من أنا.. الجزء الثاني

07

   بدلت ورجعت لعندو جبدت لحوايج وبديت نوريلو وهو يدير فوتناها غير ضحك وقصرة بصراحة خفف عليا شوي مي مع هكذاك مرض بابا وحدو وفي وسط كل ضحكة تتحجر الدمعة غير نحكمها ونحاول قد مانقدر باش نقوي روحي ونتفائل بالخير ، وقت لعشا حطيت ووجدت لاطابل هبط وحيد يجيب لارا شوي وطلعو جابو معاهم طبسي قالي بعثاتولك يما حكمتو عليه فتحتو لقيتو رولي يكثر خيرها لي تفكرتني ، تعشينا لايمت لماعن غسلتهم رحت صليت صلاتي خليت وحيد مع لارتا يقرالها في قصة طليت عليها _سمحيلي ماما ليوم راني تعبانة علابيها مجيتش نقرالك القصة _معليش ماما فرح هاهو بابا يقرالي هو صح ميعرفش كيما نتي بصح معليش قالها وحيد صار هك ضك انا وليت منعرفش نقرالك _ايه بابا ياك نتا علمتني هك الكذب حرام وانا نقول الصح_ايه صحيتي بنتي مي احكيلي وش الفرق زعما _هي ماما فرح كي تحكيلي تقعد تمثلي ودير بيديها يعني تعيشني فالقصة مش كيما نتا غير تقرا_اييه صح ضك نحاول ندير كيما ماماك فرح وقوليلي اذا هك يقراو القصة، خليتو معاها هو يديرلها فالحركات حسب القصة وهي تضحك صوتهم وصل عندي للاشومبر ، بدلت قشي لبست فوندروب غوز ودرت كرام مرطب لوجهي ويديا طفيت ضو وطول رحت لبلاصتي حطيت راسي راح نرقد تفكرت بابا وهدرتو وعاودت طلعتها فراسي حكمت حكمت فروحي وطرطقت بالبكا نهار كامل وانا حاكمة فروحي مي لحق الليل خلاص ضعفت حطيت وجهي فالمخدة ونبكي ونشهق زماان وانا على نفس الحالة حسيت بيد تحطت على راسي دورت وجهي ليه طول تحضنتو _وشبيها القطة لاه راكي ديري لروحك هك باباك يرتاح ان شاء الله متفايليش عليه عمري بالعكس ادعيلو بالشفاء_خفت عليه وهدرتو ليوم مطمنتنيش حسيتو يودع_لعباد لكبار اكل يهدرو هك كي يمرضو مش بالضرورة كي هدر هك يعني راه يودع ولا راح يموت لالا حبيبي تفائلي بالخير _ان شاء الله عمري والله كي تهدر معايا هك ديرلي الكوراج ونحس بلي كاين امل ، تحضني حضن طويييل ورقدت وانا على امل انو غدوة يكون احسن ؛ نضت صباح على بوسات خفاف في خدودي وشفافي فتحت عينيا بشوي _صباحوو_صباح الحب والعشق من صباح وانا نستنا فيك تنوضي هذا كامل رقاد ؟ ضحكت _عييت وراني حاسة الفراش يجبد فيا والله ماقادرة نوض _ايه متنوضيش ابقاي هكاك مي انا راني متوحشك فرح ، مخلانيش حتى نجاوبو طاح فشفافي يبوس قعدت معاه قريب زوج سوايع ونضنا دوشنا ولبست قشي باه نروح نطل على بابا ونروح للجمعية مام وحيد قالي نروح معاك للجمعية منقدروش نهملوها لازم واحد فينا يروح رغم كل الضروف اصلا هاذ الجمعية فتحناها باه نعاونو الناس وخاصتا الايتام مالا لازم ندير لي عليا ورغم كل شي يبقى هدفي في المساعدة قبل كل شي...