بالعصر ساقت اولادها ومشت لبيت امها تزور اخوها واختها اول ما وصلوا أيمن قاليها انه حيدخل بيت ناس جدو الامين بالأول يسلم عليهم وافقت وقالتليه يسوق اخوه واخته معاه فرحو وجرو لبيت جدهم اما لمياء كانت حاسة بضيق شديد بتحسه كلما جات حلتهم كل الحاجات هنا بتذكرها بيه وبقصة حبهم الحيطة البين البيتين محفور عليها اول حرف من اسمها واسمه الباب الصغير قفل النفاج كان آخر محاولاتها للحفاظ على بيتها اول مامرت بقدام الباب الصغير الخاص بجزوها المفصول الما فيه عفش كانت نقلته كله لبيتها الجديد حق الايجار بعد الطلاق ما كانت متحملة تكمل حياتها هنا وسطهم عادي عاشت ذكريات صعبة ومرة في البيت ده لكن عندها فيه ذكريات حلوة برضو زي تفاصيل عرسها واول خمسة سنوات من زواجهم وولادة عيالها التلاتة ما بتحب تجي هنا كتير بتحاول تتجنب تجي بيتهم بتفضل اخوانها هم اليجوها في بيتها قطع ذكرياتها حاج الامين وهو واقف قدام باب بيتو:ما حتجينا داخلة المرة دي برضو يا لمياء يا بتي؟
اتشجعت واخدت اول خطواتها للبيت الما دخلته من أربع سنوات مدت يدها تسلم عليه جبدها وقلدها زيين هي عندو زيها زي بتو إيمان وهي كمان ما كانت بتكرهه وما شافت منو غير كل خير عاينت من ورى كتفه شافت نسيبتها فتحية متربعه ليها فكرسي في الصالة وبتعاين ليها ببرود لقت انه من الادب قدام اولادها انها تسلم على حبوبتهم عادي عشان م يكروهها سلمت عليها ببرود:ح تمشوا معاي عند خيلانكم ولاتقعدوا شوية وتحصلوني هناك؟
فتحية:اكيد ح يقعدوا في بيت جدهم مع حبوبتهم
أيهم:انا اشتقت لعمتو ايمان اسيل: وانا كمان يا ماما
ايمن:وانا اشتقت لاني اغلب جدو في الكوشتينة والدمنة
لمياء:ما مشكلة لو عايزين تقضو باقي اليوم بجاي ماف مانع
فتحية:والمفروض يكون عندك مانع ليه إن شاء الله؟!
لمياء :منو الجاب سيرة الموانع هسي انا قلت مافي مانع
ما ادتها فرصة ترد مرقت و خلت ليها البيت طوالي اضايقت
طلعت على بيتهم وهي بتبكي ما عارفة ليه مر في بالها خيال لراجل اسمر وهيئته عشوائية وشوية شيب خفيف في شعره لكن اتلاشت صورته اول ما لبنى فتحت ليها الباب قعدو في كنبتهم المفضلة في البرندة:الاولاد ح يجو من بيت جدهم؟
لمياء :لا لا غالبا ح يبيتو هناك لبنى حست بالإحباط بعوضوها شوقها للانجاب:خسارة كنت مشتاقة ليهم شديد💔
لمياء:مش احنا اتفقنا تجي تقضي معانا باقي الاسبوع ذاتو تغيري جو شوية يا اختي بدل ما تكوني قاعدة براك....
لبنى:بمناسبة تغيير الجو انا من رجعنا من الحج حاسة اني محتاجة اجرب حاجة جديدة و اكسر روتين حياتي الممل
لمياء اتبسطت انه اختها اخيرا فكرت تتطلع من الهي فيه ده:
كويس شديد والله اها ناوية على شنو؟
