مر الإسبوع الأول على لمياء وهي بتحاول توفق بين شغلها الجديد ومسؤوليتها في البيت تعمل غداها من بليل وتصحى من بدري قبل اذان الصبح عشان تجهز اولادها للمدرسة....
ويطلعو كلهم سوا سبعة ونص بقت عاشية في حالة طوارئ يومية لكن مبسوطة بشغلها رغم تعبها و مجهودها دوامها كان صباح تمشي الساعة 8 وتجي راجعة الساعة 4 بتستلم منها الشفت البت التانية كانو 3 بتين وولد البنات بمسكو بالصباح وبالمسا والولد بمسك بليل عشان الصيدلية تكون فاتحة 24 ساعة اما دكتور حليم عندو ايام معينة بجيها في الاسبوع لانو شغال في مستشفى حكومية وده كان مريح بالنسبة ليها لانها ما كانت مضطرة تحتك بيهو كتير وتحاول تهرب منو....
****
اخيرا جا يوم الجمعة كان يوم الراحة ليها من الشغل والأولاد بمشو عند ابوهم كلهم اما بالنسبة لحجة لرضية فكان يوم اللمة عشان بجوها فيه حريم اولادها وعيالهم يتلمو في بيتها
كانو قاعدين كلهم في العريشة البرة في الحوش الاتعودوا يتلموا فيها حجة الرضية قاعدة مسيطرة ف عنقريبها المفضل وحوالينها احفادها بلعبو اما اولادها كانو مولعين الكوانين و بجهزوا فشية الجمر وحريمهم بعملو في السلطات والإضافات والتتبيلات اما حليم كان واقف بشوي وبتاوق للمياء من باب الشارع المفتوح عارفها حتكون في البيت واولادها حيكونوا مع ابوهم هسي حسب ما امو حكت ليهو نظامهم كيف لكن ما عارفها ما جات ظهرت عليها ليه و ما عارف هو مستنيها ليه ذاتو مع انو شافها أمبارح في الصيدلية مفروض يعترف لنفسه انو على الاقل فيها شيء بشده رزانتها وحنيتها وانها على طبيعتها شوفتها مريحة للعين وبتشرح القلب.....
زهج خلى الشية لاخوه بعد مزاجه اتعكر من ترقبها وانتظارها دخل المطبخ عشان يشرب اتفاجئ بصوتها بعد مسافة فهم المطبخين لاصقين في بعضهم عشان كدة الاصوات بتنتقل وقف يتصنتها:معليش حبيبتي ما بقدر اجيكم الليلة تعبانة والله عارفة ده كان اول اسبوع لي في الشغل عاوزة اخد رست شوية خصوصا انو الاولاد مع ابوهم تعالو لي انتو...
انا ماشة السوبر ماركت هسي اشتري شوية حاجات للبيت للاسبوع الجاي بتصل ليكي بعدين لمن ارجع...مع السلامة
بعداك سكتت وقف في محله للحظات يجمع الكلام فمخه بعدين جري طلع الحوش وقاليهم انو ماشي السوبرماركت يجيب شوية حاجات ويجي فاطمة سئلته:حاجات شنو؟
:حاجات كدة يا خالتي فاطمة اتذكرتها هسه بوريك بعدين
امل قالت ليه:بابا جيب لي معاك شوكولاتة وانت جاي
:حاضر حبيبتي وطلع بسرعة يهرب من جلسة الاسئلة دي نسوان اخوانه عاينو ليه باستغراب من تغير مزاجه المفاجئ اثار شكوكهم اما خالتو فاطمة و حجة الرضية كانو متاكدين تماما انو حليم فيه شيء متغير اليومين ديل......
