وقفت قدام باب الشارع تعاين لي اولادها لحد ركبو الترحيل حقهم وودعتهم الليلة الخميس الترحيل برجعهم بالمسا لبيت ابوهم يقضو معاهو لحد السبت اتعودو على النظام ده من السنة الأولى من طلاقهم ولحد الان لكن هي لسه بتخاف كل مرة يجي سبت ما يرجعهم ليها...استغفرت ولعنت ابليسها
عاينت لقت باب جارتها حجة الرضية متاكة وهي الليلة اوف اساسا من الصيدلية ماخدة اجازة عشان عقد أروى و د.علاء في الحقيقة ده ما كان السبب..كانت محتاجة ترتاح شوية من الضغط النفسي العاشية مع دكتور حليم وهي بتحاول تضبط مشاعرها قدام نظراته واهتمامه بيها..قررت تهرب من افكارها لفحت توبها سرعة ومرقت...تاوقت من الباب لقتها بترش في الحوش من عنقريبها وبتسقي مزهرياتها عرفت انه مزاجها الليلة رايق قررت تدخل عليها:صباح الخير يا خالتي الرضية
ده شنو المزاج الرايق والحركات دي من الصباح؟
الرضية:صباح النور والسرور مافي شغل اليللة ولا شنو؟
لمياء: لا لا ماخدة اجازة عشان عقد زميلتنا
الرضية:الف مبروك وعقبال افرح بيك قريب قادر يا كريم
لمياء:هههههه منو دي انا؟ لا يلدغ المؤمن من جحر مرتين
الرضية:ما كل الرجال زي بعضهم يا بتي.. سكتت مسافة
اصابع يدك دي هسي زي بعضها؟سئلتها ورفعت راسها تتأمل ملامحها البظهر عليها المرح والحيرة في نفس الوقت
ردت عليها بعدما اتغيرت ملامحها لخوف وقلق:
عارفة...لكن خايفة افشل تاني يا خالتي.. انا فشلت في زواجي من حبي الاول تعتقدي تاني ممكن احب وانجح؟
الرضية اتغاظت وسحبتها من يدها عشان تقعد جمبها في العنقريب زي مراهقة صغيرة امها دايرة تصحح ليها افكارها:
اولا قلت ليك مليون مرة ما تتكلمي كانك مرة عجوزة قدري...انتي شابة يا بتي دابك في التليتينات الحياة قدامك
تانيا منو الاقنعك بكضبة الحب الاول دي؟ ومنو القال الكان بينك انتي واحمد ده كان اسمه حب من اساسو؟
عاينت ليها وكملت:حبك الأول هو حبك الاخير لأنه الأول لو كان حب حقيقي ما كان قدرتي حبيتي بعده تاني..بعدين احمد ده يا بتي انتي قمتي لقيتي قدامك..حبيتي وانتي طفلة.. ولمن جيتي راهقتي برضو راهقتي بيه.. و تاني فقدتي ابوكي وهو كولد عمكم الكبير عمل واجبه ووقف عليكم قام طق كبر في نظرك زيادة وعرستي ده الحصل والصح انو البقيف معانا في ازماتنا وبجيرنا في مصيبتنا بنقوليه كتر خيرك وبارك الله فيك ما بنعرسه يا بتي!
لمياء عيونها قرقرت وقامت:انا عرسته وعمري 18 وابوي مات وانا15ما عرسته وانا صغيرة ولا عشان ربطت بين الموضوعين اساسا
الرضية:حتى ولو 18 طفلة برضو وعلى حد علمي متكلم فيك من انتي 16 سنة بتخيل ليك انك ما اتاثرتي بموت ابوك ووقفت احمد عليكم عقلك مشوش لأنك كنتي صغيرة
