من أنا.. الجزء الثاني

12

بعد ماقنعناه انا وخاوتي وافق كي عيطت لوحيد قالي على الاقل شهرين وباه نقدرو نديرو العملية باباك كبير فسن ومريض لازم نضمو كلش وباه نديرو العملية ، روحت لدار وانا فارحة الحمدلله كملت روتيني كي العادة وقعدت فصالو نتفرج مع وحيد ولارا سمعت تلفوني يصوني رحت هزيتو لقيت نميرو جديد فلول مرفدتش مباعد كي عاود شحال من مرة قالي وحيد شكون لي يعيطلك هاذ الوقت هاذا واحد من تاع داركم؟!_ لالا نميرو جديد ، عاود عيط ريبونديت لقيتو صوت مرا _مساء الخير مدام _مساء الخير شكون معايا_انا يسرى_وينا يسرى_ لي جيتك مع وليدي صغير للجمعية وعطيتيني لكارت تاعك_ااه صحة شفيت عليك وي مدام تفضلي_ مدام يعيشك جيت قاصداتك خدميني عندك يالوكان نسيقلك المهم نخدم حالتي مايعلم بيها غير ربي _معليش ختي ارواحي عندي غدوة ومايكون غير الخير_ان شاء الله ربي يحفظك ؛ كوبيت عليها قالي وحيد غير الخير شكون هاذي قعدت قدامو وحكيتلو حكايتها من الدقيقة لي شفتها فيه وقتلو راني نفكر نخدمها عندي _فرح قبل كلش نسقسيو عليها ونشوف انا ثاني هاذ الموضوع راكي تقولي راجلها تاع مشاكل ماعندو واش داك تجيبي لمشاكل لروحك عاونيها بمبلغ مالي وخليها تروح فسبيلها كاين بزاف يستناو فالخدمة مي هاذي الا ما يجيك منها وجع راس بسبة راجلها ، خوفني بهدرتو درتلو براسي ايه وقلت هذاك هو الصواب واش داني للمشاكل مشي حياتي اكل مشاكل وكي تهنيت راح نرجع ليهم  لالا ماعندو واش داني ، لغدوة صباح نضت كي العادة لبست وخرجت رحت لدارنا لقيت بابا راح يدير دياليز داه سامي قعدت شوي مع ماما وخرجت ركبت طوموبيل تاعي ورحت للجمعية ملي دخلت وهوما يجو ناس يحطو دوسيات علاجال المساعدات يعني وهنا تبدا خدمتي يا نساعد انا ولا نشوف مع الناس لي تعرفت عليهم ووعدو يساهمو فالجمعية وفي المساعدات ، وانا مع دوسيات دخلت عندي نفس هذيك لمرا تاع هذاك نهار لي قاتلي اسمي يسرى هاذ المرة وجها مفيهش أثار الضرب كانت مشوهة صح وكي راحو الآثار ولات تبان شابة مشاء الله ومام بانتلي ضكا صغيرة في السن  ، رحبت بيها وحكينا ولي فهمتو انو فاميلتها لي قاعدة عندها قاتلها شوفي ريڨلي امورك يامات و اخرجي راجلها محبش وعلى هاذي جات ليا حبت تخدم وتكري ، فلول غاضتني ممبعد تفكرت هدرت وحيد قلت لي خاف سلم ولازم عليا نتجنب المشاكل ، قتلها ياختي انا راني لقيت وحدة تخدم هنا ولي نقدر نعاونك بيه هو هاذ المبلغ المالي اكري دار ودبري بيهم أمورك مابين لالقيتي خدمة ، وقفت وقاتلي يكثر خيرك بزاف عرضو عليا دراهم ومحبيتش واولهم الطبيب لي قتلك عليه مي انا متربيتش هك انو ندي دراهم بلا مقابل اذا نخدم عندك صحة مالقري بشهادتي مي مستعدا نخدم عندك حتى famme de ménage المهم ندي دراهمي بالحلال ومن عرقي اذا تخدميني عندك صحة واذا لالا نتشكرك من قلبي ومعرفة خير ان شاء الله ، ناضت جات خارجة مي قلبي مهنانيش نخليها محتاجة وبنها مريض عيطتلها..