من أنا.. الجزء الثاني

29

  بقيت حاكمة في كرشي ونزير عليها وحيد مافهم فيها والو عينيه تعمرو دموع ويقول ياربي مانخسر لا مرتي ولا وليدي هزني خبطني مع سكالي وليت نشوف غير فضباب والصوت غير يبعد وحيد يهدر وانا خلاص لساني تربط وثقلت جسمي تخضر من قوة لوجع غير الدمعة تهبط اخر شي شفتو هو دموع وحيد ، فطنت نشوف فضو قاوي وطبا دايرين بيا يجريو دورت راسي جيهة الباب نشوف في وحيد واقف وحاط يديه على راسو ويشوف فيا عاودت فقدت الوعي ، فطنت لقيت روحي في  بلاصة اخرى غير وين كنت اخر مرة السيروم معلق ومن جيهة زادولي الدم ، نسمع فلاباراي تصوني تولهت مع روحي غير لغطا لي حاطينو لفوق عليا ، عرفت روحي بلي راني فالكوما يسما خلاص خسرت البيبي ولا نقول ليبيبي غاضوني قلبي تحرق وندمت مي بقا فيا تخمام تاع حياة بابا قبل كلش ، شوي هكذا جاو زوج  فرمليات Infirmières وطبيبة باينين من لبستهم يعني قالولي على سلامتك مدام نطقت الطبيبة _مدام راكم سلكتو على شعرة قريب رحتي ب نتي بالبيبي الحمد لله على سلامتك مي حملك راه شوية في خطر لازمك متابعة طبية مكثفة ممبعد تدخل طبيبتك وتفهمك كثر ،بقيت نشوف فيها يسما مهبطوش نكذب عليكم كون نقلكم مفرحتش والله فرحت وطمنت وريحت كي مطاحوش غايضني بابا مي ارادة ربي فوق كلشي بصح وحيد واش راح تكون ردة فعلو منقلوش بلي حاولت نطيحهم وخلاص ونخليها بيني وبين ربي هو الغفار الرحيم وان شاء الله يغفرلي ويتوب عني بصح كيما نقلكم كل مرة تجري الرياج بما لا تشتهي السفن انا خليت بزاف ادلة من ورايا وكلش راه باين تاع الصح مش راح تفوت على خير هاذ المرة ؛ فوت يومين فالكومة ماني عارفة ليلي من نهاري نفطن دقيقة نعاود نرقد حتى واحد مايدخل عندي ووحيد ماجاش ليا ، بعد هذو اليومين جات طبيبتي قاتلي ننقلوك للاشومبر تاعك خلاص تجاوزتي الخطر ، هي تهدر وانا فعالم اخر هدرت كلام على العشبة لي شربتها مي مكنتش مركزا عقلي فعالم اخر من جيهة شي لي درتو ومن جيهة بابا لي راح يقعد على حالو ومن جهة اخرى ويلي راني خايفة من رد فعلو هو وحيد ، خرجوني حطوني فلاشومبر لقيت ماما تستنا مع شافتني جات تجري تبكي وتتحضن فيا قاتلي ديتي نص عمري يابنتي والله قلبي خرج كي سمعت بيك وسيرتو كي قالو حالتك صعيبة وزادو مخلاونيش ندخل ليك قريب هبلت وش شربتي بنتي لاه صرالك هكذا وصح راكي بالحمل؟؟ ، مقدرتش نهدر ولا نجاوبها شفت فيها وسكت ، جات infirmière عاونتني لبست بيجامتي وماما غير تشوف فيا تستنا اجوبة عل اسئلتها بصح انا مقدرتش نهدر حتى دموع وحابسين عايشة حالة صدمة وخوف وندم ، شوي هكذا دخلو خاوتي وتسنيم وسناء وجوهم مخطوفين ويسقسو فيا وانا كي العادة غير نشوف فيهم وتايهة مافيقني غير كي دخل وحيد في وسطهم لابس bluse médical  كي العادة ، وجهو شاحب ليساغن تحت عينيه ويبان عليه التعب وكشغل كاره ومديقوتي في يومين تبدل 180° ااه يافرح وش درتي فروحك هذا مش وحيد لي عرفتو وانا السبة تاعو ..