صحى من النوم متأخر لأنه كان مساهر مع بناته امبارح بعد رجعته من سفريته صلح فرشته واتوضا صلى الصبح متأخر قريب لوقت الضحى طلع مشى الصالة برة كانت مرتبة زي ما اتعود عليها بناته كلهم متعودات على النضافة والنظام من هم صغار بحكم ظروفهم الأسرية وغياب امهم لقى الصالة فاضية
:خالتو فاااطمة وين انتو؟
طلعت راسها من المطبخ الفاتح على الصالة وابتسمت ليه: اشتقت ليكم شديد انتي والبنات والله
:وانت كمان وحشتنا البيت ما عندو طعم من غيرك ما حلو
:تحلي ايامك يا خالتي تعالي اقعدي احكي لي البنات عملو فيك شنو بوراي إن شاء الله ما يكونوا تعبوك؟
:العادي يا ولدي البنات لسه صغار بحتاجو للتوجيه والحسم مرات والدلع والحنان والاهتمام مرات مرات اشرت بيدها
:لو ما انتي ما كانو لقو اي شيء من ده كلو والله....انتي ما بس خالتهم عوضتيهم عن فقد امهم ما ح نسي وقفتك معانا بعد موت آيات الله يرحمها 4سنوات وانتي معانا ما فارقتينا ولا مليتي من مسؤولية البنات مع اني شخصيا بزهج وخلقي بضيق وانتي ما بتضايقي من طلباتهم ومشاكلهم خالص.... خالتو فاطمة مراة في بداية الستينات من عمرها ملامحها مألوفة تحس انك شايفها قبل كدة و بتدخل قلبك بسهولة كانك بتعرفها وبينكم عشرة سنين طويلة شعرها كله شيب بتحنوو طوالي لمن صبغ عليهو اللون البرتقالي اللامع.......
:حليم ديل ما بنات اختي الصغيرة وبس ديل بناتي الما شلتم بطني ولمن آيات الله يرحمها اتوفت وطلبت مني اسافر معاك عشان اراعي ليك البنات ما صدقت خفت تسافر وتحرمني منهم عوضوني عن وفاة راجلي الله يرحمه وعدم الولادة انا المديونة ليكم ما انت يا ولدي بناتك ديل ياهن بقن لي بناتي..
حليم :الله يخليك لينا وما يحرمنا منك ولا نشوف قفاك
وقف ع حيلو بتاوب:ما حسيت بنفسي امبارح بالسهر والتعب نمت لحد الضهر عديل انا...البنات ديل صحو مشو مدارسهن؟
ما كمل كلامو سمع صوت باب اوضة البنات بتفتح فاطمة غمزت ليهو قال بصوت عالي:اكتر وحدة اشتقت ليها امولة حبيبتي جبت ليها معاي شوكولاتة والعاب وصدف كتير.... فجأة نطت فضهره من ورى ضحك و سحبها قدامه وقلدها عليه بالحيل كان بحب بناتو كلهم وبحاول ما يميز بيهم لكن امل وضعها مختلف لانو امها اتوفت وهي صغيرة كان عمرها أربعة سنوات حتى هي ما بتتذكرها كويس زي الناس عشان كدة بحس بالذنب اتجاهها وبحاول يعوضها فقدانها لامها
:بابا وينها الشكولاتة حقتي؟
:هههه فوق الدرج الجمب سريري...جرت جابتها واتربعت فوق حجره تاكل فيها فاطمة اتأملتهم من شباك المطبخ ودعت الله يطول في عمره ويبارك ليهو في بناته ويفرح بيهم
:ليه بتي الحلوة ما مشت المدرسة الليلة؟
أمل بدلع:عشان انا كنت عيانة عاين ليها بتفحص و شك لاحظته خالتها:فعلا كانت حرارتها مرتفعة شوية لكن عملت ليها كمادات انخفضت وهسي بقت كويسة بكرة إن شاء الله حتمشى كان عارف بتو ما بتحب المدرسة وبتحجج عشان ما تمشي وخالتا ما بتحب تضغط عليها لازم يلقى حل للموضوع ده شالها وقام:انا حمشي لناس امي الليلة عشان اطمن عليها ما عارف حاسي بقلق على صحتها اليومين دي بس لو سمعت كلامي وجات عاشت معانا هنا فالبيت كنت ح ارتاح والله
