من أنا.. الجزء الثاني

19

   تنهدت وبديت نحكيلهم في هدرتها مي محكيتش الشي لي صرا بيني وبين وحيد مشاكلي انا وراجلي نخليهم بيني وبينو احسن للجميع ، كي كملت هدرتي لقيت ماما مشوكيا _ ايمالاا المشاكل اكل منها وانا لي حاسبتها ناس ملاح وهي راهي تلعب لتحت لتحت والله نروح ليها نوريلها _ماما عيشك هاذو مشاكلي خليني نحلهم وحدي منيش صغيرا _وكفاه حابتني نشوف بنتي تتقاس ونسكت ونفوت _معليش راني قادرتلهم ونعرف كفاه نتعامل معاها نفوت العملية برك وندير معاها حل _ايه صحة ديري لي حبيتي مي ديري فحسابك اذا كثرت عليك والله مانسكتلها _خلاص ماما تعيشي متزيديش تجبدي الموضوع هاذا خليه عليا صاي ، شفت فنسا خاوتي قتلهم ومام نتم مانقبل لا سامي ولا يحي يسمعو بالموضوع ؛ حكينا شوي ونضنا كل واحد لشمبرتو فوت سمانة في دارنا مارحت للجمعية ماهدرت مع وحيد حتى تلفون وغلقتو حسيت روحي كارهاتو ومش حاملة لا صوتو ولا شوفتو غير لارا جات عندي خطرة وحدة قعدت شوي وراحت بقات تقلي هيا تروحي معايا وتوحشتك صراحة غاضتني قلت يديروها لكبار تجي فصغار مي قنعتها بلي نزيد يامات ونرجع وسقسيتها على وحيد قاتلي بلي قليل وباه يجي لدار وانا هبطتني جدة عندها من نهار لي جيتي هنا طلعت هزتلي قشي وهبطتني  ، هدرت معاها وطمنتها بلي نرجع وباه سكتت ورجعت لدار ؛ ليوم صباح نضت كارهة ومديقوتيا غير ندز فروحي نمشي ونتمايل مالقري رقت بكري و شبعت نوم مي حاسة بالتعب فجسمي قلت اكيد من القلق والتفكير الزايد ، لبست حوايجي ووجدت روحي هزيت صاكي ومفاتحي وخرجت رحت للجمعية جيت داخلة  لقيت وحيد فالباب يستنا حبيت نرجع ومنتلاقاهش قالي الهرابة وين بيها شفت فيه قلبي راح يخرج محملتوش ومحملتش هدرتو بقيت نشوف فيه بإشمئزاز_وشبيك فرح لاه تهربي مني وش صرا لي تبدلتي هكا _ماكان والو وخليني براحتي _وش تحوسي نزيد نخليك كثرمن هك راني خليتك سمانة قلت يتنحالك الزعاف والقلقة ونهدرو ونتفاهمو _ماعندنا مانتفاهمو راه كلش باين وهدرت امك وضحتلي كلش خلاص روح خليني فحالي انا روحي ومش حاملتها_ وش دخل يما فالوسط ؟ فرح راكي تهدري باه تهدري ولا كشما كاين _راني نقلك بلي روحي مش حاملتها روح خليني فحالي _منيش مخليك وليوم ترجعي معايا لدار مفيهاش نقاش منبعد كي نكونو مع بعض فدار نتفاهمو ونحطو النقاط على الحروف _ياو منرجعش وديجا ترفع عليك قضية خلع خلاص راني كارهاتلك ومش حابة نزيد نشوفك ولا نهدر معاك _وشراكي تهدري نتي لهاذ الدرجة انا قستك وجرحتك؟ فرح هدرتك راح تندمي عليها راقبي هدرتك قبل ماتخرجيها راكي كثرتي_ايه نتا خنتني وجرحتني بالهدرة وفوق هكا ضربتني وحاوزتني ، بقا يشوف فيا مشوكي جا يهدر مخليتوش يهدر بعدتو على طريقي وفتحت الباب ودخلت نرجف بالقلقة فت للبيرو تاعي قعدت على الكرسي نكالمي في روحي بسيف وباه هديت مفهمتش لاه جاني هاذ الكره اكل من جيهة وحيد بقيت نستغفر  ، هزيت تلفوني فتحتو (من نهار رحت لدارنا وهو طافي ) لقيت قريب 100 ميساج من وحيد كل واحد واش فيها مرات يعبر على حبو ومرات يقلي بلي توحشني وحتى مرات يهددني كون منرجعش يجي يديني بسيف ، ومن بينهم ميساج من نميرو منعرفوش فتحتو لقيت مكتوب فيه " نتي لي دخلتي لعايلتي وخربتيها وكيما خربتيلي داري ويتمتي بنتي نخربلك دارك مالا خافي مني وحيد مرجوعو ليا " مابقالي عقل في راسي ولاو يديا يرجفو وقلبي يخبط بالقوة هاذي باينة صارة عاودت عيطت فنميرو نرخسها لقيتو طافي بقيت نعاود مبغاش يصوني وليت ناكل فروحي وش الجرأة هاذي علاش انا خطفتلها راجلها هاذا ياك نهار عرفتو كان فات على طلاقو كثرمن عام ..