من أنا.. الجزء الثاني

25

   مع حطيت علقتلي وحدة قاتلي كاين عجوزة اسمها +++ في لبلاصة لفلانية روحي ليها وراح تعاونك في طب الاعشاب دومونديت نميرو تاعها عطاتولي عيطتلها قاتلي تقدري تجي ضك ووراتلي لبلاصة مليح درت فتلفون باه نعرف لبلاصة وديماريت ساعة وانا نمشي لقيت روحي خرجت على لافيل ودخلت لبلاصة تاع ريف الشجر ودنيا خضرا الورد ولحشيش فلرض وديار متفرقين كل دار فجيهة لحقت وين قاتلي حبست لقيت شيخ يجر في بقرة صونيت عليه شاف فيا وقرب قالي مرحبا بنتي تفضلي _نحوس على دار فلانة (لعجوزى لي قالولي عليها) _ شفتي هذيك الدار لي مبنيا بالتارنيت هاهي تبان من تاع بكري _ايه شفتها _هاذيك هي دار الحاجة +++ بصح مخبرتنيش واش تحتاجي منها، شفت فيه وتبسمت وديماريت طول لحقت عندها عاودت عيطت فتلفون قاتلي ادخلي راها تستنا فيك ، هبطت رجل للقدام واخرى للور مترددة وخايفة وضميري يأنب بصح الخوف غطا هذاك التانيب ايه خوفي على بابا ومن اني نفقدو كان اقوى والشيطان الله ينعلو الغلط ديما يبينولك صواب ، طبطبت الباب فتحتلي jeune fille تكون هكاك فالعشرينات قاتلي مرحبا بيك بقيت نشوف فيها بشك زعما هاذي لي داوي بالاعشاب؟ ، ضحكت وفتحت الباب _تفضلي مدام جدة راهي لداخل تستنا فيك ، طمنت ودخلت الدار كانت كي تاع بكري مراح كبير فالوسط وفيه بيبان تاع ليشومبر وفي لمراح بزاف شجر من كل الانواع حتى كاين بوات صغار فيهم هك اعشاب صغار، قعدت على حجرة نستنا وماني نخمم في والو بغير اني نتهنا من هاذ الحمل ونسلك بابا ، شوي هك رجعت لعندي الطفلة دخلتني لوحدة من هذوك ليشومبر لقيت عجوزة صمرة لابسة كلش ابيض قاعدة في لرض وقدامها مطرح ومخدة وعلى جنبها حاطة طابلة فيها قرع صغار و بوات كبار حاطة فيهم اعشاب ديكور الشمبرا كأنو نتفرج في فيلم قديم من هذوك تاع الثورة فيها cheminée في الكوانة ومعلقا هذاك تاع الضو نضن يقولولو كانون حاطة جلد خروف في لرض وعفايس هك ، حطتلي يدها على المطرح وقاتلي قربي يابنتي مرحبا مرحبا وراكي بالحمل وش جابك عندي ، كي قاتلي بالحمل الدم نشف في عروقي ياربي هاذي شوافة ولا ش خدمتها ياخوفي غير لاكشما ديرلي وواحد مايجيب خبري ، ريقي نشف نخرج فالهدرة بسيف هدرت وانت نتأتأ _وين علابالك بلي بالحمل (تهدر بلهجة اول مرة نسمعها مخلطا بين لهجة تاع الغرب ولهجة اخرى غريبة عليا المهم كلمة فهمتها وكلمة لا) نطقت وقاتلي واه اني نعرف صوالح هاذو ونزيدك بالعلامة الحمل راه بتوام راهم زوج ابنتي _(الدنيا دارت بيا ياربي هاذا اختبار ولا واش رايحة نقتل زوج ارواح والله ستنيتهم بفارغ الصبر وماضنيت يصرا معايا هكا)ثم ثم فقت من تخمامي قتلها خلاص الحاجة انا نروح وسمحيلي كي قلقتك معايا _لالا اقعدي ومتخافيش انا ولدت نسا القرية قاع و هاذي خدمتي من 40سنة ونعرف المتوحمة من عينيها ومن لون وجها هيا اتكسلي بنتي واحكيلي همك بلاك نقدر نعاونك ..