عذراء .....اندك الباب وعمتي فتحته وكان صوت فراس الي خلاني ارجف اول مره اشوف فراس هيج عصبي دخل للصاله مثل البركان يصيح ويغلط ومابقى احد ما غلط عليه واخر شي صاح (هسه اخذ اختي و ماابقيها عدكم ...)
دخلت واني خايفه و اساله : شبيك فراس احجي شنو صار ؟؟
فراس جاوبني بعصبيه وصياح : امشي وياي وبعد هذا البيت ما تبقين بيه سامعه ...
ام عماد بتوسل وهي تحاول تمسك ايده : احجي عمه شنو متعارك ويا عماد ؟ عمه احجي شكو شصاير ؟؟
فراس من العصبيه وملامحه كلها تغيرت و صاح بحركه قلب : حجايه وحده وصليها لابنج وكليله اختي صح يتيمه بس انه الي ربيتها بيدي ...كليله اشك بروحي ومااشك بيها ...(والتفت علي وكمل كلامه )عذراء جيبي عباتج وتعاي ...
عذراء ...كل الغلط والصياح بعيني كوم وحجايه فراس الي كالها بكوم ثاني
حتى مااعرف يمته نزلن دموعي صعدت وتفكيري بكلامة معقولة ھيج عماد يكول عني ؟!!
دخلت لغرفتي ولبست حجابي وعباتي ونزلت واني مثل الي يمشي بس بغير عالم
كان فراس يصيح وعمتي تتوسل ابقى واني كانت دموعي تنزل مثل المطر على خدي ..
اي كنت مصدومه ...صح من اول اسبوعين عماد تغير وصح دومه يديرلي ظهره و مرة سحب التلفون مني وكسره و كان يحرمني اروح لاهلي بس كل هذا جنت ابرره لنفسي من حبه وغيرته علي.... بس لا ...طلع كلشي كان يكرره يقصده حجاياته ونظراته ويكعد يراقبني كله طلع غير شي ...طلع يشك بية !
طلعنه اني وفراس من البيت اي صح اتذكر جنت امشي ودموعي تصب وفراس يكلي والله لوما عمتي جان عماد هسه للنجف وديته ...كنت ساكته شنو احجي والي طعني بشرفي اقرب انسان الي ...
وصلنه للبيت ودخلت بدون مااحجي شي كانما دموعي وشكل فراس شرحوا لأمي كل شي ...
ام فراس بصدمه : عذراء ....ها يمه شسوى عماد هالمره ...
فراس : يمه كلشي انتهى خابريه وكليله يجيب السيد وخلي نخلص ...والله ...والله اذا يعاند لايوصل بعد ...
ام فراس : فراس اكعد يمه اكعد استهدي بالرحمن وسولفلي شنو صار ؟
تركتهم ودخلت لغرفت امي بيتنه مثل الحوش فسحه كبيره وغرفتين وحده لفراس ووحده الي انه وامي ...تمددت على الفراش وانه اسمع كلام فراس شلون وصل للمحل وشلون سمعهم يحجون عني وشلون عماد يتوسل بصديقه نزار حتى يعرف منو حبيت اسمع وبداخلي نار تغلي واتسائل معقوله عماد يصدك بصديقه و يشك بيه ؟
ليش منو هو حتى يتدخل بعلاقتنه ؟؟ وليش صدكه ؟
ضليت اتسائل الى ان ظل سقف الغرفه بعيني يدور وصارت الدنيا سوده وحتى صوتهم الي كنت اسمعه اختفى ... !!
**************
في مكان اخر وتحديدا منزل ابو جواد ...
دخل خالي حميد وهو معصب ويصيح : اي هاي تاليتها حجي سعدون يدزلي ولده يهددوني اباب بيتي ...
أنت تقرأ
مضيت بعيدا
Literatura Femininaاي طريق هذا الذي جمعنا مرة اخرى ولماذا كلما اردنا الافتراق تجمعنا الصدف ؟ باسلوب قصصي جديد وباللهجه العراقيه قصة (مضيت بعيدا ) مليئه بالمفاجات والاحداث الشيقه جمعت بيها اكثر من قصه واغلب الاحداث حقيقيه لكن باسماء مستعاره ...الاحداث جدا شيقه ومن...
