من أنا.. الجزء الثاني

09

  قعدت غير مع لارا فتحت لبالكو لي فالبيرو تاعي بقيت نشوف فالحالة بزاف موفمو فالبلاصة هاذي ، حاولت نضف شوي الحالة اصلا من نهار الافتتاح مارجعت مانضفت الحالة طيشت واش يطيش لايمتهم في ساشي ورحت ل لارا عطيتها تلفون قتلها ديري يوتيوب تفرجي و اقعدي هنا ماما نهبط دقيقة نرمي لابوبال ونرجع ليك صحة بنتي، دارتلي براسها ايه هزيت سواشي وهبطت تحتمت الله غالب بعد يامات نجيب فام دوميناج تقوملي بالحالة اكل ، جيت هابطة نسمع في صوت بكا تاع طفل صغير زدت هبطت شوي لقيتها مرا هازة بيبي وتحاول تسكت فيه ومسكتش قربت ليها _مدام غير الخير كشما بيه وليدك؟ طلعت راسها فيا وجها زرق وعينها منفوخة ودموع فعينيها وعلى خدودها قاتلي بني مريض وراني نستنا في طبيب لي لهنا يفتح _بصح راحوالحال منضنش لايفتح _لازم نستناه معنديش غيرو _معليش اقعدي هنا نهبط دقيقة نرمي حشاك ونرجع نحكيو واذا نقدر نعاونك راني هنا راه راجلي طبيب اذا قتلو راح يعاونك _الله يسترك ختي ، هبطت رميت وثم ثم طلعت لقيتها حاطة راسها على البيبي وتبكي _هيا اطلعي معايا _وين _ هنا لفوق _نتي طبيبة؟_ لالا انا صاحبة الجمعية لي تفتحت جديدة، ناضت معايا تمشي وتعرج حالتها حالة دخلتها قعدنا في لبيرو عطيتها كاس ماء شربت محبيتش نزيد نسقسيها حتى تهدى ، شوي هك قاتلي انا طبيب هاذا لي فاتح فوقك نجي عندو نسيق ونضفلو الحالة وبالمقابل يخلصني ويداوي بني من عندو واللخ خيرو مننساهش طول _ وبابات وليدك وين رح؟_ هذاك ربي يهديه شبعت منو غير هم ديما مش صاحي الشراب ولاد.روق ماشيينلو فدم _الله يهديه قوليلي ختي وش مرضو بنك، بكات وقاتلي كي زاد كان معنديش باه نشريلو حليب وباباه ياك قتلك كفاه داير مايعرفش للمسؤولية طول تحتمت وشربتو حليب شكاير من هذيك وبني مريض في سبيطار مفهمولوش وطبيب هاذا قالي بلي جاه مرض في مصارنو بسبة لحليب لي شربو ولازم منا ولجاي يشرب حليب سبيسيال وجاني غالي بزاف مع دوا وليكوش تاعو لبارح كي فتحت الموضوع مع راجلي وقتلو اهتم شوي بطفل ووفرلو دواه وحليبو ويلي تصرفهم على هذاك السم اصرفهم على وليدك قتلني بضرب وهز الطفل راح يرميه بقيت لاصقة فيه ونحاول ردولي بشرط نخرجلو من دار قالي كرهت منك مررتيلي حياتي اخرجي خليني نعيش حياتي (تهدر وتبكي تقطع القلب) _وماليك وراحو _انا يتيمة ماعندي لا ام ولا اب ولا خاوة كنت عايشة فدار عمي وكي جا هاذا خطبني عمي حب يتهنى مني وزوجني ليه فهذيك كنت كملت قرايتي ونحوس على خدمة قد ماحاولت مع عمي باه يخليني فترة نلقا خدمة ونخرج من حياتهم طول وميطيشنيش عند السوكارجي هاذا بصح محبش قالي مدامك هازا اسمنا مش راح نخلوك تخدمي وتعيشي وحدك حنا بناتنا من دار باباهم لدار الراجل ومش راح تجي نتي تبدلي الحالة..