اليوم التالي ...
شيماء ...نزلت اسوي الجاي واحضر صينية الريوك اليوم تجي عمتي سھام وقبل لا تجي اريد اكلول لجدو على المعهد وشلون اداوم وهو اعرفه مايقبل يكول بعيد كنت مشغولة بالتفكير الى ان دخل علي المطبخ ...
علي وهو رافع حاجبة ومبين بعدة زعلان : صباح الخير
شيماء... بداخلي كلت لا هلة هسة يرجع يتذكر سالفة خالد الامس ويرجع يحاسبني رديت بنبرة لامبالاة عود اسوي نفسي ثكيلة : صباح النور ...
علي بصوت خشن رجولي : صبيلنا ريوك ..
شيماء بقيت ساكتة واني اصب واحط على الميز حتى ياكل الى ان قدمت الة الجاي وكعدت مقابيلة على الميز .وبداخلي اكول ((.اعرف يريد يحجي علية خلي شيكول خلي يكول مااجاوبة )) بدا يخوط بالكوب وهو ما يلتفت الي والعصبية واضحة من حاجبة الي بس يعصب يرتفع
علي : من سالفة بين اثنين تصير زحمة نطلعها موو ؟
شيماء : ممم !!
علي : يعني سوالفج القديمات يصير اطلعهن لو اسكت و اكول خطية...و جاهلة.... وماتفتهم ؟
شيماء حسيت نبرت التهديد بكلامة حاولت ابين نفسي قوية ورديت : ماعندي شي اخجل منة الحمد لله ..
علي رفع عيونة بعيوني وهو يخزرني و بتھديد : و فراس ؟؟ وتلفوناتج وياا.... هاا اعدد لو بعد ؟!
شيماء فهمت فراس كلشي مسولف وهالشي خلاني بموقف ضعف شنو ارد وشنو احجي خفت لايكول شارده خفت لايكول ام فراس رجعتج خفت واني اشوف عيونة الي مركزة بعيوني وملامح وجهي احسة ديقرا افكاري ...
علي كمل كلامة بتهديد : من سكتت ومشيتها الج ٫كلت جاهلة ..... مو قصدها .....سكتت وكلت عسى بالايام تتعدل ...تفهم غلطها ...موو؟ شوفي بالنسبة لسالفة زينب وخالد.... ترجعين وتكولين لجدي جذب ومامتاكدة و....
شيماء ...فهمت جاي بهددني بفراس حتى اكول سالفة زينب وخالد جذب هالشي خلاني افقد اعصابي واقاطعه بعصبيه : انت ما تهددني واذا تريد تحجي لجدو روح احجي !
علي رفع الجاي اخذ رشفه ورجع يركز بعيوني وكال : تدرين ابوج من انولدتي شنو كال ؟
شيماء ... بقيت ساكتة مافهمت شنو يقصد وشنو يريد يكول ؟
علي بهدوء كانما يريد يعرف ردت فعلي كال : كنت بالابتدائية و ابوج يكلي هاي بنتي الك .... من انتي عمرج سنة بس ...تعرفين جدي كتل روحة حتى يجيبج مو بس لأن بت عمي قاسم و محسوبة علينا .لااااا..جدي جابج الي ...تعرفين شنو الي ؟!
شيماء وكفت و عيوني بعيونة متفاجاة من كلامة
شيماء بارتباك : انت ....شجاي تكول ؟
علي ..اعرف كلامي صدمها بس حسيت قلبي يريد شي يريد يكلها انتي الي وضميري يكلي كافي اسكت لا تخليها تكرهك ...وانت تعرفھا تحب غيرك ...
أنت تقرأ
مضيت بعيدا
ChickLitاي طريق هذا الذي جمعنا مرة اخرى ولماذا كلما اردنا الافتراق تجمعنا الصدف ؟ باسلوب قصصي جديد وباللهجه العراقيه قصة (مضيت بعيدا ) مليئه بالمفاجات والاحداث الشيقه جمعت بيها اكثر من قصه واغلب الاحداث حقيقيه لكن باسماء مستعاره ...الاحداث جدا شيقه ومن...
