من أنا.. الجزء الثاني

13

عيطتلها شافت فيا _راح نجربك يومين فالخدمة ونقرر_صح ؟!!! يعطيك الصحة والله خيرك ماننساه طول عمري الله يسترك كيما سترتيني انا ولملايكة والله نضفلك الحالة يوميا نكمل من عند طبيب ونجي طول عندك يوميا نسيق ونضف واعطيني لاباي لي حبيتي _شوفي الخدمة من عند طبيب تحبسيها وخدمتك عندي هنا سكرتيرا تخدمي بشهادتك مالا علاش قريتي ، ولات تبكي وتفرح حكمتني من يدي قاتلي خيرك مننساهش طول ماعشت ربي يحفظك _امين وضك امشي معايا نفهمك خدمتك ، وريتلها خدمتها وفهمتها في كلش وتفاهمت معاها على لخلاص تاعها وهي قاتلي واش حبيتي تمديلي قابلة المهم كي حققتيلي حلمي وراني نخدم بشهادتي راه عندي خمس سنين تخرج من هذاك نهار وقرايتي وتعبي قاعدين حرقة فقلبي ، راحت هي تخدم وانا رجعت لخدمتي لحقت لعشية حاطة وراقي نريڨل فيهم سمعت صوت وحيد خرجت لقيتو يهدر مع يسرى هي تقلو اصبر نقول للمدام فرح وهو يقلها شكون نتي قتلو وحيد ارواح هاني هنا ضك نفهمك شافت فيا مدام نفوتو تعرفيه _ايه يسرى هاذا راجلي وفي نفس الوقت شريك فالجمعية ، هبطت راسها كشغل حشمت من الموقف _صحة مدام سمحيلي _سماح مزلتي جديدة ومع لوقت تعرفي كلش ، جا وحيد دخلنا للبيرو صكرت الباب_متقوليش هاذي تاع لبارح _وحيد مكانش عندي حل والله غاضتني ، خبط الكرسي برجلو تخبط في لرض وبدا يعيط _نتي جدك ماتفهميش ! ماتشهميش! ماتديش العبرة من مواقفك وشبيك انا نهدر هك ونتي هك _وحيد وشبيك تعيط عليا نقص شوي من صوتك من وقتاه نتناقشو هك (تولهت ليه من نهار درت الاجراءات باه نتبرع لبابا وهو على اعصابو وغير مقلق) ، رحت فتحت الباب قتلها يسرى خلاصت لخدمة ليوم تقدري ترجعي لدار روحي خيتي وليدك مريض و يحتاجك ، دارتلي براسها وناضت رجعت لوحيد قتلو وشبيك نتا وش فيها اذا خدمتها لمرا محتاجة وديجا وش دخلني في راجلها اذا تاع مشاكل ولا نو انا خدمتها هي ولا راجلها _او افهمي نتي وجهك وجه بلا ومشاكل يتبعوك المشاكل من بلاصة لبلاصة وياك فهمتك وقتلك لي خاف سلم ايفيتي عليك لمشاكل احسنلك واحسن لينا كامل وخاصتا الجمعية جديدة بصح نتي لالا حاطتني رجل كرسي عندك ماتشاوريني ماعلابالك فكلش تحبي تقرري وحدك دايرتني طرطور هنا وانا لي فأي حاجة نحب ندي رايك ولا على الاقل نعلمك_راك مكبرها وحيد وعلاش الهدرة هاذي اكل _راني نهدر على العموم مش غير على هاذ لمرا (هنا فهمتو بلي يقصد كي ماشاورتوش نهار قررت نتبرع مي هاذي حاجة تخصني لالا؟؟) _وضح كثر _راه كلش موضح ، خرج وخبط الباب وليت هزيت صاكي وحوايجي وخرجت وراه ماجيت نلحقو حتى ركب فطوموبيل وطار بيها خلى غير الدخان وراه افف انا كرهت كل ماتسقم حياتي فترة نرجع لصفر ماعرفت اذا انا مستهترا وتخمامي مرجعني للور ولا صح كيما قال وجهي تاع مشاكل وين نروح يلحقوني..