مريض _اا خير برك الناس اصبري نروح نشوفو ، راحت دخلت ليه شوي ورجعت ليا _اوخذي على بابا مسكين راه وجهو صفر ضك نعيط لسامي يديه لطبيب_لالا راني عيطت لوحيد ضك يشوفو ويقلنا اذا لازم ندوه للكلينيك _صحة ان شاء الله ميكون غير الخير ؛ فاتت قريب 40دقيقة وباه جا وحيد دخلتو عند بابا بدا يشوف فيه ويسقسي شفت لوحيد وجهو تبدل قتلو غير الخير _لالا والو مي ضك لازم يدير ديزاناليز هوما لي يبينو وش عندو وشاف فيه قالو عمي هيا وجد روحك نديك لعندي للكلينيك نديرولك ليزاناليز ونديرلك دوا منا للعشية تريح بإذن الله ، خرجنا وخلينا ماما معاه _وحيد يخي غير الخير راني شفتك قبيل وجهك تبدل _ان شاء الله ميكونش واش فبالي برك _ووش فبالك فهمني لاه تهدر بالالغاز_فرح خلي كي يدير ليزاناليز وراديو و نهدرو ضك منقدرش نهدر بمجرد انو شك وممكن ميكون والو ، حطيت يديا على وجهي وبديت نبكي هدرت وحيد حيرتني _فرح راكي كبيرة وواعية وراني قتلك راني غير شاك مش اكيد ومع تحاليل تبان ؛ خرجت ماما حاكمة بابا وسانداتو نضت انا  ووحيد عاوناه هبطناه زادت لحقت ماما ، رحنا للكلينيك مع لحقنا عيطلهم جابولو لاشاز طلعوه فيها ، دخلنا فوتوه لوحد لاصال دخل معاه غير وحيد انا وماما قعدنا نستناو برا نشوف في ماما خايفة وجها صفر حاكمة يديها وتزير وتدعي فربي ميكون غير الخير ماصبت نديرلها ليها لكوراج ولا لروحي كشغل قلوبنا حاسين ، وانا نهدر مع ماما فاتت عليا طبيبتي جات عندي سلمت عليا وعلى ماما _مدام فرح وشراكي ووش هاذ الغيبة راكي في 7اشهر ماجيتي باينة حبستي traitement تاعك _راني مليحة الحمدلله وتراتمو حبستو صح والله يا مدام كرهت الدواوات وخليتها على ربي وقت ماكتب هذيك هي وزيد تشغلت بالجمعية _ايه قالي ميسيو وحيد عليها الف مبروك مدام وربي يقدرك المهم انا نخليك واذا حبيتي ترجعي للتراتمو تاعك راني هنا ارواحي لعندي فأي وقت وكيما يقلك لكل داء دواء _ايه ان شاء الله ، هي راحت وماما دارت ليا _ونتي لاه حبستي دوا بنتي انا والله فبالي راكي تشربي فيه وماتولهتش نسقسيك تعرفيني منحبش ندخل فحوايج هك_والله يا ماما غير كرهت عامين وانا بدوا ومن طبيب لطبيب وكل شهر نفس الخيبة ونفس دموع ونفس الحالة النفسية كرهت والله وديجا من نهار حبست ريحت نفسيتي ومع تحضيرات الجمعية والله نسيت هاذ الحمل طول وتبدلت نفسيتي بزاف خلاص منيش راح نطير ولازم نرضى لمكتوب ربي _عندك الحق بنتي ديري لي يخرج عليك هاذي حاجة تخصك نتي وراجلك ويلي تخرج عليك ديريها ..