رجع البيت طوالي بعد خلص قعدته مع أيمن ووليد اخوها واتفاجئ بانه بته الكبيرة ما رجعت من المدرسه مع اخواتها ورسلت ليهم رسالة انتحار :"اخواتي سامحوني الأمر كان اصعب من اني اتحمله ابوي عيش حياتك براحتك بعديني"
كلماتها وجعته ما كان متخيل بته ضعيفة وهشة للدرجة دي
خالتها كانت بتسكلب وبتلقي اللوم كله عليه على قرار عرسه
:يعني انت صبرت ده كلو ما قدرت تصبر كم سنة عشانهم
حجة الرضية شاكلتها و قالتليها انو الموضوع ما بسببه هو لكن بسبب تحريضها هي للبت وغيرتها على أختها من لمياء الشكلة قامت بينهم :انا ما حرضتها وما عندي اعتراض على لمياء في شخصها انا اعتراضي على توقيت العرس نفسه...
حليم اعصابه م كانت متحملة اكتر طلع عمل تلفوناته لإدارة المدرسة و سيد ترحيلها وهددهم على عدم مسؤوليتهم.....
بعداك اتصل على لمياء وكلمها الحاصل عشان تجي تقعد مع امه وخالتي فاطمة تحاجزهم وتهدي بقية بناته الخايفات على اختهم مسافة ما يمشي يفتش عليها.... لمياء اتصدمت بالخبر و كلمت اخوانها وجابت معاها لبنى اما وليد طلع يفتش على حياة مع ابوها في كل بيوت صحباتها وجيرانهم وقرايبهم و حتى معارف أمها....كان حاولو يتصلو على تلفونها كم مرة بلقو فاتح لكن ما بترد حليم فقد اعصابه خلاص كان حاسي انه ح يفقد بته في اي لحظة وندم انه ما استجاب لضغطها عليه ف موضوع العرس وسمع كلام المعالجة حقتها القالت ليه يواجهها مباشر ويتناقش معاها ويقنعها
في البيت:
حجة الرضية دخلت اوضتها وقاطعت خالتي فاطمة القالت اول ما البت تتلقي حتسوقها وتمشي بيتهم ما بتقعد هنا تاني
لبنى كانت في المطبخ بتعمل في الغدا اما لمياء قاعدة مع حنين البتبكي شديد و خايفة على اختها الكبيرة الما عندها غيرها صح هي مريضة لكن كانت دايما سندها ومصدر قوتها
اما امل الصغيرة ما كانت جايبة خبر للحاصل ده كلو قاعدة تلعب مع اسيل بتها وتوريها في عروساتها ولعباتها لمياء كانت مبسوطة باندماج البتين مع بعضهم اسيل دايما كانت وحيدة بين اخوانها الاولاد والعابهم الخشنة من عربات و مسدسات..
أيهم مشى يقضي اليوم مع أبوه ما حضر الاكشنات دي كلها
اما أيمن فكان قاعد مع حجة الرضية في اوضتها عشان يواسيها ويخفف عليها لحدي ما نامت بعدما ادوها المهدئ شاف تلفونها جاته فكرة فجأة قرر ينفذها قام شال رقم حياة من تلفون حبوبتها ورسل ليها مسج:
حياة انا أيمن ردي علي انا كمان ما موافق ع العرس حقهم ده
مرت ربع ساعة كاملة وما ردت كان خلاص فقد الأمل وقال انه خطته كانت فاشلة..لحدي ما جاته مكالمة من نفس الرقم انسحب براحة من جمب امه وخالته ومرق الحوش برة يتكلم
