السلام هو إلا تحارب من يريد السلام

الحرب والسلام

كان يمشي متجهه لغرفتها بعد ماجهز أوراق خروجها من المستشفى بعد ماظلت فيه ثلاث ايام وابتسم بحب وهو يتأمل شهادة ميلاد غاية بيدة ومد يده يفتح باب الغرفة يدخل لها ووقف يتأملهم بسعاده مالية قلبة ونطق :بناتي جاهزين نطلع ؟
إيثار ببتسامة ووقفت وهي حامله غاية بحضنها ونطقت :جاهزين يابابا
تقدم يقرب لها ونزل أنظاره يتأمل بنته حبيبه قلبه وضحك من كانت نايمه وهي زامه شفايفها ونطق :تشبهك وقت تزم شفايفها
ضحكت إيثار ومدت يدها تمسح عليها ونطقت :توها خلصت تبكي عشان كذا زامتهم
نزل راسه يقبل جبينها وغمض عيونه وهو يستنشق ريحتها ونطق :للان مو قادر استوعب انه بنتنا وثمرة حبنا بين أحضاننا
ابتسمت بحنية ونطقت :محظوظه فيك يوم ربي رزقني فيك وصرت حبيبي وأبو بنتي كُل يَوم أتأكّد بأنّك الخَير والأمان
‏و أجمَل شَيء بحياتي
ابتسم بحب وتقدم يقبل راسها ونطق : يا بعد روحي وكل ناسي وهلي ‏والله إنك في قلبي أكثر من كونك على أرض ربّي
غمضت عيونها بحب ورفعت نظرها تناظره وتقدمت تقبل دقنه بحنيه ونطقت :الله لايحرمني منك ومن حنيتك وغزل منطوقك
نزل نظره وضحك وهو يهمس لها :لو قعدنا اكثر من كذا بتطلعين من هنا حامل بالثاني
توسعت عيونها بخجل وبعدت منه ونطقت :ماتبطل من قلة ادبك
تعالت ضحكاته وتقدم ياخذ الاغراض ونطق :يلا مشينا تاخرنا عليهم وبعدين نتفاهم على الادب
عضت شفتها ونزلت نظرها لي غاية وعدلت لها البطانيه حقها وطلعت خلّفه للسياره وابتسمت بحب من تقدم يساعدها وياخذ غاية منها عشان تقدر تركب ونطق :حبيبه ابوها تبي حضن ماما ولا كرسيها
لفت ايثار تناظر خلفها وضحكت من شافت الكرسي ومجهزه بكل شي ونطقت :عبدالله بس ماتقدر تقعد عليه توها صغيره !
ضحك بخفه وتقدم يحطها بحضنها ونطق :ادري يابوي بس من حماسي وفرحتي ودي اخذ لها كل شي
تعالت ضحكاتها ولفت تناظره وهو يحرك السياره ونطقت :بتدلع عليك لو على كذا تسوي معها
ابتسم بحب ونطق :ولها كل الدلع بنت ابوها
تنهدت بحب والشعور الحلو مالي قلبها ومدت يدها تمسح على كف غاية الصغير ونزلت راسها تقبله بحنيه
كان يسوق وعينه عليهم يتأملهم ويبتسم على كل حركه تسويها ايثار ووقف قدام بيتهم ولف يناظرها وهي مستغربه ونطقت :ليه وقفت هنا ؟
عبدالله ببتسامة :بنسكن ببيتنا نستقر بحياتنا
إيثار :بس هالفترة مقدر لحالي ودي بخالتي ولا امي تقعد معي
عبدالله :لاتخافي لو تبيهم كلهم يقعدون معك بخلهم وش تبين بعد
ابتسمت بخفه ومدت يدها تفتح باب السياره وبسرعه ضحكت من فتح لها واخذ غاية منها ومد كفه لذراعها يساعدها تقدموا بخطواتهم للباب وسرعان ما ضحكت بحب من زينه الباب باللون الوردي وعليه اسم بيبي غاية وضحك من ذهولها وإعجابها وفتحوا الباب يدخلوا وبسرعه شهقت من كانوا كلهم متواجدين داخل ومجهزين البيت بالكامل ولفت تناظر الاستقبال إلا مجهزينه وتجمعت الدموع بمحاجر عيونها من اللوحه المكتوب عليها غاية بنت عبدالله وميلت راسها ودموعها تنزل ونطقت :مره حلوه
تعالت ضحكاتهم عليها وتقدمت رنا تاخذ غاية من حضن عبدالله ونطقت :ياحبيبتي ياامي انتي نورتي ياروح جدتك
اسامة وهو يتقدم يحضن ايثار ونطق :بابا لاتبكين خلاص كبرنا وصار عندنا بيبي يعني مافي دموع
اماني بضحكه :غاية تبطل تبكي وإيثار لا
دفنت وجهها بصدر ابوها من تعالت ضحكاتهم عليها ونطقت نورة :عبدالله معها ومستحيل يخلها تبكي
تقدم ياسر يحضن عبدالله ونطق : عساه بيت دايم عامر بأهله وحبايبه وعز ياخوي
شد عليه ونطق :تسلم ياخوي الله يبقيك
وتقدموا يجلسون بالصاله مع بعض والسوالف بينهم والبنات متجمعين حوالين غاية
حمزه :عز الله البنت اختنقت ارحموها
عبدالرحمن :ياخوي خذ بنتك هلكوها البنات
اثير وهي تاخذ غاية بحضنها ونطقت :هي تبينا وتحبنا ماتبيكم
كادي :يوووه بالحجم الصغير متحمل أنا من هالكياته
نرجس :ايثار تكفين شلون قادره تمسكين نفسك احس ودي آكلها من لطافتها وحلاوتها
ياسر بضحكه :قلب الياسر لاتخوفين عيالي وش بتاكليهم
خزته بنظراتها وتعالت ضحكاتهم عليها
وقف احمد يتقدم ياخذ غاية وحملها لحضنه وطلع من جيبه شيك ودخله وسط لفاتها وقبل جبينها بحنيه ونطق بصوته إلا قشعر بحسدهم:اول أحفادي بنت بكري غاية بنت عبدالله عسى ربي يبلغني افرح فيك وتدورين وتلعبين حولي ياحبيبة قلبي ولذة فوادي
محمد : ولا اعز من الولد .. الا ولد الولد الله يخليها ويحفظها لكم يارب
تمتوا بآمين وتقدموا كل واحد يعطي هديته ويحطها على سرير غاية
غيث وهو يناظرها ونطق :صارت غنيه احسن مني خلاص اباخذها
عبدالله :ولد عينك أبعدها عن بنتي !
غيث وهو يناظر إيثار ونطق :تبيني اصير صهرك ؟
توسعت عيون ايثار بضحكه من عبطه وطقطقته ونطقت :بتصبر عليها وقت تكبر ؟
أسامة :إلا يقدر البنات نعطيه غير كذا مافي كلام
هز احمد راسه باايه ونطق :وانت صادق ياخوي هالله هالله بالبنات قدروهم وصونوهم وحافظوا عليهم
ابتسموا البنات بحب من كلامهم عليهم
لفت اماني تناظر إيثار إلا بان عليها التعب من قعدتها ووقفت تتقدم لها ونطقت :يلا يمه تعالي غرفتك عشان ترتاحي
رنا وهي تاخذ غاية ونطقت :امك معها حق تعالي وارتاحي ونزلت نظرها لي غاية وكملت :ونريح حبيبه جدتها
ابتسمت ايثار وتقدمت ترفع جسدها وبسرعه فز عبدالله يساعدها توقف ولفت تناظره بحب ونطقت بهمس :ارتاح لاتتعب
هز راسه بنفي ونطق :راحتي وقت تكوني انتي مرتاحه ولا عليك شي
ابتسم أسامة براحة وهو يشوف اهتمام عبدالله على بنتة ونطق يهمس لنفسه :الله يخليه لك يابوك ويديم السعاده عليكم.
تقدمت تمشي مع امها ورنا ودخلوا غرفتها وأتجهت للسرير تنسدح بتعب ابتسمت من حطت رنا غاية بسريرها ونطقت :امي ايثار تبيها عندك عشان لاتتعبي وتوقفي وقت تبكي
هزت راسها بنفي ونطقت :لا خالتي خليها اصلاً شوي وبآخذ شاور وبعدين باخذها عندي
هزت رنا برأسها باايه ونطقت :خلاص يمه خليك وانا بكلم العامله تجهز لك أغراضك
تنهدت بتعب وغمضت عيونها وهي تحس بخمول وودها تنام تقدمت اماني تجلس مقابلها ومدت يدها تمسح على خدها ونطقت :إيثار فيك شي
فتحت عيونها بتعب ونطقت :لا يمه مافيني شي بس شوي تعب وخمول
اماني بحنيه :يمه انتبهي لا اكلك ترا جسدك ضعيف ويبي تغذيه
هزت راسها باايه وهي مو قادره تتكلم من التعب والخمول إلا فيها وسرعان مااغمضت عيونها ونامت
ابتسمت اماني ونزلت راسها تقبل جبينها ووقفت تغطيها وتطلع تجهز لها اكل عشان يغذيها