من أنا.. الجزء الثاني

14

   14:
     رجعت لدار قلت نخليه على راحتو كي يتكالما نعاودو نتناقشو في الموضوع ونحلو هاذ سوء التفاهم ولازم نقعد وحدي ونحاسب نفسي بلاك انا لي غالطة انا انسان يعني منيش معصومة من الخطأ ممكن راني غلطت معاه ومافقتش ويشهد ربي راني اذا غلطت معاه راه بحسن نية وجامي خممتلها، رجعت لداري كنت راح نفوت لدارنا مي محبيتش ماما غير تشوفني تفيقلي بلي مقلقة وانا من نوع لي نخلي مشاكلي انا وراجلي بيني وبينو وحتى ونتزير ونحب نحكي عندي تسنيم نحكيلها ونفرغ قلبي احسن من ماما لي تبقا غير مقلقا عليا ومام منحبش نكبر الحالة وطول فترة زواجنا كيما اي زوج نتناقشو ونتهاوشو مي جامي نبين قدام اي واحد لا دارنا ولا دارهم وهاذا افضل شي ، دخلت لدار جيت طالعة لداري عيطتلي عجوزتي رحت عندها لقيتها قاعدة مع عبير قاتلي ارواحي باركي لعبير_ مي علا واش نباركلها _راها بالحمل _ اا الف مبروك حنونة ربي يتمم على خير ، قاتلي ان شاء الله ولعقوبة ليك نطقت عجوزتي اااااااميييين ، فلول ستغربت من ردها مي قلت اكيد تستنا تشوف ولاد وحيد ومن حقها اي ام هك جيت نايضة قتلهم انا نطلع لداري عندي شغالات ومع لعشا ياربي نلحق قاتلي لعجوز شفتي محمد ديجا ولا بزوج ولاد وولادي لخرين بولادهم غير وحيد مسكين مزية عندو هذيك لبنية تالي راه هكاك ، تخنڨت من هدرتها دنيا دارت بيا من لول مقلقا وزادتني هي اول مرة تجرحني بهاذ الموضوع غرغرو عينيا مي محبيتش نردلها ونضت بزربة باه مطيحش دمعتي قدامهم ، خرجت وكي سمعت عبير تهدر معاها حبست قريب للباب حبيت نعرف وش صرا لاه حتى تقلي هك فاتو عامين جامي هدرت وضك بانتلها وحيد كبر وحبت تشوف ولادو سمعتها قاتلها لاه عليك يا خالتي تحرجي في فرح هك والله ماتستاهل وديجا مش بيدها _انا كرهت ونحوس على ولاد بني وديجا لاشافت روحها عاڨر تروح تخليه يزوج ويشوف ذريتو حتى هو مش صغير راه داخل على 40 سنة وش بقالو ، يدبر راسو يعاود زواج ولا يرجع صارة راهي طلقت ومذابيا ترجع ام لارا_خالتي من نيتك نسيتي وش دارت وش هدرت حبيتي ضك ترجعيها وديجا لي يسمع يقول فرح عندها 10سنين زواج راها مزالت يافتاح يارزاق عندها غير عامين ونص زواج _بصح بني راه يكبر _وش يكبر بنك الراجل راه 60 سنة ويضني نورمال والله ماحبيتها منك ياخالتي راكي جرحتيها بكلامك والطفلة عاقلة وناس ملاح _نقلك حاجة انا لي غالطة لي جاية نتناقش معاك انا صارة ناوية نرجعهالو بأي طريقة بعدي عليا هك خليني نقعد وحدي نتي مبقاتش معاك هدرة ولا شياخة جات خارجة لقاتني في وجها تبكمت ووجها ولا اصفر ..